ନୂଆଦିଲ୍ଲୀ,୨୫।୫: ରେସଲର ସୁଶୀଲ କୁମାରଙ୍କ ସମସ୍ୟା ବଢିବାରେ ଲାଗିଛି। ହତ୍ୟା ମାମଲାରେ ଗିରଫ ହୋଇଥିବା ସୁଶୀଲଙ୍କୁ ଉତ୍ତର ରେଳବିଭାଗ ଦ୍ୱାରା ଚାକିରିରୁ ନିଲମ୍ବିତ କରାଯାଇଛି। ମଙ୍ଗଳବାର ଉତ୍ତର ରେଳବାଇର ସି.ଆର.ପି ଏନେଇ ସୂଚନା ଦେଇଛନ୍ତି।
ଦିଲ୍ଲୀ ସରକାରରେ ଡେପୁଟେସନରେ ଥିବା ସୁଶୀଲ କୁମାରଙ୍କୁ ଛତ୍ରସାଲ ଷ୍ଟାଡିୟମରେ ବିଦ୍ୟାଳୟ କ୍ରୀଡ଼ାକୁ ପ୍ରୋତ୍ସାହିତ କରିବା ପାଇଁ ସ୍ବତନ୍ତ୍ର ଡ୍ୟୁଟିରେ ଜଣେ ଅଧିକାରୀ ଭାବରେ ନିଯୁକ୍ତି ଦିଆଯାଇଥିଲା।
ଉତ୍ତର ରେଳବିଭାଗର ମୁଖ୍ୟ ଜନସମ୍ପର୍କ ଅଧିକାରୀ ଦୀପକ କୁମାର କହିଛନ୍ତି ଯେ, ରବିବାର ଦିନ ରେଳବାଇ ବୋର୍ଡ ସୁଶୀଲ କୁମାରଙ୍କ ସମ୍ପର୍କରେ ଦିଲ୍ଲୀ ସରକାରଙ୍କଠାରୁ ଏକ ରିପୋର୍ଟ ଗ୍ରହଣ କରିଛି। ଯେଉଁଥିରେ ସୁଶୀଲ କୁମାରଙ୍କ ବିରୋଧରେ ଦାଖଲ ହୋଇଥିବା ଏଫଆଇଆର ବିଷୟରେ ଉଲ୍ଲେଖ ରହିଛି। ସୂଚନାଯୋଗ୍ୟ, ୨୦୧୫ ମସିହାରୁ ସୁଶୀଲ କୁମାର ଜଣେ ରେଳ ଅଧିକାରୀ ଥିଲେ ଏବଂ ଦିଲ୍ଲୀ ସରକାରରେ ଡେପୁଟେସନରେ କାମ କରୁଥିଲେ। ଡେପୁଟେସନର ଅବଧି ୨୦୨୦ ପର୍ଯ୍ୟନ୍ତ ଥିଲା ଯାହାକୁ ସେ ବୃଦ୍ଧି କରିବାକୁ ଚାହୁଁଥିଲେ।
