କୋଲକାତା,୩।୭: ତୃଣମୂଳ କଂଗ୍ରେସ (ଟିଏମ୍ସି)ର ମହିଳା କାଉନ୍ସିଲର ତବସୁମ ଅରା ଟିକାଦାନ କେନ୍ଦ୍ରରେ ନର୍ସଙ୍କ ଠାରୁ ଟିକା ଛଡ଼ାଇ ଜଣେ ମହିଳାଙ୍କୁ ଟିକାକରଣ କରୁଥିବା ଭିଡିଓ ସାମ୍ନାକୁ ଆସିଛି। ରାଜ୍ୟ ରାଜଧାନୀଠାରୁ ୨୧୦ କିମି ଦୂର ଆସନସୋଲର ଟିକାଦାନ କେନ୍ଦ୍ରର ଏହି ଭିଡିଓ ଭାଇରାଲ ହେବା ପରେ ନୂଆ ଅଢ଼ୁଆରେ ଫଶିଛି ମମତା ବାନାର୍ଜୀଙ୍କ ନେତୃତ୍ୱାଧୀନ ପଶ୍ଚିମବଙ୍ଗ ସରକାର। ଉକ୍ତ ଭିଡିଓକୁ ଭାଜପାର ଏମ୍ପି ବାବୁଲ ସୁପ୍ରିୟୋ ଓ ଅଗ୍ନିମିତ୍ର ପଲ ଶେୟାର କରିଛନ୍ତି।
ସମାଲୋଚିତ ହେବା ପରେ ନର୍ସିଂ କୋର୍ସ କରିଥିବା ଦାବି କରିବା ସହ ତବସୁମ କହିଛନ୍ତି, ମୁଁ କୌଣସି ଟିକା ଦେଇ ନାହିଁ। କେବଳ ସିରିଞ୍ଜ ହାତରେ ଧରିଥିଲି। ଟିକାକରଣ କେନ୍ଦ୍ରରେ ବହୁ ହିତାଧିକାରୀ ଟିକା ନେବାକୁ କୁଣ୍ଠାବୋଧ କରୁଥିଲେ। ସେମାନଙ୍କ ମଧ୍ୟରେ ସଚେତନତା ସୃଷ୍ଟି କରିବା ପାଇଁ ମୁଁ ଏଭଳି କରିଥିଲି।
ବାବୁଲ ସୁପ୍ରିୟୋ ତାଙ୍କ ଟୁଇଟରରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଟ୍ୟାଗ କରି ପ୍ରଶ୍ନ କରିଛନ୍ତି, ଲାଗୁଛି ପ୍ରଶାସକଙ୍କ ଉପରେ ଟିଏମ୍ସି ସରକାରଙ୍କ ନିୟନ୍ତ୍ରଣ ନାହିଁ। ଟିଏମ୍ସିର ଜଣେ ଏଏମ୍ସି ପ୍ରଶାସନିକ ସଦସ୍ୟା ଲୋକଙ୍କୁ ଟିକା ଦେଇ ଶହ ଶହ ଜୀବନ ସହ ଖେଳୁଛନ୍ତି। ରାଜନୀତି ତାଙ୍କୁ କ’ଣ ଦଣ୍ଡରୁ ବଞ୍ଚାଇ ପାରିବ।
ଏ ଘଟଣା ଉପରେ ମୁଖ୍ୟମନ୍ତ୍ରୀ ମମତା କହିଛନ୍ତି, ଏହା ଏକ ପୃଥକ ମାମଲା। ପଶ୍ଚିମବଙ୍ଗ ସରକାର ସେମାନଙ୍କ ସହ ଜଡ଼ିତ ନୁହେଁ। ଆମ ନିକଟରେ ଅଭିଯୋଗ ପହଞ୍ଚିଲେ ନିଶ୍ଚୟ କାର୍ଯ୍ୟାନୁଷ୍ଠାନ ହେବ।
