ଶାରଜା,୫।୧୧(ପି.ଟି.): ଏବେ ସୁସ୍ଥ ଅଛି ଓ ହାର୍ମଷ୍ଟ୍ରିଙ୍ଗ୍ ଇଞ୍ଜୁରି ମଧ୍ୟ ସମ୍ପୂର୍ଣ୍ଣ ରୂପେ ଭଲ ଅଛି ବୋଲି ଭାରତୀୟ ତାରକା ଓପନର ରୋହିତ ଶର୍ମା କହିଛନ୍ତି। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଇଞ୍ଜୁରି କାରଣରୁ ସେ ୨ ସପ୍ତାହ ଖେଳି ନ ଥିଲେ। ତେବେ ସେ ପ୍ରତ୍ୟାବର୍ତ୍ତନ କରି ପୁଣି ଥରେ ନେତୃତ୍ୱ ନେବା ସହ ମୁମ୍ବାଇ ଇଣ୍ଡିଆନ୍ସର ମଙ୍ଗ ଧରିଛନ୍ତି। ଦୁଇ ସପ୍ତାହ ଆଇପିଏଲ୍ ନ ଖେଳିବା ତାଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇଥିଲା। ତାଙ୍କୁ ଅଷ୍ଟ୍ରେଲିଆ ଗସ୍ତ ପାଇଁ ଭାରତୀୟ ଦଳରେ ସାମିଲ କରାଯାଇ ନ ଥିଲା। ଗତ ମ୍ୟାଚ୍ରେ ସେ ସନରାଇଜର୍ସ ହାଇଦ୍ରାବଦ୍ ବିପକ୍ଷରେ ମାତ୍ର ୭ଟି ବଲ୍ ଖେଳିଥିଲେ। ମୁମ୍ବାଇ ଏହି ମ୍ୟାଚ୍ରେ ୧୦ ଉଇକେଟରେ ପରାସ୍ତ ହୋଇଥିଲା।
ପ୍ରତ୍ୟାବର୍ତ୍ତନ କରିଥିତ୍ବାରୁ ବେଶ୍ ଖୁସି ଅଛି। ଆଗକୁ କେତୋଟି ମ୍ୟାଚ୍ ଖେଳିବି ବୋଲି ଲକ୍ଷ୍ୟ ରଖିଛି। ହାମଷ୍ଟ୍ରିଙ୍ଗ୍ ଇଞ୍ଜୁରି ପୂରା ଭଲ ଅଛି ଓ ପୂରା ସୁସ୍ଥ ଅଛି ବୋଲି ରୋହିତ ମ୍ୟାଚ୍ ପରେ କହିଛନ୍ତି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଅଧ୍ୟକ୍ଷ ତାଙ୍କୁ ଇଞ୍ଜୁରିରୁ ପ୍ରତ୍ୟାବର୍ତ୍ତନ ନ କରିବାକୁ ସେତେଟା ବ୍ୟଗ୍ର ନ ହେବ ପାଇଁ ପରାମର୍ଶ ଦେଇଥିଲେ। ସେତେବେଳକୁ ସେ ୪ଟି ଆଇପିଏଲ୍ ମ୍ୟାଚ୍ ଖେଳି ନ ଥିଲେ। ଏହି ଇଞ୍ଜୁରି କାରଣରୁ ଭାରତୀୟ ଚୟନକର୍ତ୍ତାମାନେ ରୋହିତଙ୍କୁ ଅଷ୍ଟ୍ରେଲିଆ ଗସ୍ତ ପାଇଁ ଦଳରେ ସାମିଲ କରି ନ ଥିଲେ। ଏବେ ସେ ପ୍ରତ୍ୟାବର୍ତ୍ତନ କରି ନିଜ ଫିଟ୍ନେସର ପ୍ରମାଣ ଦେଇଛନ୍ତି। ରୋହିତ ବାମ ଗୋଡରେ ହାମଷ୍ଟ୍ରିଙ୍ଗ ଇଞ୍ଜୁରିର ଶିକାର ହୋଇଥିଲେ ବୋଲି ମୁମ୍ବାଇ ଇଣ୍ଡିଆନ୍ସ ଟିମ ମ୍ୟାନେଜମେଣ୍ଟ କହିଛି। ଅକ୍ଟୋବର ୧୮ ତାରିଖରେ ସେ କିଙ୍ଗ୍ସ ଇଲେଭେନ ପଞ୍ଜାବ ବିପକ୍ଷ ମ୍ୟାଚ୍ରେ ଆହତ ହୋଇଥିଲେ। ଅନ୍ତିମ ଲିଗ୍ ମ୍ୟାଚ୍ରେ ହାଇଦ୍ରାବାଦଠାରୁ ମୁମ୍ବାଇ ଲଜ୍ଜାଜନକ ଭାବେ ପରାସ୍ତ ହୋଇଥିଲା। ତେବେ ଏହି ପରାଜୟକୁ ଭୁଲି ଆମେ ଗୁରୁବାର ଖେଳାଯିବାକୁ ଥିବା ଦିଲ୍ଲୀ କ୍ୟାପିଟାଲ୍ସ ବିପକ୍ଷ କ୍ୱାଲିଫାୟର- ୧ ମୁକାବିଲା ଉପରେ ଫୋକସ କରୁଛୁ ବୋଲି ରୋହିତ କହିଛନ୍ତି। ଏହି ମ୍ୟାଚ୍ରେ ମୁମ୍ବାଇ ଦୁଇ ତାରକା ବୋଲର ଯଶପ୍ରୀତ ବୁମ୍ରା ଓ ଟ୍ରେଣ୍ଟ ବୋଲ୍ଟଙ୍କୁ ବିଶ୍ରାମ ଦେଇଥିଲା। ଗତ ଦୁଇଟି ମ୍ୟାଚ୍ ଖେଳି ନ ଥିବା ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ଫିଟ୍ନେସ୍ ଠିକ ଅଛି। ତାଙ୍କୁ ବିଶ୍ରାମ ଦେଇ ଅନ୍ୟମାନଙ୍କୁ ସୁଯୋଗ ଦେବା ଅମର ଲକ୍ଷ୍ୟ ରହିଥିଲା। ପ୍ଲେ- ଅଫ୍ ଖେଳିବାକୁ ସେ ପ୍ରସ୍ତୁତ ହୋଇଥିବେ ବୋଲି ସେ ଆଶାପ୍ରକାଶ କରିଛନ୍ତି। ଦିଲ୍ଲୀ ଏକ କ୍ୱାଲିଟି ଦଳ ହୋଇଥିବାରୁ ଆମ ସମ୍ମୁଖରେ ବଡ଼ ଚ୍ୟାଲେଞ୍ଜ ରହିଛି। ତେବେ ଆମେ ପ୍ଲେ-ଅଫ୍ରେ ଭଲ ପ୍ରଦର୍ଶନ କରିବାକୁ ପ୍ରୟାସ କରିବୁ ବୋଲି ରୋହିତ କହିଛନ୍ତି।
