ନୂଆଦିଲ୍ଲୀ,୨୫।୭: କରୋନା ଯୋଗୁ ଦେଶରେ ରେଳ ଚଳାଚଳ ପ୍ରଭାବିତ ହୋଇ ରହିଛି। ଦେଶ ମଧ୍ୟରେ ଜରୁରୀ ଭିତ୍ତିରେ ମାତ୍ର କିଛି ଟ୍ରେନ ଚାଲୁଛି। ଏଥି ଯୋଗୁ ରେଲଓ୍ବେର ରାଜସ୍ବ କ୍ଷତିଗ୍ରସ୍ତ ହୋଇଛି। ଏହାର ପୂର୍ବତନ କର୍ମଚାରୀ ଏବଂ ଅଧିକାରୀଙ୍କୁ ପେନଶନ ଦେବାକୁ ରେଲଓ୍ବେ ନିକଟରେ ଅର୍ଥାଭାବ ଦେଖାଦେଇ ଥିବା ଏକ ଜାତୀୟ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି। ଚଳିତ ଆର୍ଥତ୍କ ବର୍ଷରେ ପୂର୍ବତନ କର୍ମଚାରୀ ଯେଭଳି ଭାବେ ପେନଶନ ପାଇବାରେ କୌଣସି ସମସ୍ୟା ସାମ୍ନା ନ କରିନ୍ତି ତାକୁ ଧ୍ୟାନରେ ରଖି ରେଳ ମନ୍ତ୍ରଣାଳୟ ପକ୍ଷରୁ କେନ୍ଦ୍ର ଅର୍ଥ ମନ୍ତ୍ରଣାଳୟକୁ ଚିଠି ଲେଖିଥିବା କୁହାଯାଉଛି। ଚଳିତ ବର୍ଷ ପେନଶନ ବାବଦ ରେଲଓ୍ବେକୁ ୫୦ ହଜାର କୋଟି ଟଙ୍କା ଖର୍ଚ୍ଚ କରିବାକୁ ପଡିବ। ରେଲଓ୍ବେର ମୋଟ ୧୫ ଲକ୍ଷ ପେନଶନଧାରୀ ଅଛନ୍ତି। କରୋନା ପାଇଁ ରେଲଓ୍ବେକୁ ପୂର୍ବଭଳି ରାଜସ୍ବ ମିଳିବା ବର୍ତ୍ତମାନ ବନ୍ଦ ରହିଛି। ଏଣୁ ପେନଶନ ପ୍ରଦାନ ପ୍ରସଙ୍ଗକୁ ବିଚାର କରିବା ଲାଗି ରେଳ ମନ୍ତ୍ରଣାଳୟ ନର୍ଥ ବ୍ଲକର ସହାୟତା ଲୋଡିଥିବା ରିପୋର୍ଟରେ କୁହାଯାଇଛି। ଏହାବାଦ ରେଲଓ୍ବେର ଭିତ୍ତିଭୂମି ଫଣ୍ଡିଂ ମଧ୍ୟ ପ୍ରଭାବିତ ହୋଇପାରେ ବୋଲି ରିପୋର୍ଟରେ ଆଶଙ୍କା କରାଯାଇଛି। ମିଡିଆ ରିପୋର୍ଟ ମୁତାବକ ଗତ ଆର୍ଥତ୍କ ବର୍ଷ ମଧ୍ୟ ପେନଶନ ପ୍ରଦାନ ଲାଗି ଏହାର ପେନଶନ ପାଣ୍ଠିକୁ ସମ୍ପୂର୍ଣ୍ଣ ଅର୍ଥ ମିଳି ପାରି ନ ଥିଲା। ଫଳରେ ଏହି ପାଣ୍ଠିରେ ଏହି ପାଣ୍ଠିରେ ୨୮ ହଜାର କେଟି ଟଙ୍କାର ନେଗେଟିଭ କ୍ଲୋଜିଂ ବାଲାନ୍ସ ରହିଥିବା ରିପୋର୍ଟରେ ପ୍ରକାଶ ପାଇଛି।
