ଓ୍ବାଶିଂଟନ, ୧୦।୭: ଫାଇଜର କମ୍ପାନୀ ଏହାର କୋଭିଡ୍-୧୯ ଟିକାର ତୃତୀୟ ତଥା ବୁଷ୍ଟର ଡୋଜ୍ ଆଣିବା ପାଇଁ ଆମେରିକା କର୍ତ୍ତୃପକ୍ଷଙ୍କ ମଞ୍ଜୁରୀ ଲୋଡ଼ିଛି। ୧୨ ମାସ ମଧ୍ୟରେ ଅନ୍ୟ ଏକ ଡୋଜ୍ ରୋଗ ପ୍ରତିରୋଧ କ୍ଷମତାକୁ ଯଥେଷ୍ଟ ବୃଦ୍ଧି କରିବ ଏବଂ କରୋନା ଭୂତାଣରୁ ସମସ୍ତ ମ୍ୟୁଟାଣ୍ଟରୁ ସୁରକ୍ଷା ଦେଇପାରିବ ବୋଲି କମ୍ପାନୀ ପକ୍ଷରୁ କୁହାଯାଇଛି। ଫାଇଜର ଏବଂ ଅନ୍ୟ କୋଭିଡ୍ ଟିକା ଡେଲ୍ଟା ଭାରିଆଣ୍ଟ ବିରୋଧରେ ସୁରକ୍ଷା ଦେଉଥିବା ବିଭିନ୍ନ ଦେଶରେ ଦେଖିବାକୁ ମିଳିଛି। ଟିକାର ଦୁଇଟି ଡୋଜ୍ ଭୂତାଣୁର ସବୁ ଭାରିଆଣ୍ଟ ବିରୋଧରେ ସୁରକ୍ଷା ପାଇଁ ଗୁରୁତ୍ୱପୂର୍ଣ୍ଣ ହେଲେ ମଧ୍ୟ ଏହା ଯଥେଷ୍ଟ ନୁହେଁ। ଟିକା ନେବା ପରେ ଶରୀରରେ ସୃଷ୍ଟି ହେଉଥିବା ଆଣ୍ଟିବଡ଼ି କିଛିଦିନ ପରେ ସ୍ବାଭାବିକ ଭାବେ ଦୁର୍ବଳ ହୋଇଯାଇଥାଏ। ତେଣୁ ବୁଷ୍ଟରର ଆବଶ୍ୟକତା ସମ୍ପର୍କରେ ଅଧ୍ୟୟନ ଜାରି ରହିଛି। ବୁଷ୍ଟର ଡୋଜ୍ ନେଲେ ଆଣ୍ଟିବଡ଼ି ସ୍ତର ୫ରୁ ୧୦ ଗୁଣ ବୃଦ୍ଧି ପାଇବ ବୋଲି ଫାଇଜର
କମ୍ପାନୀ ପକ୍ଷରୁ କରାଯାଇଥିବା ଅଧ୍ୟୟନରୁ ଜଣାପଡ଼ିଛି। କମ୍ପାନୀ ଏହି ଡୋଜ୍ ପାଇଁ ଆମେରିକାର ଫୁଡ୍ ଆଣ୍ଡ ଡ୍ରାଗ୍ ଅଥରିଟିଠାରୁ ମଞ୍ଜୁରୀ ପାଇଁ ଅଗଷ୍ଟରେ ଆବେଦନ କରିବ ବୋଲି ଫାଇଜର କହିଛି।
ଗର୍ଭବତୀଙ୍କ ପାଇଁ ଟିକା ସୁରକ୍ଷିତ
କୋଭିଡ୍-୧୯ ଭାକ୍ସିନ ଭୂତାଣୁ ସଂକ୍ରମଣରୁ ସୁରକ୍ଷା ଦେଉଥିବାରୁ ଗର୍ଭବତୀ ମହିଳାମାନେ ଟିକା ନେବା ଆବଶ୍ୟକ ବୋଲି ନୀତି ଆୟୋଗ ସଦସ୍ୟ (ସ୍ବାସ୍ଥ୍ୟ) ଡ. ଭି.କେ. ପଲ୍ ଶୁକ୍ରବାର କହିଛନ୍ତି। ଗର୍ଭବତୀ ମହିଳାଙ୍କ ପାଇଁ ଟିକା ନିରାପଦ ଓ ପ୍ରଭାବୀ ବୋଲି ମିଳିଥିବା ତଥ୍ୟରୁ ଜଣାପଡ଼ିଛି ବୋଲି ସେ କହିଛନ୍ତି। ଗର୍ଭବତୀଙ୍କୁ ଟିକାଦାନ ପାଇଁ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଗାଇଡ୍ଲାଇନ ଜାରି କରାଯାଇଛି। ଗର୍ଭାବସ୍ଥାରେ ଜଣେ ମହିଳା ଯଦି କୋଭିଡ୍-୧୯ ସଂସ୍ପର୍ଶରେ ଆସନ୍ତି ତେବେ ସମୟ ପୂର୍ବରୁ ପିଲା ଜନ୍ମ ବଢ଼ିବା ସମ୍ଭାବନା ରହିଥିବା ଏକ ଅଧ୍ୟୟନରୁ ଜଣାପଡ଼ିଛି। ପ୍ରତିଷେଧକ ସମ୍ପର୍କିତ ଜାତୀୟ ବୈଷୟିକ ଉପଦେଷ୍ଟା ଗୋଷ୍ଠୀ (ଏନ୍ଟିଏଜିଆଇ)ର ସୁପାରିସ୍କୁ ଗ୍ରହଣ କରି କୋଭିଡ୍-୧୯ ଟିକାକରଣରେ ଗର୍ଭବତୀ ମହିଳାମାନଙ୍କୁ ସାମିଲ କରିବା ପାଇଁ ଗତ ୨ ତାରିଖରେ ସ୍ବାସ୍ଥ୍ୟ ମନ୍ତ୍ରଣାଳୟ ଘୋଷଣା କରିଥିଲା।
