ନୂଆଦିଲ୍ଲୀ,୧୭ ।୯: କରୋନା ସଂକ୍ରମଣକୁ ନେଇ ସାରା ବିଶ୍ୱ ଅସ୍ତବ୍ୟସ୍ତ ହୋଇ ପଡିଥିବା ବେଳେ ଏବେ ସମସ୍ତଙ୍କ ନଜର କରୋନା ଟିକା ଉପରେ । ବିଭିନ୍ନ ଦେଶ ଏହା ଉପରେ ବି ଯୋରସୋରରେ କାମ ଚଳାଇଛନ୍ତି । ଭାରତ ମଧ୍ୟ ଏ ଦିଗରେ ପଛରେ ନାହିଁ । ଯେତେଶୀଘ୍ର ସମ୍ଭବ କରୋନା ଟିକା ଉବଲବ୍ଧ କରାଇବାରେ ବିଶେଷଜ୍ଞମାନେ ଲାଗି ପଡିଛନ୍ତି । ହେଲେ ଦେଶରେ କେବେ ଏହି କରୋନା ଟିକା ମିଳିବ ତାହା ଏବେ ସମସ୍ତଙ୍କ ମନରେ ପ୍ରଶ୍ନ । ଇତିମଧ୍ୟରେ ଗୁରୁବାର କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡ. ହର୍ଷବର୍ଦ୍ଧନ ରାଜ୍ୟ ସଭାରେ କହିଛନ୍ତି ଆସନ୍ତା ବର୍ଷ ଆରମ୍ଭରେ ଦେଶରେ କରୋନା ଟିକା ଉବଲବ୍ଧ ହେବ । ସ୍ୱାସ୍ଥ୍ୟମନ୍ତ୍ରୀ କହିଛନ୍ତି କିଛିମାସ ହେବ କେନ୍ଦ୍ର ଓ ରାଜ୍ୟ ସରକାର ମିଶି କରୋନା ଯୁଦ୍ଧରେ ଯେଉଁଭଳି ଭାବେ ଲଢି ଚାଲିଛନ୍ତି ତାହା ଅନ୍ୟ ଦେଶ ପାଇଁ ଉଦାହରଣ ପାଲଟିଛି । ଯେତେବେଳେ ଜାନୁୟାରୀ ୭ରେ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ(ଢବ୍ଲୁଏଚ୍ଓ) କହିଥିଲା କି ଚାଇନାରେ କରୋନା ମାମଲା ସାମ୍ନାକୁ ଆସିଛି ସେତେବେଳେ ଜାନୁୟାରୀ ୮ରେ ମୋଦି ସରକାର ଏକ ବୈଠକ ଡକାଇ ଏ ସମ୍ପର୍କରେ ଆଲୋଚନା କରିଥିଲେ । ତେଣୁ ଇତିହାସ ଏହାର ସାକ୍ଷୀ ରହିବ ଯେ ମୋଦି ସରକାର କିଭଳି ଭାବେ କରୋନା ଯୁଦ୍ଧରେ ଲଢେଇ କରିଥିଲେ । ହର୍ଷବର୍ଦ୍ଧନ କହିଛନ୍ତି ଅନ୍ୟଦେଶମାନଙ୍କ ତୁଳନାରେ କରୋନା ମୁକାବିଲାରେ ଆମେ କେତେ ଆଗରେ ତାହା ସହଜରେ ଅନୁମାନ କରାଯାଇପାରେ । ଅନ୍ୟପଟେ ବିରୋଧି ଦଳ ନେତା ଗୁଲାମ ନବି ଆଜାଦ କହିଛନ୍ତି କେନ୍ଦ୍ର ସରକାରଙ୍କ ଖାମଲିଆଲ ମନୋଭାବ ଯୋଗୁ ଆଜି ଦେଶ କରୋନା ସଂକ୍ରମଣରେ ଆଗକୁ ବଢି ଯାଇଛି । ଯେତେବେଳେ ଏହି ଭାଇରସ ଚାଇନାରେ ଦେଖାଯାଇଥିଲା ଏହା ଆମ ପଡୋଶୀ ଦେଶଭାବେ କରୋନା ଭାଇରସ ଆମକୁ ମଧ୍ୟ କ୍ଷତି ପହଞ୍ଚାଇବ ବୋଲି କୁହାଯାଇଥିଲା । ହେଲେ ମୋଦି ସରକାର ଏଥିପ୍ରତି ନଜର ନ ଦେବାରୁ ଏବେ ଦେଶରେ ଦିନକ ଦିନ କରୋନା ସଂକ୍ରମଣ ବଢି ଚାଲିଛି ବୋଲି ବିରୋଧି କହିଛି ।
