ନୂଆଦିଲ୍ଲୀ, ୨୬।୭: ପେଟ୍ରୋଲ ଏବଂ ଡିଜେଲର ଲଗାତର ଦର ବୃଦ୍ଧି ଲୋକଙ୍କ ଚିନ୍ତା ବଢ଼ାଇଛି। ଏ କ୍ଷେତ୍ରରେ ଇ-ଯାନ ଏକ ପ୍ରମୁଖ ବିକଳ୍ପ ଭାବେ ଉଭା ହୋଇଛି। କେନ୍ଦ୍ର ସରକାର ଫେମ୍-୨ ଯୋଜନା ଦ୍ୱାରା ସବ୍ସିଡି ଯୋଗାଇ ଦେଉଛନ୍ତି। ସେହିଭଳି ରାଜ୍ୟଗୁଡ଼ିକ ସ୍ତରରେ ମଧ୍ୟ ସରକାର ସବ୍ସିଡି ପ୍ରଦାନ ଦ୍ୱାରା ଇ-ଯାନ ଦର ସୁଲଭ ହେଉଥିବା ଦେଖାଯାଇଛି। କନ୍ସଲ୍ଟିଂ ଫାର୍ମ ଇଓ୍ବାଇ ପକ୍ଷରୁ ଏକ ରିପୋର୍ଟ ମୁତାବକ, ୯୦% ଲୋକ ଇ-ଯାନ କ୍ରୟ କରିବାକୁ ଚାହୁଁଛନ୍ତି। ସଂସ୍ଥା ପକ୍ଷରୁ ହୋଇଥିବା ସର୍ଭେରେ ୧୩ ଦେଶର ୯ ହଜାରରୁ ଊର୍ଦ୍ଧ୍ୱ ଲୋକଙ୍କୁ ସାମିଲ କରାଯାଇଥିଲା। ଏଥିରେ ଭାରତର ୧ ହଜାର ଲୋକ ଭାଗ ନେଇଥିଲେ। ଏମାନଙ୍କ ମଧ୍ୟରୁ ୯୯୦ ବା ୯୯% ଲୋକ ଇଲେକ୍ଟ୍ରିକ ଭେଇକିଲ କିଣିବାକୁ ଆଗ୍ରହୀ ବୋଲି ମତ ରଖିଛନ୍ତି।
ବିଶ୍ୱ ସ୍ତରରେ ଇ-ଯାନ ବିକ୍ରି ଆଗାମୀ ବର୍ଷଗୁଡ଼ିକରେ ଦ୍ରୁତ ଭାବେ ବୃଦ୍ଧି ପାଇବ ବୋଲି ଏହି ରିପୋର୍ଟରେ ପ୍ରକାଶ ପାଇଛି। ୪୦% ଲୋକ ଇ-ଯାନ ଲାଗି ୨୦% ପର୍ଯ୍ୟନ୍ତ ପ୍ରିମିୟମ ପ୍ରଦାନ ନିମନ୍ତେ ପ୍ରସ୍ତୁତ ଥିବା ଏଥିରୁ ସାମ୍ନାକୁ ଆସିଛି। ଭାରତରେ ପ୍ରତି ୧୦ ଜଣରେ ୩ ଜଣ ଇଲେକ୍ଟ୍ରିକ କାର କିଣିବାକୁ ପ୍ରସ୍ତୁତ ହେଉଥିବା କୁହାଯାଇଛି। ସର୍ଭେ ମୁତାବକ, ଭାରତରେ ଅଧିକାଂଶ ଲୋକ ଚାହାନ୍ତି ଯେ, ଯାନ ଗୋଟିଏ ଥର ଚାର୍ଜରେ ଅଧିକ ବାଟ ଗଡୁ। ୧୦୦ରୁ ୨୦୦ ମାଇଲ ବା ୧୬୦ କିମିରୁ ୩୨୦ କିମି ସିଙ୍ଗଲ ଚାର୍ଜରେ ଯାନ ଅତିକ୍ରମ କରିବାର ଆବଶ୍ୟକତା ରହିଛି ବୋଲି ଭାରତୀୟମାନେ ମତ ପ୍ରକାଶ କରିଛନ୍ତି।
ଯାନବାହନଗୁଡ଼ିକ ପରିବେଶ ପ୍ରଦୂଷଣର ଏକ ପ୍ରମୁଖ କାରଣ। ଏହାକୁ ଲୋକମାନେ ବିଚାର କରି ଇ-ଯାନ କ୍ରୟ କରିବାକୁ ଚାହୁଁଥିବା ରିପୋର୍ଟରୁ ଜଣାପଡ଼ିଛି। ପେଟ୍ରୋଲ ଏବଂ ଡିଜେଲ ଚାଳିତ ଗାଡ଼ି କ୍ରୟ ପରିବର୍ତ୍ତେ ନିଜର ଉତ୍ତରଦାୟିତ୍ୱକୁ ବୁଝି ଇ-ଯାନ କ୍ରୟ କରିବା ଆବଶ୍ୟକ ବୋଲି ୬୭% ଲୋକ ମତ ରଖିଛନ୍ତି। ଇ-ଯାନ ବ୍ୟବହାର ବଢ଼ିଲେ ପରିବେଶ ପ୍ରଦୂଷଣ ଉପରେ ନିୟନ୍ତ୍ରଣ ଜାରି କରାଯାଇପାରିବ ବୋଲି ଲୋକମାନେ ଆଶା ପ୍ରକଟ କରିଛନ୍ତି। ଉଲ୍ଲେଖଯୋଗ୍ୟ, ଭାରତରେ ଉଭୟ କେନ୍ଦ୍ର ସରକାର ଏବଂ ରାଜ୍ୟ ସରକାରଗୁଡ଼ିକ ଇ-ଯାନକୁ ବର୍ତ୍ତମାନ ପ୍ରୋତ୍ସାହନ କରୁଛନ୍ତି। ଏହାର ବହୁଳ ବ୍ୟବହାର ନେଇ କେବେ ବ୍ୟବସ୍ଥା ଆସୁଛି ତାହା ଦେଖିବାକୁ ବାକି ରହିଲା।
