ପୁରୀ ଅଫିସ,୨୮ା୧୦: ବ୍ଲୁ ଫ୍ଲାଗ୍ ବିଚ୍ ସମୁଦ୍ରରେ ଗାଧୋଉଥିବା ବେଳେ ମଙ୍ଗଳବାର ଜଣେ ଛାତ୍ର ଭାସିଯାଇଥିଲେ। ଘଟଣାର ୨୪ ଘଣ୍ଟା ପରେ ତାଙ୍କ ମୃତଦେହ ବୁଧବାର ହୋଟେଲ ପିଙ୍କ ହାଉସ ପଛପଟ ସମୁଦ୍ରରେ ଭାସୁଥିବା ବେଳେ ଉଦ୍ଧାର ହୋଇଛି। ସେ ହେଲେ ଝାଡ଼ଖଣ୍ଡ ରାଜ୍ୟର ତନୀଷ ବିନୟ (୧୬)।
ସୂଚନାଯୋଗ୍ୟ, ତନୀଷ ଯୁକ୍ତ ୨ରେ ପାଠ ପଢୁଥିଲେ। ମା’, ବାପା ଓ ପରିବାରର ଅନ୍ୟ ସଦସ୍ୟଙ୍କ ସହ ସେ ପୁରୀ ବୁଲିବାକୁ ଆସିଥିଲେ। ମଙ୍ଗଳବାର ପୂର୍ବାହ୍ନରେ ବ୍ଲୁ ଫ୍ଲାଗ ବିଚ୍ ବୁଲିବାକୁ ଯାଇଥିଲେ। ଏହି ସମୟରେ ତନୀଷ ସମୁଦ୍ରରେ ସ୍ନାନ କରୁଥିଲେ। ମାତ୍ର ହଠାତ୍ ସେ ଭାସି ଯାଇଥିଲେ। ତାଙ୍କ ସମ୍ପର୍କୀୟ ପାଟି କରିବାରୁ ଲାଇଫ୍ଗାର୍ଡ ଉଦ୍ଧାର ପାଇଁ ଚେଷ୍ଟା କରିଥିଲେ ମଧ୍ୟ ସଫଳ ହୋଇ ନ ଥିଲେ। ମଧ୍ୟାହ୍ନ ପ୍ରାୟ ୧୨ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଅଗ୍ନିଶମବାହିନୀର ଗୋଟିଏ ଟିମ୍ ଖୋଜାଖୋଜି କରିଥିଲେ। ନୂଆନଈଠାରୁ ହୋଟେଲ ଷ୍ଟର୍ଲିଂ ପର୍ଯ୍ୟନ୍ତ ସମୁଦ୍ରରେ ଖୋଜାଖୋଜି କରିଥିଲେ ମଧ୍ୟ ତନୀଷଙ୍କର କୌଣସି ସନ୍ଧାନ ପାଇ ନ ଥିଲେ। ପୁନଶ୍ଚ ବୁଧବାର ସକାଳୁ ଖୋଜା ଯାଇଥିଲା।
