କେନ୍ଦୁଝର,୯ା୭(ସ୍ବ.ପ୍ର.): କେନ୍ଦୁଝର ଜିଲାରେ ଗୁରୁବାର ସର୍ବାଧିକ ୪୮ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରୁ ମାତ୍ର ୧୦ ଜଣ କ୍ୱାରାଣ୍ଟାଇନ୍ ସେଣ୍ଟରରୁ ଚିହ୍ନଟ ହୋଇଥିବା ବେଳେ ୩୬ ଜଣ ଲୋକାଲ କଣ୍ଟାକ୍ଟ ଓ ଦୁଇ ଜଣ କରୋନା ଯୋଦ୍ଧା ଚିହ୍ନଟ ହୋଇଛନ୍ତି। ଗୋଟିଏ ଦିନରେ ଏତେ ସଂଖ୍ୟାରେ କରୋନା ପଜିଟିଭ୍ ବାହାରିବା ଏବଂ କରୋନା ସଂକ୍ରମଣ ବୃଦ୍ଧି ପାଇବା ପ୍ରଶାସନ ପାଇଁ ଚିନ୍ତାର କାରଣ ହୋଇଛି।
ସେଥିରୁ ୩୪ ଲୋକାଲ କଣ୍ଟାକ୍ଟ ବଡ଼ବିଲ ପୌରାଞ୍ଚଳରେ ବାହାରିଛି। ବଡ଼ବିଲ ଅଞ୍ଚଳ ପୂର୍ବରୁ ଶଟ୍ଡାଉନ୍ ରହିଛି। ସେହିପରି ଦୁଇ ଜଣ ଲୋକାଲ କଣ୍ଟାକ୍ଟ ଭୁବନେଶ୍ୱରରେ ଚିକିତ୍ସିତ ହେବାକୁ ଯାଇଥିବା ବେଳେ ଆକ୍ରାନ୍ତ ହୋଇଥିବା ଜଣାପଡ଼ିଛି ା
ଏହି କାରଣରୁ ସଦର ବ୍ଲକ କବିତ୍ରା ଗ୍ରାମ ଓ ଝୁମ୍ପୁରାକୁ କଣ୍ଟେନ୍ମେଣ୍ଟ୍ ଘୋଷଣା କରାଯିବା ସହ ସମସ୍ତ ଯାତାୟାତ ସିଲ୍ କରାଯାଇଛି। ଜଣେ କରୋନା ଯୋଦ୍ଧା ପଜିଟିଭ୍ ବାହାରିବା ପରେ କେନ୍ଦୁଝର ମୁଖ୍ୟ ଚିକିତ୍ସାଳୟର ସ୍ତ୍ରୀ ଓ ପ୍ରସୂତି ବିଭାଗକୁ ସିଲ୍ କରାଯାଇ ସାନିଟାଇଜ୍ କରାଯାଇଛି। ଉକ୍ତ ଓ୍ବାର୍ଡକୁ ମୁଖ୍ୟ ଡାକ୍ତରଖାନା କୋଠାକୁ ମଧ୍ୟ ସ୍ଥାନାନ୍ତର କରାଯାଇଛି ା
ସୂଚନାଯୋଗ୍ୟ, ଅଦ୍ୟାବଧି ସମୁଦାୟ ୨୪୬ ପଜିଟିଭ୍ ମଧ୍ୟରୁ ୧୩୫ଜଣ ସୁସ୍ଥ ହୋଇ ଘରକୁ ଫେରିଥିବା ବେଳେ ୧୧୧ଜଣ ଚିକିତ୍ସିତ ହେଉଛନ୍ତି। ଅନ୍ୟପକ୍ଷରେ କରୋନା ପଜିଟିଭ୍ ବାହାରି ଚିକିତ୍ସାଧୀନ ଥିବା ଜିଲାର ୪୨ ବର୍ଷର ଜଣେ ରୋଗୀଙ୍କର କ୍ୟାନସର ଯୋଗୁ ମୃତ୍ୟୁ ଘଟିଥିବା ଜଣାପଡ଼ିଛି। କରୋନାରେ ନୁହେଁ ବରଂ କ୍ୟାନସର ଯୋଗୁ ମୃତ୍ୟୁ ଘଟିଥିବା ଜିଲାପାଳ ଆଶିଷ ଥାକରେ କହିଛନ୍ତି ା
