ମୁମ୍ବାଇ: ବଲିଉଡ୍ର ବରିଷ୍ଠ ଅଭିନେତା ଅନୁପମ ଖେର ତାଙ୍କର ୫୧୯ ତମ ଫିଲ୍ମ କରିବାକୁ ଯାଉଛନ୍ତି । ଏହାର ଘୋଷଣା ସେ ୩୬ ହଜାର ଫୁଟ ଉପରେ ରହି କରିଛନ୍ତି । ସେ ଆଟଲାଣ୍ଟିକ ମହାସାଗର ଉପରେ ଏରୋପ୍ଲେନରେ ଯାତ୍ରା କରି ଏହି ଘୋଷଣା କରିଛନ୍ତି । ଏହାର ଏକ ଭିଡିଓ ସେ ସୋସିଆଲ ମିଡିଆରେ ଶେୟାର କରିଛନ୍ତି । ଏହାସହ ସେ ଲେଖିଛନ୍ତି, ମୁଁ କେବେ ଭାବି ନ ଥିଲି ଯେ ଆଟଲାଣ୍ଟିକ ମହାସାଗର ଉପରେ ୩୬ ହଜାର ଫୁଟ ଉପରେ ମୋ ଫିଲ୍ମର ଘୋଷଣା କରିବି । ଜୀବନରେ କିଛି ବି ଘଟିପାରେ । ଏହା ଉପରେ ସମସ୍ତ ତଥ୍ୟ ଖୁବ୍ଶୀଘ୍ର ମିଳିଯିବ । ଭିଡିଓରେ ଅନୁପମ ବିମାନରେ ରହି ବାହାରର ଦୃଶ୍ୟ ଦେଖାଉଥିବା ଦେଖାଯାଇଛି । ଏହାସହ ଲୋକେଶନ ଅର୍ଥାତ୍ ଆଟଲାଣ୍ଟିକ ମହାସାଗରର ମ୍ୟାପ ମଧ୍ୟ ଦେଖାଉଛନ୍ତି । ଅନୁପମଙ୍କ ପ୍ରଶଂସକ ତାଙ୍କର ୫୧୯ ତମ ମୁଭି ପାଇଁ ତାଙ୍କୁ ଶୁଭେଚ୍ଛା ଜଣାଇଛନ୍ତି । ଏହାସହ କେହି କେହି ଏହାକୁ ୧୦୦୦ କରିବାକୁ ମଧ୍ୟ କହିଛନ୍ତି । ୧୯୮୪ରେ ମୁଭି ‘ସାରାଂଶ’ରୁ ବଲିଉଡରେ ଡେବ୍ୟୁ କରିଥିବା ଅନୁପମ ୩୭ ବର୍ଷ ହେବ ଅଭିନୟର ଯାତ୍ରା ଜାରି ରଖିଛନ୍ତି । ନେଗେଟିଭ୍ ସହ କମେଡି କ୍ୟାରେକ୍ଟରରେ ସେ ଦର୍ଶକଙ୍କର ପ୍ରିୟ ଅଭିନେତା ପାଲଟି ଯାଇଛନ୍ତି ।
