ଲକ୍ଷ୍ନୌ,୨୫ ।୭: ସଂକ୍ରମଣ ଯୋଗୁ କିଛିଦିନ ହେବ ଉତ୍ତର ପ୍ରଦେଶ ଲକ୍ଷ୍ନୌର ସଞ୍ଜୟ ଗାନ୍ଧୀ ପୋଷ୍ଟଗ୍ରାଜୁଏଟ ଇନଷ୍ଟିଚ୍ୟୁଟ ଅଫ୍ ମେଡିକାଲ ସାଇନସେସ୍(ଏସ୍ଜିପିଜିଆଇ)ର ଭର୍ତ୍ତି ହୋଇଥିବା ପୂର୍ବତନ ମୁଖ୍ୟମନ୍ତ୍ରୀ କଲ୍ୟାଣ ସିଂଙ୍କ ସ୍ୱାସ୍ଥ୍ୟାବସ୍ଥାରେ ସେମିତି କିଛି ଉନ୍ନତି ପରିଲକ୍ଷିତ ହେଉନାହିଁ । ସେ ଏବେ ଲାଇଫ୍ ସପୋର୍ଟ ବା ଜୀବନ ରକ୍ଷକ ପ୍ରଣାଳୀରେ ରହିଛନ୍ତି । ଏସ୍ଜିପିଜିଆଇର ଜଣେ ବରିଷ୍ଠ ଚିକିତ୍ସକ ରବିବାର ଏହି ସୂଚନା ଦେଇଛନ୍ତି । ଏପର୍ଯ୍ୟନ୍ତ ପୂର୍ବତନ ମୁଖ୍ୟମନ୍ତ୍ରୀ କ୍ରିଟିକଲ କେୟାର ମେଡିସିନ, ନେଫ୍ରୋଲୋଜି, ନ୍ୟୁରୋଲୋଜି ଓ କାର୍ଠିଓଲୋଜି ବିଭାଗର ବରିଷ୍ଠ ଡାକ୍ତରଙ୍କ ହେପାଜତରେ ରହିଛନ୍ତି । ସୂଚନାଯୋଗ୍ୟ, ୮୯ ବର୍ଷୀୟ କଲ୍ୟାଣ ସିଂଙ୍କୁ ଗତ ୪ ଜୁଲାଇରେ ସଂକ୍ରମଣ ଯୋଗୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ଆରମ୍ଭରୁ ହିଁ ତାଙ୍କୁ ଆଇସିୟୁ ଚିକିତ୍ସା ସୁବିଧା ଯୋଗାଇ ଦିଆଯାଉଛି ।
