କେନ୍ଦୁଝର, ୩।୧୧(ସ୍ବ.ପ୍ର.)-କରୋନା ମହାମାରୀ ଯୋଗୁ ଅନେକଙ୍କ ଜୀବନ ଜୀବିକା ପ୍ରଭାବିତ ହୋଇଛି ା ବିଶେଷ କରି ପାର୍ବଣ ଋତୁରେ କାରିଗରମାନେ ମୂର୍ତ୍ତି ଗଢି ଯାହା ରୋଜଗାର କରନ୍ତି ସେଥିରେ ବର୍ଷ ତମାମ ପରିବାର ଚଳାଇଥାନ୍ତି। ତେବେ ଚଳିତବର୍ଷ ରୋଜଗାର ଉପରେ କରୋନା ଛାଟ ସାଙ୍ଗକୁ ମହଙ୍ଗା ଦରଦାମ ସେମାନଙ୍କ ଜୀବନଜୀବିକାକୁ ବିପନ୍ନ କରିଦେଇଛି ା ଏଭଳି ଜଣେ କ୍ଷତିଗ୍ରସ୍ତ ହୋଇଥିବା ଯୁବ କାରିଗର ହେଲେ ମନୋଜ କୁମାର ସ୍ବାଇଁ ା ତାଙ୍କ ଘର ସଦର ବ୍ଲକ ମୁକୁନା ଗ୍ରାମରେ। କେନ୍ଦୁଝର ସହର କଲେଜରୋଡରେ ମୂର୍ତ୍ତି ଗଢିବା ପାଇଁ ଦୀର୍ଘବର୍ଷ ହେଲା ବର୍ଷକୁ ୨୫ ହଜାର ଟଙ୍କା ଭଡ଼ାରେ ଏକ ଘର ନେଇ ଏହି ମୂର୍ତ୍ତି ଗଢିବା କାମ କରିଆସୁ ଥିବା ସେ କହିଛନ୍ତି।
କାଠ ମେଢ଼ରେ କୁଟା ଓ ମାଟି କାଦୁଅରେ ମୂର୍ତ୍ତି ଗଢ଼ନ୍ତି। ଚଳିତ ବର୍ଷ ମାତ୍ର ୧୨ଟି ଗଣେଶ ମୂର୍ତ୍ତି ନିର୍ମାଣ କରିଛନ୍ତି। ପୂର୍ବ ବର୍ଷ ପାଖାପାଖି ୬୦ରୁ ଅଧିକ ମୂର୍ତ୍ତି ନିର୍ମାଣ କରି ବିକିଥିଲେ। କଟକଣା ଯୋଗୁ ମୂର୍ତ୍ତିର ଉଚ୍ଚତା କମିଲା। ଏଣୁ ଅଧିକ ମୂର୍ତ୍ତି ବିକ୍ରି ହେଉନାହିଁ କିମ୍ବା ସେହିଭଳି ମୂଲ୍ୟ ମିଳୁନାହିଁ। ସବୁ ପୂଜାରେ ମାନ୍ଦାବସ୍ଥା। ଏଣୁ ଗଢ଼ା ମଜୁରି ମଧ୍ୟ ଉଠୁନାହିଁ। ଦୀର୍ଘ ୧୦ ବର୍ଷ ହେଲା ଏହି ମୂର୍ତ୍ତି ଗଢ଼ିବା କାମରେ ନିୟୋଜିତ ମନୋଜ ା ଏଥିରୁ ଯାହା ରୋଜଗାର ହୁଏ ସେଥିରେ ସଂସାର ଚଳେ। ଯୁକ୍ତ ଦୁଇ ପାଠ ପଡ଼ିବା ପରେ କିଏ ଶିକ୍ଷକ ହେବ ତ କିଏ ଡାକ୍ତର ହେବ ବା ଇଞ୍ଜିନିୟର ଏଭଳି ଆଶା ରଖିଥିବା ବେଳେ କଳାପ୍ରତି ପିଲାଦିନରୁ ରହିଆସିଥିବା ଦୁର୍ବଳତାରୁ ମୂର୍ତ୍ତିକାର ଭାବରେ ନିଜକୁ ପ୍ରତିଷ୍ଠିତ କରିପାରିଛନ୍ତି ା ତାଙ୍କର କେହି ଗୁରୁ ନାହାନ୍ତି। ପିଲାଦିନରୁ ମାଟି ଓ ରଙ୍ଗ ତୂଳୀ ଧରି ନିଜେ ଶିଖିଥିବା କୁହନ୍ତି ା
ଛାଞ୍ଚ ମୂର୍ତ୍ତି ସେ କରନ୍ତି ନାହିଁ ା ଚଳିତ ବର୍ଷ ୧୫ ଶହରୁ ୧୫ ହଜାର ଟଙ୍କାରେ ମୂର୍ତ୍ତି ନିର୍ମାଣ କରିଥିବା କୁହନ୍ତି ା ଆଗରୁ ଦୁଇ/ତିନି ଗୁଣାରେ ବିକ୍ରି କରୁଥିଲି। କଳାର ମୂଲ୍ୟ କେହି ଦେଇ ପାରିବେ ନାହିଁ। ପରିଶ୍ରମ ଓ ଖର୍ଚ୍ଚକୁ ହିସାବ କଲେ ସେଭଳି ଲାଭ ମିଳେ ନାହିଁ କିନ୍ତୁ କଳା ପ୍ରତି ଦୁର୍ବଳତା ପାଇଁ କାମ କରିବାକୁ ଖୁସି ଲାଗେ ବୋଲି ମନୋଜ କହିଛନ୍ତି। ବର୍ଷର ଅନ୍ୟ ସମୟରେ ଗାଁରେ ଗ୍ରସୋରି ଦୋକାନ କରି ରୋଜଗାର କରିଥାଏ। ତାଙ୍କ ଅନୁପସ୍ଥିତିରେ ତାଙ୍କ ମା’ ଏହି ଦୋକାନ ଚଳାନ୍ତି। ଘରେ ତାଙ୍କର ସ୍ତ୍ରୀ ଓ ଗୋଟିଏ ପୁଅ ଅଛନ୍ତି ବୋଲି ସେ କହିଛନ୍ତି।
