ଡେରାଡୁନ, ୨୮।୭: ଉତ୍ତରାଖଣ୍ଡ ପୋଲିସର ସିଟି ପେଟ୍ରୋଲ ୟୁନିଟ୍ (ସିପିୟୁ) ପୁଣିଥରେ ଲଜ୍ଜିତ ହୋଇଛି। ଜଣେ ବାଇକ ଚାଳକ ହେଲ୍ମେଣ୍ଟ ପିନ୍ଧି ନ ଥିବାରୁ ସିପିୟୁର ଜଣେ ପୋଲିସ ଗାଡ଼ିର ଚାବିକୁ ଯୁବକଙ୍କ କପାଳରେ ପୁରାଇ ଦେଇଛନ୍ତି। ଏହି ଚାଞ୍ଚଲ୍ୟକର ଘଟଣାଟି ଉଦମ୍ ସିଂ ନଗର ଜିଲାର ରୁଦ୍ରପୁର ସହରରେ ଘଟିଛି। ସୋମବାର ସନ୍ଧ୍ୟାରେ ରୁଦ୍ରପୁର ଇନ୍ଦିରା ଚୌକ ଅଞ୍ଚଳରେ ସିପିୟୁ ପକ୍ଷରୁ ଚେକିଂ ଚାଲିଥିଲା। ଏହି ସମୟରେ ଦୀପକ କୁମାର ଓ ପ୍ରେମଲାଲ ନାମକ ୨ଜଣ ଯୁବକ ହେଲ୍ମେଟ୍ ନ ପିନ୍ଧି ବାଇକରେ ତେଲ ପକାଇବାକୁ ପେଟ୍ରୋଲ ଟାଙ୍କିକୁ ଯାଉଥିଲେ। ଉତ୍ତରାଖଣ୍ଡ ପୋଲିସର ସିପିୟୁ ପକ୍ଷରୁ ଏହି ସମୟରେ ଉଭୟଙ୍କୁ ଅଟକା ଯାଇଥିଲା। ଏହାପରେ ସିପିୟୁ ପୋଲିସ କର୍ମଚାରୀ ଏବଂ ଦୀପକ ଓ ପ୍ରେମଲାଲଙ୍କ ମଧ୍ୟରେ ହେଲ୍ମେଟ୍ ନ ପିନ୍ଧିବାକୁ ନେଇ ଯୁକ୍ତିତର୍କ ଏପରିକି ହାତାହାତି ପର୍ଯ୍ୟନ୍ତ କଥା ଯାଇଥିଲା। ଏଥିରେ ଉତ୍କ୍ଷିପ୍ତ ହୋଇ ସିପିୟୁର ଜଣେ ପୋଲିସ ବାଇକ ଚାବି କାଢ଼ି ଦୀପକଙ୍କ କପାଳକୁ ଜୋର୍ରେ ଆଘାତ କରିଥିଲା। ଫଳରେ ଚାବିଟି ଦୀପକଙ୍କ କପାଳରେ ପଶି ଲାଖି ଯାଇଥିଲା। ଏହାପରେ ଦୀପକ ତଳେ ପଡ଼ି ଛଟପଟ ହୋଇ ଚିତ୍କାର କରିଥିଲେ। ଏହି ସମୟରେ ସିପିୟୁର ୩ଜଣ ଯାକ ପୋଲିସ କର୍ମଚାରୀ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଏହି ଘଟଣାରେ ଉତ୍ତରାଖଣ୍ଡ ପୋଲିସ ପକ୍ଷରୁ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ଡ୍ୟୁଟିରେ ଥିବା ସେହି ୩ ଜଣ ପୋଲିସଙ୍କୁ ସସ୍ପେଣ୍ଡ କରାଯାଇଛି।
