କୁଚିଣ୍ଡା,୨୭ା୨: ବିବାହ ପ୍ରତିଶ୍ରୁତି ଦେଇ ପ୍ରେମିକ ଶାରୀରିକ ସମ୍ପର୍କ ରଖିବା ପରେ ଜଣେ ନାବାଳିକା ଗର୍ଭବତୀ ହୋଇଥିଲେ। ପରେ ନାବାଳିକା ବିବାହ ପାଇଁ ଜିଦି କରିଥିଲେ। ଏହି ପରିସ୍ଥିତିରେ ପ୍ରେମିକ ହୀରାକୁଦ ବୁଲିବା ବାହାନାରେ ଔଷଧ ଦେଇ ନାବାଳିକାଙ୍କ ଗର୍ଭ ନଷ୍ଟ କରିଥିଲେ। ପରେ ପ୍ରେମିକ ଦୂରେଇ ଯିବାକୁ ଚେଷ୍ଟା କରିବାରୁ ନାବାଳିକା ଅସହାୟ ହୋଇ ପଡ଼ିଥିଲେ। ଶେଷରେ ସେ ଏକ ସ୍ବେଚ୍ଛାସେବୀ ସଙ୍ଗଠନ ସହାୟତାରେ ଥାନାରେ ଅଭିଯୋଗ କରିବା ପରେ ପୋଲିସ ଶନିବାର ଏହି ଘଟଣାରେ ସମ୍ପୃକ୍ତ ୩ ଅଭିଯୁକ୍ତଙ୍କୁ ଗିରଫ କରିଛି। ସମ୍ବଲପୁର ଜିଲା କୁଚିଣ୍ଡା ଥାନା ଅଞ୍ଚଳରେ ଏହି ଘଟଣା ଚର୍ଚ୍ଚାର ବିଷୟ ହୋଇଛି। ପୋଲିସ ସୂଚନା ଅନୁଯାୟୀ, ସମ୍ବଲପୁର ଏସ୍ଆର୍ଆଇଟି କଲୋନୀର ବିଜୟ ପ୍ରସାଦ କୁଚିଣ୍ଡା ଏନ୍ଏସି ୭ନଂ. ୱାର୍ଡ ପାଦ୍ରିପଡାରେ ଏକ ଭଡ଼ାଘରେ ରହନ୍ତି। ତାଙ୍କ ସହ ନାବାଳିକାଙ୍କ ଦେଖାସାକ୍ଷାତ୍ ପରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା। ବିବାହ କରିବାକୁ କହି ବିଜୟ ନାବାଳିକାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ଗର୍ଭବତୀ ହେବା ଜାଣିବା ପରେ ବିଜୟ ଯୋଜନା କରି ନାବାଳିକାଙ୍କୁ ହୀରାକୁଦ ବୁଲାଇବାକୁ ନେଇ ଔଷଧ ଖାଇବାକୁ ଦେଇଥିଲେ। ଗର୍ଭ ନଷ୍ଟହେବା ପରେ ସେ ତାଙ୍କୁ କୁଚିଣ୍ଡା ଆଣି ଛାଡ଼ି ଚାଲିଯାଇଥିଲେ। ଭୟରେ ନାବାଳିକା ଘରକୁ ନ ଯାଇ ପାଦ୍ରିପଡ଼ାରେ ଭଡ଼ାରେ ରହୁଥିବା ଜଣେ ସାଙ୍ଗ ଘରେ ରହିଥିଲେ। ସାଙ୍ଗର ମା’ ବିଜୟଙ୍କ ସହ ବିବାହ କରାଇଦେବାକୁ ନାବାଳିକାଙ୍କୁ ପ୍ରତିଶ୍ରୁତି ଦେଇଥିଲେ। ଏଥିପାଇଁ ସେ ବିଜୟଙ୍କଠାରୁ ୧୦ ହଜାର ଟଙ୍କା ନେଇଥିବା ବିଜୟ ସ୍ବୀକାର କରିଛନ୍ତି। ଏହା ଏକ ଚକ୍ରାନ୍ତ ବୋଲି ଜାଣିପାରି ନାବାଳିକା କୌଶଳକ୍ରମେ ସୁଜାତାଙ୍କ ପାଖରୁ ଖସିଆସି ଜଣେ ମହିଳା ଟେଲରଙ୍କୁ ସବୁକଥା କହିଥିଲେ। ମହିଳା ଟେଲର ଏକ ସ୍ବେଚ୍ଛାସେବୀ ସଙ୍ଗଠନ ମାଧ୍ୟମରେ କୁଚିଣ୍ଡା ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ପାଦ୍ରିପଡା ଭଡ଼ାଘରୁ ପୋଲିସ ସୁଜାତା, ବିଜୟ ପ୍ରସାଦ ଓ ରାଜିନ ପଧାନଙ୍କୁ ଗିରଫ କରି କୁଚିଣ୍ଡା ଡାକ୍ତରଖାନାରେ ଡାକ୍ତରୀ ମାଇନା ପରେ କୋର୍ଟ ଚାଲାଣ କରିଛି। ଅନ୍ୟପକ୍ଷେ ନାବାଳିକାଙ୍କୁ ଡାକ୍ତରୀ ପରୀକ୍ଷା ପାଇଁ ସମ୍ବଲପୁର ପଠାଯାଇଛି। ଏମାନଙ୍କ ନାମରେ କୁଚିଣ୍ଡା ଥାନାରେ ଦଫା ୩୭୬ (୨ଏମ୍), ୩୭୬ (୩), ୩୧୩, ୫୦୬ରେ ଏକ ମାମଲା (ନଂ.୪୪/୨୧) ରୁଜୁ ହୋଇଛି।
