ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା ମାମଲାରେ ତଦନ୍ତ ଚାଲିଛି। ସୁଶାନ୍ତଙ୍କ ଆକାଉଣ୍ଟରୁ ଉଠାଯାଇଥିବା ଅର୍ଥର ଇଡି ଏପର୍ଯ୍ୟନ୍ତ ହିସାବ ପାଇନାହିଁ। ଗତ ଶୁକ୍ରବାର ଦିନ ରିୟାଙ୍କୁ ମଧ୍ୟ ପଚରାଉଚରା କରାଯାଇଥିଲା, କିନ୍ତୁ ପଚରାଉଚରା ବେଳେ ରିୟା ସହଯୋଗ କରୁନାହାଁନ୍ତି ବୋଲି ଜଣାପଡିଥିଲା। ସେ ଖର୍ଚ୍ଚ ଉପରେ ସ୍ପଷ୍ଟୀକରଣ ମଧ୍ୟ ଦେଇପାରି ନ ଥିଲେ। ଏହି ମାମଲାରେ ରିୟା ଚକ୍ରବର୍ତ୍ତୀ, ତାଙ୍କ ଭାଇ ଶୋଭିକ ଏବଂ ପିତା ଇନ୍ଦ୍ରଜିତ ଚକ୍ରବର୍ତ୍ତୀ ସୋମବାର ଇଡିରେ ହାଜର ହୋଇଥିଲେ। ଏହି ସମୟରେ ଗଣମାଧ୍ୟମ ମଧ୍ୟ ରିୟାଙ୍କୁ ଘେରି ଥିଲା। ସୁଶାନ୍ତଙ୍କୁ ନେଇ ପ୍ରଶ୍ନ କରିବାରୁ ସେ ରାଗିଯାଇଥିଲେ। ବରକ୍ତି ପ୍ରକାଶ କରି ପଳାଇଥିଲେ। ସୂଚନାଯୋଗ୍ୟ, ଗତ ଜୁନ ୧୪ରେ ସୁଶାନ୍ତ ମୁମ୍ବାଇସ୍ଥିତ ବାସଭବନରେ ଆତ୍ମହତ୍ୟା କରିଥିଲେ। ତାଙ୍କ ଆତ୍ମହତ୍ୟା ପରେ ଗର୍ଲଫ୍ରେଣ୍ଡ ରିୟା ଏବେ ପୋଲିସ ଜେରାର ସମ୍ମୁଖୀନ ହୋଇଛନ୍ତି।
