ବନ୍ତଳା, ୧୨ା୧୦ (ଡି.ଏନ୍.ଏ.): ଶିଳ୍ପାୟନରେ ଆଗୁଆ ଅନୁଗୋଳ। ରାଜ୍ୟର ସର୍ବାଧିକ ରାଜସ୍ବ ମଧ୍ୟ ଆଦାୟ ହେଉଛି ଏହି ଜିଲାରୁ। ହେଲେ ଜିଲାରେ ଏମିତି ବି ଗଁା ଅଛି ଯେଉଁଠି ଯାତାୟାତ ପାଇଁ ଲୋକଙ୍କୁ ଜଙ୍ଗଲରୁ କାଠ କାଟି ପଙ୍କ କାଦୁଅ ରାସ୍ତା ଉପରେ ବିଛାଇବାକୁ ପଡ଼ୁଛି। ବର୍ଷ ବର୍ଷ ଧରି ସରକାରୀ ଯୋଜନାରେ ସଡ଼କଟିଏ ପାଇଁ ଦାବି କରି ନିରାଶ ହେବା ପରେ ନିଜ ସମସ୍ୟାର ସମାଧାନ ନିମନ୍ତେ ଲୋକଙ୍କୁ ଏପରି ଭିନ୍ନ ପନ୍ଥା ଆପଣାଇବାକୁ ପଡ଼ିଛି। ରବିବାର ଏପରି ଦୃଶ୍ୟ ଦେଖିବାକୁ ମିଳିଛି ଅନୁଗୋଳ ବ୍ଲକ ସାତକୋଶିଆ ଅଭୟାରଣ୍ୟ ମଧ୍ୟରେ ଥିବା କୋଠଭୂଇଁ ପଞ୍ଚାୟତର ସଂକ୍ରିଡ଼ା ଗ୍ରାମରେ।
ଜଙ୍ଗଲ ଅଧ୍ୟୁଷିତ ଗ୍ରାମ ସଂକ୍ରିଡ଼ାର ଲୋକ ସଂଖ୍ୟା ପ୍ରାୟ ୩୫୦। ହେଲେ ଯାତାୟାତ ପାଇଁ ଭଲ ରାସ୍ତାଟିଏ ନାହିଁ। ଫଳରେ ବର୍ଷ ବର୍ଷ ହେଲା ହନ୍ତସନ୍ତ ହେଉଛନ୍ତି ଗ୍ରାମବାସୀ। ବିଶେଷକରି ବର୍ଷାଦିନେ ପଞ୍ଚାୟତ ମୁଖ୍ୟାଳୟଠାରୁ ଗ୍ରାମକୁ ଲମ୍ବିଥିବା ୬ କିଲୋମିଟର ରାସ୍ତାର ପଙ୍କୁଆ ମାଟିରେ ଚାଲିକରି ଯିବା ଅତି କଷ୍ଟକର ହୋଇପଡ଼ୁଛି। ଅନେକ ସ୍ଥାନରେ ଆଣ୍ଠୁଏ ଲେଖାଏ କାଦୁଅ ରହୁଛି। ଏ ନେଇ ବାରମ୍ବାର ଦାବି ପରେ ପୂର୍ତ୍ତ ବିଭାଗ ପକ୍ଷରୁ ପଦକ୍ଷେପ ନିଆଯାଇଥିଲା। ଟେଣ୍ଡର ମଧ୍ୟ କରାଯାଇଥିଲା। କିନ୍ତୁ ଦାୟିତ୍ୱ ନେଇଥିବା ଠିକାଦାର ଦେଢ଼ବର୍ଷ ହେବ ନିର୍ମାଣ କାର୍ଯ୍ୟ ଆରମ୍ଭ କରୁନାହାନ୍ତି। ଏପରିକି ମହାତ୍ମା ଗାନ୍ଧୀ ଜାତୀୟ ନିଶ୍ଚିତ କର୍ମନିଯୁକ୍ତି ଯୋଜନାରେ ରାସ୍ତାରେ ମାଟି ପକାଯାଇଥିଲେ ମଧ୍ୟ ତାହା ଗ୍ରାମବାସୀଙ୍କ ସମସ୍ୟାର ସମାଧାନ କରିପାରି ନାହିଁ। ତେଣୁ ଯାତାୟାତରେ ସୁବିଧା ପାଇଁ ସେମାନେ ବାଧ୍ୟ ହୋଇ ଶୁକ୍ରବାରଠାରୁ ଜଙ୍ଗଲରୁ କାଠ କାଟି ରାସ୍ତାର ପଙ୍କ କାଦୁଅ ଉପରେ ବିଛାଉଥିବା ଗ୍ରାମ ସଭାପତି ଜିତେନ୍ଦ୍ର ପ୍ରଧାନ, ସମ୍ପାଦକ ପ୍ରଶାନ୍ତ ସାହୁ, ବଟ କିଶୋର ପ୍ରଧାନ, ନାରାୟଣ ପ୍ରଧାନ, ଭକ୍ତ ବନ୍ଧୁ ବିଶ୍ୱାଳ, ଦୋଳଗୋବିନ୍ଦ ପ୍ରଧାନ, ଭାସ୍କର ସାହୁ, ମୀନକେତନ ପ୍ରଧାନ, ବୈକୁଣ୍ଠ ସାହୁ, ପ୍ରମୋଦ ମଙ୍ଗରାଜ, ରବୀନ୍ଦ୍ର ବିଷ୍ଣୁ ପ୍ରମୁଖ ପ୍ରକାଶ କରିଛନ୍ତି। ଏ ସମ୍ପର୍କରେ ଅନୁଗୋଳ ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ବିନୟ କୁମାର ପାଢୀ କହିଛନ୍ତି, ସଂକ୍ରିଡା ଗ୍ରାମକୁ ରାସ୍ତା ଜରୁରୀ। ୧୫ ମାସ ହେଲା ଠିକାଦାର କାମ କରୁନାହାନ୍ତି। ବାରମ୍ବାର ଚିଠି କରାଯିବା ପରେ ସେ ଉତ୍ତର ଦେଉ ନ ଥିବାରୁ ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ସହ ଟେଣ୍ଡର କ୍ୟାନସେଲ କରାଯିବ। ନୂତନ ଟେଣ୍ଡର ଡାକିବା ପାଇଁ ଏକଜିକ୍ୟୁଟିଭ ଇଞ୍ଜିନିୟରଙ୍କୁ ଚିଠି କରାଯାଇଛି ବୋଲି ସହକାରୀ ଯନ୍ତ୍ରୀ ପ୍ରକାଶ କରିଛନ୍ତି।
୩ ଦିନ ହେଲା କାମରେ ଲାଗିଛୁ
ଗ୍ରାମକୁ ଭଲ ରାସ୍ତାଟିଏ ନାହିଁ। ଲୋକ ପ୍ରତିନିଧି, ଜିଲାପାଳଙ୍କୁ ଜଣାଇବା ସତ୍ତ୍ୱେ କେବଳ ପ୍ରତିଶ୍ରୁତି ମିଳିଛି। ବାଧ୍ୟହୋଇ ଗ୍ରାମର ସମସ୍ତେ ଏକାଠି ହୋଇ ୩ ଦିନ ହେଲା ଜଙ୍ଗଲରୁ କାଠ ସଂଗ୍ରହ କରି ରାସ୍ତାକୁ ଯାତାୟାତ ଉପଯୋଗୀ କରିବାକୁ ଚେଷ୍ଟା କରିଛୁ।
-ଜିତେନ୍ଦ୍ର ପ୍ରଧାନ, ଗ୍ରାମ ସଭାପତି
ସରକାରୀ ଯୋଜନାର ସୁଫଳ ପାଉନୁ
ଜଙ୍ଗଲ ମଧ୍ୟରେ ରହୁଥିବାରୁ ଅନେକ ସମସ୍ୟା ଭୋଗୁଛୁ। ପିଇବା ପାଇଁ ବର୍ଷଯାକ ନଳକୂଅ ପାଣି ମଧ୍ୟ ମିଳୁନି। ପ୍ରାଥମିକ ବିଦ୍ୟାଳୟରେ ମାତ୍ର ୨ ଜଣ ଶିକ୍ଷକ ରହିଛନ୍ତି। କେବେ ସରକାରୀ ଯୋଜନାର ସୁଫଳ ଆମକୁ ମିଳିବ ତାହାକୁ ଅପେକ୍ଷା।
-ଘଟ କିଶୋର ପ୍ରଧାନ, ଗ୍ରାମ ସମ୍ପାଦକ
ପରିବା ମୁଣ୍ଡେଇ ବଜାର ଯାଉଛୁ
ଜମିରେ କରୁଥିବା ପରିବା ବିକ୍ରି ପାଇଁ ବଜାରକୁ ନେଇପାରୁନୁ। ଯେତିକି ମୁଣ୍ଡରେ ବୋହିପାରୁଛୁ ସେତିକି ବଡ଼ କଷ୍ଟରେ ଗ୍ରାହକଙ୍କ ନିକଟରେ ପହଞ୍ଚାଉଛୁ। ଭଲ ରାସ୍ତାଟିଏ ଥିଲେ ଗାଡ଼ିରେ ଏସବୁ ସାମଗ୍ରୀ ନେଇ ଅଧିକ ଆୟ କରିପାରିଥାନ୍ତୁ।
-ଭକ୍ତବନ୍ଧୁ ବିଶ୍ୱାଳ, ଗ୍ରାମବାସୀ
ସରକାର ଏଯାଏ ମଜୁରି ଦେଇନାହାନ୍ତି
ଏମ୍ଜିଏନ୍ଆର୍ଇଜିଏସ୍ରେ ଗ୍ରାମବାସୀ ୨ ମାସ ହେଲା ରାସ୍ତାରେ ମାଟି ପକାଇଥିଲେ। କିନ୍ତୁ ଶ୍ରମ ବାବଦ ୬୦ ହଜାର ଟଙ୍କା ଏ ପର୍ଯ୍ୟନ୍ତ ଶ୍ରମିକଙ୍କୁ ମିଳିନାହିଁ। ରାସ୍ତା କାମ ବି ଆଗେଇପାରୁନି। ସରକାର ଦୃଷ୍ଟି ଦେଇ ସମସ୍ୟା ବୁଝନ୍ତୁ।
-ନାରାୟଣ ପ୍ରଧାନ, ଗ୍ରାମବାସୀ
