ବଇଣ୍ଡା,୨୭।୬(ଡି.ଏନ.ଏ.)-କିଶୋରନଗର ବ୍ଲକ ଉରୁକୁଳା ପଞ୍ଚାୟତ ସେରେଣ୍ଡା ଓ କୋଡ଼ାସାହିରେ ଲାଗିଥିବା ୨ଟି ୧୦ କେଭି ଟ୍ରାନ୍ସଫର୍ମର ୨ ମାସ ହେବ ପୋଡ଼ିଯାଇଛି। ନୂତନ ଟ୍ରାନ୍ସଫର୍ମର ଲଗାଇବା ପାଇଁ ଗ୍ରାମବାସୀ ବହୁବାର ସେସୁ କାର୍ଯ୍ୟାଳୟଠାରେ ଅଭିଯୋଗ କଲେ ମଧ୍ୟ ଲଗାଯାଉ ନ ଥିବା ଯୋଗୁ ଅସନ୍ତୋଷ ଦେଖାଦେଇଛି। ଏହାର ପ୍ରତିବାଦରେ ଗୁରୁବାର ସେରେଣ୍ଡା ଗ୍ରାମବାସୀ ବଇଣ୍ଡା ସେସୁ ଏସଡ଼ିଓ କାର୍ଯ୍ୟାଳୟ ଘେରାଉ କରି ବିକ୍ଷୋଭ ପ୍ରଦର୍ଶନ କରିଥିଲେ। ଅପରପକ୍ଷେ ବିଭାଗୀୟ ଅଧିକାରୀଙ୍କ ଅନୁପସ୍ଥିତ ଯୋଗୁ ସେଠାରେ ଉତ୍ତେଜନା ଦେଖାଦେଇଥିଲା।
ଗ୍ରାମବାସୀ କହିଛନ୍ତି, ସେରେଣ୍ଡା ଓ କୋଡାସାହିକୁ ବିଦ୍ୟୁତ୍ ଯୋଗାଣ ପାଇଁ ସରକାରଙ୍କ ବିଜୁ ଜ୍ୟୋତି ଯୋଜନାରେ ୧୦ କେଭିର ୨ଟି ଟ୍ରାନ୍ସଫର୍ମର ଲଗାଯାଇଥିଲା। ହେଲେ ଏପ୍ରିଲରେ ବଜ୍ରପାତ ଯୋଗୁ ୨ଟି ଟ୍ରାନ୍ସଫର୍ମର ପୋଡ଼ିଯାଇଛି। ଏହି ୨ ଗ୍ରାମରେ ୮୦ରୁ ଊର୍ଦ୍ଧ୍ୱ ଉପଭୋକ୍ତା ଥିବାବେଳେ ଏବେ ଅନ୍ଧାରରେ ଦିନ କାଟୁଛନ୍ତି। ଅସହ୍ୟ ଗୁଳୁଗୁଳି ସଙ୍ଗକୁ ବିଦ୍ୟୁତ୍ କାଟ ଯୋଗୁ ଗ୍ରାମବାସୀ ନାହିଁ ନ ଥିବା ଅସୁବିଧା ସମ୍ମୁଖୀନ ହେଉଛନ୍ତି। ସମସ୍ତେ ବିଦ୍ୟୁତ୍ ବିଲ ପଇଠ କରିସାରିଥିଲେ ମଧ୍ୟ ଟ୍ରନ୍ସଫର୍ମର ଲଗାଯାଇ ପାରୁନାହିଁ। ସା ହେଲେ ପାଠପଢା ଠପ ହୋଇଯାଉଛି। ଅନ୍ୟପକ୍ଷରେ ବିଦ୍ୟୁତ୍ ବିଭାଗର କର୍ମଚାରୀମାନେ ୧୦ ହଜାର ଟଙ୍କା ଦେଲେ ନୂତନ ଟ୍ରନ୍ସଫର୍ମର ଲଗାଯିବ ବୋଲି କହୁଥିବା ଗ୍ରାମବାସୀ ଅଭିଯୋଗ କରିଛନ୍ତି। ଦୀର୍ଘ ୨ ଘଣ୍ଟା ସେସୁ ଏସଡ଼ିଓ କାର୍ଯ୍ୟାଳୟକୁ ଘେରାଉ କରିଥିବାବେଳେ କୌଣସି ବିଭାଗୀୟ ଅଧିକାରୀଙ୍କ ଦେଖା ନ ମିଳିବାରୁ ଅସନ୍ତୋଷ ଦେଖାଦେଇଥିଲା। ତୁରନ୍ତ ୨ଟି ନୂତନ ଟ୍ରନ୍ସଫର୍ମର ଲଗା ନ ଗଲେ ବଇଣ୍ଡାଠାରେ ୫୫ ନଂ. ଜାତୀୟ ରାଜପଥ ଅବରୋଧ କରି ଆନ୍ଦୋଳନ କରାଯିବ ବୋଲି ଜିଲା ପରିଷଦ ବଂଶୀଧର ସେଠୀ, ମକୁଳ ମାଝୀ, ପଞ୍ଚାନନ ବେହେରା, ସନ୍ତୋଷ ଦେହୁରୀ, ଈଶ୍ୱର ବେହେରା, କିରଣବାଳା ପ୍ରଧାନ, ବୁଧେଇ ସାହୁ, ଅମିତା ଦେହୁରୀ, ନମିତା ପାତ୍ର ପ୍ରମୁଖ ଚେତାବନୀ ଦେଇଛନ୍ତି। ଏ ନେଇ ବାମୁର ସେସୁ କନିଷ୍ଠ ଯନ୍ତ୍ରୀ ଉମାକାନ୍ତ ବେହେରା କହିଛନ୍ତି, ବିଭାଗ ପକ୍ଷରୁ ତୁରନ୍ତ ଦୃଷ୍ଟି ଦିଆଯାଇ ସୋମବାର ମଧ୍ୟରେ ୨ଟି ନୂତନ ଟ୍ରାନ୍ସଫର୍ମର ଲଗାଇବାକୁ ଉଦ୍ୟମ କରାଯାଉଛି। ବଇଣ୍ଡା ସେସୁ ଏସ୍ଡିଓ ମୋହନ ନାୟକଙ୍କୁ ଯୋଗାଯୋଗ କରିଥିଲେ ମଧ୍ୟ ସମ୍ଭବ ହୋଇପାରି ନ ଥିଲା।(ଫଟୋ-)
