ଅନୁଗୋଳ ଅଫିସ, ୨୦।୫: ବହୁ ବିରୋଧ ପରେ ଅନୁଗୋଳ ସହରରେ ମାଇକ୍ରୋ କମ୍ପୋଷ୍ଟିଂ ସିଷ୍ଟମ(ଏମ୍ସିସି) ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି। ସହରର ଗୋଟିଏ ସ୍ଥାନରେ ଏମ୍ସିସି କାର୍ଯ୍ୟ ସମ୍ପୂର୍ଣ୍ଣ ହୋଇଥିବାବେଳେ ଅନ୍ୟ ଦୁଇଟି ସ୍ଥାନରେ କାର୍ଯ୍ୟ ୮୦ ପ୍ରତିଶତ ଶେଷ ହୋଇଛି ବୋଲି ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା ସୂଚନା ଦେଇଛନ୍ତି। ଜୁନ୍ ପହିଲାରୁ ହୁଲୁରିସିଂହା ଏମ୍ସିସି କାର୍ଯ୍ୟକ୍ଷମ ହେବ। ସେହିପରି ଅନ୍ୟ ଦୁଇଟିକୁ ଜୁଲାଇ ମାସ ସୁଦ୍ଧା କାର୍ଯ୍ୟକ୍ଷମ କରାଯିବାକୁ ଲକ୍ଷ୍ୟ ରଖାଯାଇଥିବା ପୌରପାଳିକା ପକ୍ଷରୁ ସୂଚନା ଦିଆଯାଇଛି।
ଅନୁଗୋଳ ସହରର ଅଳିଆରୁ ଏଣିକି ଜୈବିକ ସାର ପ୍ରସ୍ତୁତ ହେବ। ଏନେଇ ୩ଟି ଏମ୍ସିସି ନିର୍ମାଣ କାର୍ଯ୍ୟ କରାଯାଉଛି। ସେଥିମଧ୍ୟରୁ ହୁଲୁରିସିଂହାରେ ଏମ୍ସିସି କାର୍ଯ୍ୟ ଶେଷ ହୋଇଛି। ମିଶ୍ରପଡ଼ା ଓ ହେମସୁରପଡ଼ାର ନିର୍ମାଣ କାର୍ଯ୍ୟ ପ୍ରାୟ ଶେଷ ପର୍ଯ୍ୟାୟରେ ପହଞ୍ଚତ୍ଛି। ହୁଲୁରିସିଂହାରେ ପ୍ରାଥମିକ ପର୍ଯ୍ୟାୟରେ ଡେମୋ ପାଇଁ ଦୁଇଟି ଗାଡ଼ି ବୁଧବାରଠାରୁ ଗଡ଼ିଛି। ଏପରି କି ଲୋକଙ୍କୁ ସଚେତନ କରିବା ସହ ଅଳିଆକୁ ଏଣେ ତେଣେ ନ ପକାଇବା ପାଇଁ ମଧ୍ୟ କୁହାଯାଉଛି। ପ୍ରତି ଏମ୍ସିସି ପାଇଁ ଦୁଇଟି ଲେଖାଏଁ ଗାଡ଼ି ଯୋଗାଇ ଦିଆଯିବ। ଲୋକମାନଙ୍କ ଘର ସମ୍ମୁଖରେ ଏହି ଗାଡ଼ିଗୁଡ଼ିକ ପ୍ରତିଦିନ ସକାଳୁ ପହଞ୍ଚତ୍ ଅଳିଆ ସଂଗ୍ରହ କରିବ। ଗାଡ଼ି ସହ ସ୍ବଚ୍ଛସାଥୀ ଓ ସଫେଇ କର୍ମଚାରୀମାନେ ଯାଇ ସଂଗୃହୀତ ଅଳିଆକୁ ଏମ୍ସିସି ପ୍ଲାଣ୍ଟକୁ ଆଣିବେ। ଏହାପରେ ଏଥିରୁ ଜୈବିକ ସାର ପ୍ରସ୍ତୁତ କରାଯିବ ବୋଲି ପୌରପାଳିକା ପକ୍ଷରୁ କୁହାଯାଇଛି।
ଏ ନେଇ ନିର୍ବାହୀ ଅଧିକାରୀ ପଣ୍ଡା କହିଛନ୍ତି, ପ୍ରାଥମିକ ପର୍ଯ୍ୟାୟରେ ଏବେ ଗାଡ଼ି ବିଭିନ୍ନ ଅଞ୍ଚଳରେ ବୁଲି ଅଳିଆ ସଂଗ୍ରହ କରୁଛି। ଜୁନ୍ ୧ ତାରିଖରୁ ହୁଲୁରିସିଂହା ଅଞ୍ଚଳରେ ହୋଇଥିବା ଏମ୍ସିସି କାର୍ଯ୍ୟକାରୀ ହେବ। ପ୍ରକାଶଥାଉ କି, ଅନୁଗୋଳ ସହରର ମିଶ୍ରପଡ଼ାଠାରେ ଏମ୍ସିସି ନିର୍ମାଣ ସମୟରେ ଲୋକେ ବିରୋଧ କରିଥିଲେ। ସେମାନଙ୍କୁ ବୁଝାଶୁଝା କରି ପ୍ରଶାସନ ବିଫଳ ହେବା ପରେ ପୋଲିସ ଲଗାଇ ନିର୍ମାଣ କାର୍ଯ୍ୟ ଆରମ୍ଭ କରିଥିଲା।
