ଚେନ୍ନାଇ, ୨୧।୬: ବର୍ଷର ଚତୁର୍ଥ ତଥା ଅନ୍ତିମ ଗ୍ରାଣ୍ଡସ୍ଳାମ ଟୁର୍ନାମେଣ୍ଟ ୟୁଏସ୍ ଓପନ୍ ପାଇଁ ଆମେରିକୀୟ ତାରକା ମହିଳା ଖେଳାଳି ସେରେନା ଓ୍ବିଲିୟମ୍ସ ପ୍ରସ୍ତୁତି ଆରମ୍ଭ କରିଛନ୍ତି। ୟୁନାଇଟେଡ୍ ଷ୍ଟେଟ୍ସ ଟେନିସ୍ ଆସୋସିଏଶନ (ୟୁଏସ୍ଟିଏ) ସେରେନାଙ୍କର ଏକ ଭିଡିଓ ପୋଷ୍ଟ କରିଛି। ୟୁଏସ୍ ଓପନ୍ ଖେଳିବାକୁ ବହୁତ ଉତ୍ସାହିତ ଅଛି ବୋଲି ୬ଥର ୟୁଏସ୍ ଓପନ୍ ଟାଇଟଲ ହାସଲ କରିଥିବା ସେରେନା ଏହି ଭିଡିଓରେ କହିଛନ୍ତି। ୨୩ଟି ଗ୍ରାଣ୍ଡସ୍ଲାମ ଟାଇଟଲ ଜିତିଥିବା ସେରେନା ବିଶ୍ୱ ରେକର୍ଡର ସମକକ୍ଷ ହେବା ପାଇଁ ଆଉ ଗୋଟିଏ ପାଦ ଦୂରରେ ରହିଛନ୍ତି। ଆଉ ଗୋଟିଏ ଟାଇଟଲ ଜିତିଲେ ସେରେନା ୨୪ଟି ଗ୍ରାଣ୍ଡସ୍ଲାମ ଜିତି ସର୍ବାଧିକ ଟାଇଟଲ ହାସଲ ରେକର୍ଡର ସମକକ୍ଷ ହେବେ। ନିଜ ଘରେ ଏକ ନୂଆ ସର୍ଫେସ ସ୍ଥାପନ କରି ସେରେନା ପ୍ରସ୍ତୁତି ଆରମ୍ଭ କରିଛନ୍ତି। ଏଥର ୟୁଏସ୍ ଓପନ୍ ନୂଆ ସର୍ଫେସରେ ଖେଳ ହେବ।
ଗସ୍ତ ସପ୍ତାହରେ ୟୁଏସ୍ ଓପନ୍ କାର୍ଯ୍ୟସୂଚୀ ନେଇ ୟୁଏସ୍ଟିଏ ଘୋଷଣା କରିଥିଲା। କୋଭିଡ୍-୧୯ ମହାମାରୀ ସତ୍ତ୍ୱେ ୟୁଏସ୍ ଓପନ୍ ଅଗଷ୍ଟ ୩୧ରୁ ସେପ୍ଟେମ୍ବର ୧୩ ତାରିଖ ମଧ୍ୟ ଦର୍ଶକଙ୍କ ଅନୁପସ୍ଥିତିରେ ଆୟୋଜନ ହେବ ବୋଲି ଘୋଷଣା କରାଯାଇଛି। ଟୁର୍ନାମେଣ୍ଟ ଆୟୋଜନ ନେଇ ଶ୍ରେଷ୍ଠ ଖେଳାଳିମାନେ ମିଶ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ସର୍ବିଆର ନୋଭାକ ଜୋକୋଭିଚ୍ ଓ ସ୍ପେନ୍ର ରାଫାଲ ନାଡାଲ ଟୁର୍ନାମେଣ୍ଟରେ ଅଂଶଗ୍ରହଣ କରିବେ ବୋଲି ସମ୍ମତି ପ୍ରକାଶ କରିଛନ୍ତି।
ଉଲ୍ଲେଖଥାଉ କି, ୧୯୭୮ ପରେ ପ୍ରଥମଥର ପାଇଁ ୟୁଏସ୍ ଓପନ ଏକ ଭିନ୍ନ କୋର୍ଟ ତଥା ସର୍ଫେସ୍ରେ ଆୟୋଜନ ହେବ। ଏ ନେଇ ଟୁର୍ନାମେଣ୍ଟ ନିର୍ଦ୍ଦେଶକ ଷ୍ଟାସି ଆଲାଷ୍ଟର ସୂଚନା ଦେଇଛନ୍ତି। ଏହା ସେରେନାଙ୍କ ଘରର ବ୍ୟାକ୍ୟାର୍ଡରେ ଥିବା ନୂଆ କୋର୍ଟରେ ଖେଳାଯିବ। ସେରେନା ମଧ୍ୟ ଏଠାରେ ଟ୍ରେନିଂ କରୁଛନ୍ତି ବୋଲି ସେ କହିଛନ୍ତି। ଫଳରେ ସେରେନା ଏଥର ଫାଇଦାରେ ରହିବେ ବୋଲି ଆଶା କରାଯାଉଛି।
