ଟିଭି ଧାରାବାହିକ ‘ହାପ୍ପୁକି ଉଲଟନ୍ ପଲଟନ’ରେ କମଲେଶ ଚରିତ୍ରରେ ଅଭିନୟ କରିଥିବା ଅଭିନେତା ସଞ୍ଜୟ ଚୌଧୁରୀ ଦିନ ଦୁଇପହରରେ ଲୁଟ୍ର ଶିକାର ହୋଇଛନ୍ତି। ନିଜ ଇନ୍ଷ୍ଟାଗ୍ରାମ୍ରେ ଏକ ଭିଡିଓ ଶେୟାରକରି ସଞ୍ଜୟ ଏହି ସୂଚନା ଦେଇଛନ୍ତି। ମୁମ୍ବାଇର ମୀରା ରୋଡ୍ରେ ଏହି ଅଘଟଣ ଘଟିଥିଲା। ଏଥିପାଇଁ ସଞ୍ଜୟ ଏବେ ସମସ୍ତଙ୍କୁ ସତର୍କ ରହିବାକୁ ଅନୁରୋଧ କରିଛନ୍ତି।
ସଞ୍ଜୟ ମୀରା ରୋଡରୁ ନଏଗାଓଁ ମୁମ୍ବାଇକୁ ‘ହାପ୍ପୁକି ଉଲଟନ୍ ପଲଟନ’ର ଶୁଟିଂ ପାଇଁ କାର ଯୋଗେ ଯାଉଥିଲେ। ଏହି ସମୟରେ ଏକ ସ୍କୁଟିରେ ୩ ବ୍ୟକ୍ତି ଆସି ତାଙ୍କ କାରକୁ ଅଟକାଇଥିଲେ। ସେମାନେ ସଞ୍ଜୟଙ୍କୁ ୨୦ ହଜାର ଟଙ୍କା ମାଗିଥିଲେ। ସଞ୍ଜୟଙ୍କ ପାଖରେ ଏତେ ଟଙ୍କା ନ ଥିବା ସେ ମନା କରିଦେଇଥିଲେ। ଫଳରେ ଦୁର୍ବୃତ୍ତମାନେ ତାଙ୍କୁ ଧମକ ଦେବା ସହ ମାରପିଟ କରିଥିଲେ। ୭ ଶହ ଟଙ୍କା ଓ ତାଙ୍କ ମୋବାଇଲ ଫୋନ୍ ଛଡ଼ାଇ ନେଇଯାଇଥିବା ସଞ୍ଜୟ କହିଛନ୍ତି।
