ବାସୁଦେବପୁର, ୨୯।୬ (ଡି.ଏନ.ଏ.) – ଭଦ୍ରକ ଜିଲା ବାସୁଦେବପୁର ବ୍ଲକ ଅଧୀନ ସାନକୃଷ୍ଣପୁର ପଞ୍ଚାୟତ ତେନ୍ତୁଳିଆଡିଆ ଗ୍ରାମ ସମୁଦ୍ର ତଟବର୍ତ୍ତୀ ଅଞ୍ଚଳ। ଏହି ଗ୍ରାମବାସୀ ପାନୀୟ ଜଳ ପାଇଁ ହନ୍ତସନ୍ତ ହେଉଛନ୍ତି। ଏହି ଗ୍ରାମ ସଂଲଗ୍ନ ଅଞ୍ଚଳରେ ମଧୁର ପାନୀୟ ଜଳ ମିଳୁ ନ ଥିବାବେଳେ ଗ୍ରାମରେ ଥିବା ଏକମାତ୍ର ନଳକୂପରୁ ଲୁଣାପାଣି ବାହାରୁଛି। ଗ୍ରାମର ୩ ଶହରୁ ଊର୍ଦ୍ଧ୍ୱ ଲୋକ ପାନୀୟ ଜଳ ପାଇଁ ସଙ୍କଟରେ ପଡ଼ିଛନ୍ତି। ଲୁଣାପାଣି ବାହାରୁଥିବା ଗ୍ରାମରେ ନୂତନ ନଳକୂପ ବସାଯିବା ଦାବିରେ ୫୦ରୁ ଊର୍ଦ୍ଧ୍ୱ ମହିଳା ଶନିବାର ମଧ୍ୟାହ୍ନରେ ବିଡିଓଙ୍କୁ ଘେରିଥିଲେ। ତେନ୍ତୁଳିଆଡ଼ିଆ ଗ୍ରାମ ଏକ ସମୁଦ୍ର ତଟବର୍ତ୍ତୀ ଗ୍ରାମ ହୋଇଥିବାରୁ ପାନୀୟଜଳ ସହିତ ରାସ୍ତାଘାଟର ଦୁରବସ୍ଥା ସମସ୍ୟା ସମ୍ପର୍କରେ ସେମାନେ ବିଡିଓ ବୀରକିଶୋର ପାଣିଗ୍ରାହୀଙ୍କୁ ଅବଗତ କରାଇଛନ୍ତି। ଏହି ଗ୍ରାମରେ ପାନୀୟଜଳଜନିତ ସମସ୍ୟା ସମାଧାନ ଦିଗରେ ତୁରନ୍ତ ପଦକ୍ଷେପ ନିଆ ନ ଗଲେ ଆନ୍ଦୋଳନାତ୍ମକ ପଦକ୍ଷେପ ଗ୍ରହଣ କରିବେ ବୋଲି ଗ୍ରାମବାସୀ ଚେତାବନୀ ଦେଇଥିଲେ। ଖୁବ୍ଶୀଘ୍ର ଏହି ସମସ୍ୟା ସମାଧାନ ଦିଗରେ ପଦକ୍ଷେପ ନିଆଯିବ ବୋଲି ବିଡିଓ ବୀରକିଶୋର ପାଣିଗ୍ରାହୀ ପ୍ରତିଶ୍ରୁତି ଦେଇଛନ୍ତି।
ଏ ସମ୍ପର୍କରେ ଗ୍ରାମ୍ୟ ଜଳ ଯୋଗାଣ ବିଭାଗ ଯନ୍ତ୍ରୀ ଭରତ ସାହୁ କହିଛନ୍ତି, ଏହି ଅଞ୍ଚଳରେ ଏକ ନଳକୂପ ବସାଇବା ବ୍ୟୟବହୁଳ। ପଞ୍ଚାୟତ ଚାହିଁଲେ ତାଙ୍କ ଫଣ୍ଡରୁ ଏ ନେଇ ଅର୍ଥ ବରାଦ କରି ସମସ୍ୟାର ସମାଧାନ କରିପାରିବ। ସରପଞ୍ଚ ଗଦାଧର ନାୟକଙ୍କୁ ପଚାରିବାରୁ ପଞ୍ଚାୟତର ୪ଟି ନଳକୂପ ବସାଇବା ଲାଗି ସେ ଫଣ୍ଡରୁ ୧୪ ଲକ୍ଷ ଟଙ୍କା ଇସ୍ୟୁ କରିଥିବା ବେଳେ ଗ୍ରାମ୍ୟ ଜଳ ଯୋଗାଣ ବିଭାଗ ସହଯୋଗ କରୁ ନ ଥିବାରୁ ନୂତନ ନଳକୂପ ବସାଯାଇ ପାରୁନି ବୋଲି କହିଛନ୍ତି।
