ନୂଆଦିଲ୍ଲୀ, ୨୧।୪ (ପି.ଟି.): କୋରୋନା ଭାଇରସର ଆତଙ୍କ ଶେଷ ହେବା ପରେ ବିଶ୍ୱର ରୂପ ଅଲଗା ହୋଇଥିବ ଓ ଏହା ଭାରତୀୟ କ୍ରୀଡ଼ା ପାଇଁ ଆଶୀର୍ବାଦ ସଦୃଶ ହେବ ବୋଲି ଅଲିମ୍ପିକ୍ ଚାମ୍ପିୟନ ଅଭିନବ ବିନ୍ଦ୍ରା କହିଛନ୍ତି। ସ୍ଥାନୀୟ ଭିତ୍ତିଭୂମି ବିକାଶରେ ଏହା ସହାୟକ ହେବ। କେବଳ ସେତିକି ନୁହଁ କୋଚ୍ ଓ ସପୋର୍ଟ ଷ୍ଟାଫ୍ଙ୍କ ଗୁରୁତ୍ୱ ମଧ୍ୟ ବଢିବ ବୋଲି ବିନ୍ଦ୍ରା କହିଛନ୍ତି। ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ)ର ନବ ନିଯୁକ୍ତ ସହକାରୀ ନିର୍ଦ୍ଦେଶକ ଓ ଅନ୍ୟ ଅଫିସିଆଲଙ୍କୁ ଅନ୍ଲାଇନ୍ ସେସନରେ ଉଦ୍ବୋଧନ ଦେଉଥିବା ବେଳେ ବିନ୍ଦ୍ରା ଏହି କଥା କହିଛନ୍ତି।
କୋଭିଡ-୧୯ ସଂକ୍ରମଣ ସମସ୍ୟାର ସମାଧାନ ପରେ ଭାରତୀୟ କ୍ରୀଡ଼ାର ରୂପରେଖ କ’ଣ ହେବ, ଏ ନେଇ ପ୍ରଶ୍ନର ଉତ୍ତର ଦେଇ ସେ ଏହି କଥା କହିଛନ୍ତି। ଏହା ଭାରତୀୟ କ୍ରୀଡ଼ା ପାଇଁ ଭବିଷ୍ୟତରେ ଆଶୀର୍ବାଦ ସଦୃଶ ହେବ ବୋଲି ସେ କହିଛନ୍ତି। ତେବେ ସେତେବେଳେ ହୁଏତ୍ ବିଦେଶ ଯାଇ ଟ୍ରେନିଂ ନେବାର କିମ୍ବା ବିଭିନ୍ନ ଇଭେଣ୍ଟରେ ଅଂଶଗ୍ରହଣ କରିବାର ସୁଯୋଗ ନ ଥିବ। ତେବେ ଏହା ଭାରତକୁ ନିଜର କ୍ରୀଡ଼ା ଭିତ୍ତିଭୂମି ବିକାଶରେ ବେଶ୍ ସହାୟ ହେବ ବୋଲି କୁହାଯାଇପାରେ। ଏବେ ଆମେ ନିଜର କୋଚ୍ ଓ ସପୋର୍ଟ ଷ୍ଟାଫ୍ ତିଆରି କରିବାର ଆବଶ୍ୟକତା ରହିଛି ବୋଲି ସେ କହିଛନ୍ତି। ଏକ ବିକଳ୍ପ ସ୍କିଲ ଡେଭଲପମେଣ୍ଟ ପ୍ରୋଗ୍ରାମ ଉପରେ ପ୍ରଶାସନ କାର୍ଯ୍ୟ କରିବାର ଆବଶ୍ୟକତା ରହିଛି। ଦେଶର ଆଥଲେଟଙ୍କ ପାଇଁ ଏହାର ନିହାତି ଜରୁରୀ। ଆମ ଆଥଲେଟଙ୍କ ପ୍ରତି ଆମେ ଅଧିକ ଧ୍ୟାନ ଦେବା ଉଚିତ। କାରଣ ଜଣେ ଆଥଲେଟ ଯେତେ ବିଫଳ ହେବେ, ସେତେ ସେ ସଫଳତା ହାସଲ କରିବେ। ଆଥଲେଟଙ୍କ ମନସ୍ତତ୍ତ୍ୱ ଓ ମୌଳିକ ସମସ୍ୟାକୁ କ୍ରୀଡ଼ା ପ୍ରଶାସନ ବୁଝିବା ତଥା ହୃଦୟଙ୍ଗମ କରିବା ଆବଶ୍ୟକ। କୌଣସି ପ୍ରତିଯୋଗିତାର ଫଳାଫଳକୁ ଲକ୍ଷ୍ୟ କରି ଅଲିମ୍ପିକ୍ ଓ ଏସିଆନ୍ ଗେମ୍ସ ପାଇଁ ଯୋଜନା କରିବା ଠିକ୍ ନୁହଁ। ଏଥିସହିତ ପ୍ରତିଭା ଚିହ୍ନଟ ଓ ଏହା ବିକାଶ ଦିଗରେ ଦୃଷ୍ଟାନ୍ତମୂଳକ ଭାବେ କାର୍ଯ୍ୟ କରିବାରୁ ଆବଶ୍ୟକତା ରହିଛି। ଏଥିପାଇଁ ଉଚିତ୍ ଭିତ୍ତିଭୂମି ସ୍ଥାପନ କରିବା ଜରୁରୀ। ବହୁତ କିଛି କାର୍ଯ୍ୟ କରିବା ବାକି ରହିଛି। ଅବଶ୍ୟ ଖେଲୋ ଇଣ୍ଡିଆ ପ୍ରୋଗ୍ରାମ ଏ ଦିଗରେ ସରକାରଙ୍କ କାର୍ଯ୍ୟକୁ ଆଗେଇ ନେଉଛି ବୋଲି ବିନ୍ଦ୍ରା କହିଛନ୍ତି।
