ରାଞ୍ଚି: ଏବେ କରୋନା ରୋଗୀଙ୍କୁ ଚିକିତ୍ସା କରୁଥିବା ଡାକ୍ତରମାନେ ନିଜର ସବୁ ସ୍ବପ୍ନ ଓ ସୁଖସୁବିଧାଥିବା ଜୀବନ ଉପଭୋଗ କରିବାରୁ ବଞ୍ଚିତ ହେଉଛନ୍ତି। ଏମିତି କି ଜୀବନର କେଉଁ ମୁହୂର୍ତ୍ତରେ ସେମାନଙ୍କୁ ବିପଦ ଗ୍ରାସ କରିବ ସେନେଇ ବି ଚିନ୍ତାରେ ଅଛନ୍ତି। ଏମିତି ସମୟରେ ଝାଡ଼ଖଣ୍ଡର ରାଞ୍ଚିରେ ଥିବା ରିମ୍ସ (ରାଜେନ୍ଦ୍ର ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍)ର ଏକ ଡାକ୍ତର ଦମ୍ପତି ଡାକ୍ତରଖାନାରେ ବିବାହବାର୍ଷିକୀ ପାଳନ କରି ଉଦାହରଣ ସୃଷ୍ଟି କରିଛନ୍ତି। ରିମ୍ସର ଡାକ୍ତର ନିଶିକାନ୍ତ ପାଠକ ଏବଂ ତାଙ୍କ ପତ୍ନୀ ରିଥିକା ଉଭୟ କରୋନା ଭାଇରସ୍ ରୋଗୀଙ୍କୁ ଚିକିତ୍ସା କରୁଛନ୍ତି। ସେଥିପାଇଁ ସେମାନେ ଘର ପରିବାର ଲୋକଙ୍କ ପାଖକୁ ଯାଇପାରୁନାହାନ୍ତି। ତେଣୁ ଡାକ୍ତରଖାନାରେ ହିଁ ଯେଉଁ ସମୟ ମିଳୁଛି ସେହି ସମୟ ମଧ୍ୟରେ ଖୁସି ବାଣ୍ଟିବାକୁ ଚେଷ୍ଟା କରୁଛନ୍ତି। ଏହି ଉଦ୍ଦେଶ୍ୟରେ ସେମାନେ ନିଜ ବିବାହବାର୍ଷିକୀ ପାଳନ କରିବା ପାଇଁ ଡାକ୍ତରଖାନାରେ ସମସ୍ତ କରୋନା ରୋଗୀଙ୍କୁ ଟ୍ରିଟ୍ ଦେଇଛନ୍ତି। ରୋଗୀମାନଙ୍କ ସହ ଡାକ୍ତର ଦମ୍ପତି ଏଭଳି ଏକ ସ୍ବତନ୍ତ୍ର ଉତ୍ସବ ପାଳନ କରିଥିବାରୁ ଡାକ୍ତରଖାନା ପରିବେଶ ଏକ ଭିନ୍ନ ପ୍ରକାରର ଖୁସିରେ ଭରି ଯାଇଥିଲା। ରୋଗୀଙ୍କ ମନରେ ଏକ ସକାରାତ୍ମକ ଭାବନା ଭରି ଯାଇଥିଲା। ଏଥିପାଇଁ ଏବେ ଏହି ଡାକ୍ତର ଦମ୍ପତିଙ୍କୁ ସବୁ ମହଲରୁ ଶୁଭେଚ୍ଛା ଦିଆଯାଉଛି। ଏମିତି କି ମୁଖ୍ୟମନ୍ତ୍ରୀ ମଧ୍ୟ ଏହି କରୋନା ଯୋଦ୍ଧାଙ୍କୁ ସ୍ବତନ୍ତ୍ରଭାବେ ଟୁଇଟ୍ କରି ଶୁଭେଚ୍ଛା ଜଣାଇଛନ୍ତି।
