ମୁମ୍ବାଇ: ଟିଭି ଜଗତର ଚୁଲବୁଲି ଅଭନେତ୍ରୀ ତଥା କମେଡିକୁଇନ ଭାରତୀ ସିଂହ ଶନିବାର ନିଜର ୩୯ତମ ଜନ୍ମଦିନ ପାଳନ କରୁଛନ୍ତି। ଭାରତୀ ହେଉଛନ୍ତି ସେହି ଅଭିନେତ୍ରୀଙ୍କ ମଧ୍ୟରୁ ଜଣେ ଯିଏକି ଷ୍ଟେଜ୍ ଉପରକୁ ଆସିଲେ, ଯେତେ ଦୁଃଖି ଥିବା ବ୍ୟକ୍ତି ହସିବାକୁ ବାଧ୍ୟ ହୋଇଥାନ୍ତି। ହେଲେ ସବୁବେଳେ ହସାଉଥିବା ବ୍ୟକ୍ତି ଜୀବନରେ କେତେ ଯେ ଦୁଃଖ ଓ ଯନ୍ତ୍ରଣା ଭରି ରହିଛି ତାହା କାହାକୁ ଜଣାନାହିଁ। ଭାରତୀ ମଧ୍ୟ ସେମାନଙ୍କ ମଧ୍ୟରୁ ଅନ୍ୟତମ। ୧୯୮୨ ଜୁଲାଇ ୩ରେ ପଞ୍ଜାବର ଅମୃତଶରରେ ଜନ୍ମଗ୍ରହଣ କରିଥିଲେ ଭାରତୀ। ତେବେ ଭାରତୀ ଜନ୍ମ ହୁଅନ୍ତୁ ବୋଲି ତାଙ୍କ ମା’ କମଳା ସିଂହ ଚାହୁଁ ନ ଥିଲେ। ଜନ୍ମହେବା ପୂର୍ବରୁ ଭାରତୀଙ୍କ ମା’ ତାଙ୍କୁ ପେଟରୁ ମାରିଦେବାକୁ ଚାହୁଁଥିଲେ ବୋଲି ଭାରତୀ ଏକ ଇଣ୍ଟରଭ୍ୟୁରେ କହିଛନ୍ତି। ଏଥିପାଇଁ ସେ ବହୁ ଚେଷ୍ଟା ମଧ୍ୟ କରିଛନ୍ତି କିନ୍ତୁ ସଫଳ ହୋଇପାରିନାହାନ୍ତି। କାରଣ ସେହି ସମୟରେ ଆମେ ଦୁଇ ଓ ଆମର ଦୁଇର ସ୍ଲୋଗାନ ଚାଲିଥିଲା। ପୂର୍ବରୁ ତାଙ୍କର ୨ଭାଇ ଭଉଣୀ ଥିବା ବେଳେ ମା’ କମଳା ତାଙ୍କୁ ଜନ୍ମଦେବାକୁ ଚାହୁଁ ନ ଥିଲେ। କିନ୍ତୁ ଭଗବାନଙ୍କ ଦୟାରୁ ଶେଷରେ ସେ ଏହି ଦୁନିଆକୁ ଆସିଥିଲେ।
ହେଲେ ଏତିକିରେ ବି ତାଙ୍କ ଦୁଃଖ ଶେଷ ହୋଇ ନ ଥିଲା। ବହୁ ଛୋଟ ଥିବା ବେଳେ ଭାରତୀଙ୍କ ବାପାଙ୍କ ମୃତ୍ୟୁ ହୋଇଯାଇଥିଲା। ଏହାପରେ ମା’ କମଳା ହିଁ ତାଙ୍କର ଓ ୨ଭାଇ ଭଉଣୀଙ୍କର ଲାଲନ ପାଳନ କରିଥିଲେ। ଅମୃତଶରୁ ପାଠପଢ଼ା ଆରମ୍ଭ କରିଥିବା ଭାରତୀ ଇତିହାସରେ ସ୍ନାତକ କରିଛନ୍ତି। ଭାରତୀଙ୍କ ଜୀବନ ବହୁ ସଂଘର୍ଷମୟ ରହିଛି। ନିଜ ପରିଚୟ ତିଆରି କରିବା ପାଇଁ ତାଙ୍କୁ ବହୁ କଠିନ ପରିଶ୍ରମ ଓ ସଂଘର୍ଷ କରିବାକୁ ପଡ଼ିଛି। ଆଜିକା ଦିନରେ ଭାରତୀ ଜଣେ କମେଡି କୁଇନ ଭାବେ ବେଶ୍ ଜଣାଶୁଣା। ତେବେ ଭାରତୀ କେବଳ ଭଲ କମେଡିଆନ ନୁହଁନ୍ତି, ବରଂ ଜାତୀୟ ସ୍ତରର ଶୁଟର ମଧ୍ୟ। ଶୁଟିଂରେ ତାଙ୍କୁ ଗୋଲ୍ଡ ମେଡାଲ ମଧ୍ୟ ମିଳିସାରିଛି। ଅନ୍ୟପଟେ ତାଙ୍କ ବୈବାହିକ ଜୀବନ କଥା କହିବାକୁ ଗଲେ ୨୦୧୭ରେ ଭାରତୀ ଲେଖକ ହର୍ଷ ଲିମ୍ବୋଚିଆଙ୍କୁ ବିବାହ କରିଥିଲେ। ଅନ୍ୟପଟେ ଆଜି ଯେତେବେଳେ କୌଣସି ଆଓ୍ବାର୍ଡ ନେବାକୁ ଭାରତୀ ଷ୍ଟେଜ୍କୁ ଯାଆନ୍ତି, ସେହି ସମୟରେ ମା’ ଭାବବିହ୍ବଳ ହୋଇଯାଆନ୍ତି। ଆଉ କୁହନ୍ତି ତାଙ୍କଠାରୁ ବଡ଼ ପାପ ହେବାରୁ ରହିଗଲା ବୋଲି ଭାରତୀ କହିଛନ୍ତି।
