ଦିଗପହଣ୍ଡି,୧୭ା୪(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ସାହାସପୁର ଗ୍ରାମର କେ.ରକି ଦୋରା(୨୪) ଯୁକ୍ତ ୩ (ସ୍ନାତକ) ପାସ କରିବା ପରେ ଗତ ୨୦୨୩ରୁ ଦିଗପହଣ୍ଡି ପୋଷ୍ଟ ଅଫିସରେ ଗ୍ରାମୀଣ ଡାକ ସେବକ(ଜିଡିଏସ) ଭାବେ କାର୍ଯ୍ୟ କରୁଛନ୍ତି। ଗତ ୨୦୧୪ରେ ତାଙ୍କ ଆଧାରକାର୍ଡ କରାଯାଇଥିଲା। ଚାକିରିରେ ନିଯୁକ୍ତି ପରେ ପୋଷ୍ଟ ଅଫିସରେ ସେ ଶିଶୁମାନଙ୍କ ଆଧାର କାର୍ଡ ପ୍ରସ୍ତୁତ ପାଇଁ ତାଙ୍କୁ ବିଭାଗ ପକ୍ଷରୁ ଆଇ.ଡି ଓ ପାସଓ୍ବାର୍ଡ ଦିଆଯାଇଥିଲା। ସେ ସମସ୍ତ ଆଧାରକାର୍ଡ ହିତାଧିକାରୀଙ୍କ ଆଧାର ସହ ମୋବାଇଲ ଲିଙ୍କ୍ ପାଇଁ କାର୍ଯ୍ୟ ମଧ୍ୟ କରୁଥିଲେ। ସେ ଜୀବିତ ଥିଲେ ମଧ୍ୟ ତାଙ୍କ ଆଧାରକାର୍ଡ ତଥ୍ୟରେ ତାଙ୍କୁ ମୃତ ବୋଲି ଦର୍ଶାଯାଇଛି। ଗତ ୨୦୨୫ ଡିସେମ୍ବର ୩୦ରେ ସେ ତାଙ୍କ ଆଧାରକାର୍ଡ ଅପଡେଟ କରିବା ପରେ ଏନେଇ ସୂଚନା ପାଇବା ପରେ ହଡ଼ବଡ଼େଇ ଯାଇଥିଲେ। ବ୍ୟତିବ୍ୟସ୍ତ ଭାବେ ସେ ଭୁବନେଶ୍ୱରସ୍ଥିତ ଆଧାରକାର୍ଡ ଆଞ୍ଚଳିକ କାର୍ଯ୍ୟାଳୟ ସହ ଫୋନ୍ ଯୋଗେ ଯୋଗାଯୋଗ କରିଥିଲେ। ଦାୟିତ୍ୱରେ ଥିବା ସମ୍ପୃକ୍ତ ଅଧିକାରୀ ତାଙ୍କୁ ସ୍କୁଲ ସାର୍ଟିଫିକେଟ ଓ ଅନ୍ୟାନ୍ୟ ପ୍ରମାଣପତ୍ର ନେଇ ଭୁବନେଶ୍ୱର କାର୍ଯ୍ୟାଳୟକୁ ଆସି ଦରଖାସ୍ତ କରିବା ସହ ଦେଖାକରିବାକୁ କହିଥିଲେ। ରକି ତାଙ୍କ ସମସ୍ତ ପ୍ରମାଣପତ୍ର ସାଙ୍ଗରେ ନେଇ ଭୁବନେଶ୍ବର ଯାଇଥିଲେ। ସେଠାରେ ସମ୍ପୃକ୍ତ ଅଧିକାରୀ ତାଙ୍କ ପାନ୍ କାର୍ଡ, ଭୋଟର କାର୍ଡ ନେଇ ଆଧାରକାର୍ଡ ସଂଶୋଧନ କରି ଅପଡେଟ୍ କରିଥିଲେ। ସେ ଗାଁ କୁ ଫେରିବା ପରେ ପୁଣି ଆଧାର ପୋର୍ଟାଲରେ ସର୍ଚ୍ଚ କରିବାରୁ ତାଙ୍କୁ ମୃତ ଦର୍ଶାଯାଇଥିଲା। ରକି ଅଫିସରୁ ଛୁଟି ନେଇ ପୁଣି ଭୁବନେଶ୍ୱର ଆଧାରକାର୍ଡ କାର୍ଯ୍ୟାଳୟକୁ ଦୌଡ଼ିଥିଲେ।କର୍ତ୍ତୃପକ୍ଷ ପୁଣିଥରେ ସଂଶୋଧନ କରି ତାଙ୍କୁ ଘରକୁ ଫେରିଯିବାକୁ କହିଥିଲେ। ସେ ଘରକୁ ଫେରି ପୁଣିଥରେ ଆଧାର ପୋର୍ଟାଲରେ ସର୍ଚ୍ଚ କରିବାରୁ ପୂର୍ବବତ୍ ତାଙ୍କୁ ମୃତ ଦର୍ଶାଯାଇଥିବା ଦେଖିଥିଲେ।
ପରେ ସେ ଏନେଇ ସୂଚନା ଅଧିକାର ଆଇନ ଅନୁସାରେ ତଥ୍ୟ ମାଗିଥିଲେ ମଧ୍ୟ କୌଣସି ସନ୍ତୋଷଜନକ ତଥ୍ୟ ଦିଆଯାଉ ନ ଥିବା ନେଇ ଅଭିଯୋଗ କରିଛନ୍ତି। ଗତ ୪ ମାସ ମଧ୍ୟରେ ସେ ମାନସିକ ସ୍ତରରେ ବ୍ୟତିବ୍ୟସ୍ତ ହୋଇ ଭୁବନେଶ୍ୱର ଆଧାରକାର୍ଡ ଆଞ୍ଚଳିକ କାର୍ଯ୍ୟାଳୟକୁ ଦୌଡ଼ିଦୌଡ଼ି ନୟାନ୍ତ ହେଲେଣି ବୋଲି କହିଛନ୍ତି। ଏନେଇ ଭୁବନେଶ୍ୱର ଆଧାରକାର୍ଡ ଆଞ୍ଚଳିକ କାର୍ଯ୍ୟାଳୟ ଅଧିକାରୀଙ୍କ ସହ ଯୋଗାଯୋଗ ପାଇଁ ଚେଷ୍ଟା କରାଯାଇଥିଲେ ମଧ୍ୟ ତାହା ସମ୍ଭବପର ହୋଇପାରିନାହିଁ।
