ନୂଆଦିଲ୍ଲୀ, ୧୯।୬: ବିଶ୍ୱକପରେ ଭାରତଠାରୁ ଲଗାତର ୭ମ ଥର ଲାଗି ପରାସ୍ତ ହେବା ପରେ ପାକିସ୍ତାନ ଦଳର ସବୁଠି ଆଲୋଚନା ହେଉଛି। ଏହି ସମୟରେ ପାକିସ୍ତାନର ପୂର୍ବତନ ଖେଳାଳି ଉମର ଅକମଲ ଭାରତୀୟ ଦଳକୁ ପ୍ରଶଂସା କରି ଫଶି ଯାଇଛନ୍ତି। ତାଙ୍କୁ ସୋସିଆଲ ମିଡିଆରେ ବହୁ ସମାଲୋଚନା କରାଯାଇଛି। ଅକମଲ ନିଜ ଟୁଇଟରରେ ଯେଉଁ ପାକିସ୍ତାନ ଖେଳାଳିଙ୍କୁ ଟ୍ୟାଗ୍ କରିଛନ୍ତି ସେସବୁ ଫେକ୍ ଆକାଉଣ୍ଟ ଥିଲା। ୟୁଜର୍ସ ଅକମଲଙ୍କ ଭୂଲ ଧରି ତାଙ୍କୁ ଟ୍ରୋଲ କରିଛନ୍ତି। ସୂଚନାଯୋଗ୍ୟ, ଅକମଲ ନିଜ ଟୁଇଟର୍ରେ ଲେଖିଥିଲେ ବିରାଟ କୋହଲି ଏବଂ ରୋହିତ ଶର୍ମାଙ୍କ ସହ ଭାରତୀୟ ଦଳ ଏକ ସନ୍ତୁଳିତ ଦଳ। ଏହି ଦଳରେ ବିଶ୍ୱସ୍ତରୀୟ ଖେଳାଳି ଅଛନ୍ତି। ମହମ୍ମଦ ଅମିର ଆରମ୍ଭରୁ ଓ୍ବିକେଟ୍ ନେଇଥିଲେ ପରିସ୍ଥିତି ଅଲଗା ହୋଇଥାନ୍ତା। ଫକର ଏବଂ ବାବର ଭଲ ଖେଳିଥିଲେ ବୋଲି ସେ ଲେଖିଥିଲେ। ଏହି ଟୁଇଟ୍ରେ ସେ ଅମିର, ଫକର ବାବରଙ୍କୁ ଟ୍ୟାଗ୍ କରିଥିଲେ ମଧ୍ୟ ତାହା ଫେକ୍ ଆକାଉଣ୍ଟ ଥିଲା। କିନ୍ତୁ କୋହଲି ଏବଂ ରୋହିତ ଶର୍ମାଙ୍କ ଯେଉଁ ଟ୍ୟାଗ୍ କରିଥିଲେ ତାହା ସଠିକ୍ ଥିଲା। ଯାହାକୁ ନେଇ ୟୁଜର୍ସ ତାଙ୍କୁ ଟ୍ରୋଲ କରିଥିଲେ।
