ରସୁଲପୁର,୯।୪(ଡିଏନଏ)- କରୋନା ପ୍ରଭାବରେ ସବୁକିଛି ଠପ୍ ହୋଇଯାଇଛି। ଛୋଟମୋଟ ବ୍ୟବସାୟରୁ ଆରମ୍ଭ କରି ବଡ଼ବଡ଼ ଶିଳ୍ପସଂସ୍ଥାରେ ତାଲା ଝୁଲୁଛି। ଏହାଦ୍ୱାରା ଅଧିକ ପ୍ରଭାବିତ ହୋଇଛନ୍ତି ଦିନ ମଜୁରିଆ ତଥା କ୍ଷୁଦ୍ର ବ୍ୟବସାୟୀମାନେ। ପରିବାର କେମିତି ଚଳିବ, ଅର୍ଥ କେଉଁଠୁ ଆସିବ ସେହି ଚିନ୍ତା ଘାରିଛି। କରୋନା ପାଇଁ ଲକ୍ଡାଉନ ସମୟରେ କେବଳ ଅତ୍ୟାବଶ୍ୟକ ସାମଗ୍ରୀ ଦୋକାନକୁ ଛାଡ଼ିଦେଲେ ଅନ୍ୟ କୌଣସି ଦୋକାନ ଖୋଲାଯାଇ ପାରିବ ନାହିଁ ବୋଲି ନିଷ୍ପତ୍ତି ନିଆଯାଇ ଥିବାରୁ ଅନେକ କ୍ଷୁଦ୍ର ବ୍ୟବସାୟୀ ଅନ୍ୟ ଉପାୟ ନ ପାଇ ବେଉସା ବଦଳାଇବାକୁ ବାଧ୍ୟ ହୋଇଛନ୍ତି। ଏହିକ୍ରମରେ ଜଣେ କବାଡ଼ିଆ ବ୍ୟବସାୟୀ ଏବେ ପରିବା ବ୍ୟବସାୟୀ ସାଜିଥିବା ଦେଖିବାକୁ ମିଳିଛି।
ଗୁରୁବାର ରାଜ୍ୟ ସରକାର ଲକ୍ଡାଉନ ଅବଧି ଏପ୍ରିଲ ୧୪ରୁ ୩୦କୁ ବୃଦ୍ଧି କରିଛନ୍ତି। କ୍ଷୁଦ୍ର ବ୍ୟବସାୟୀମାନେ ରୋଜଗାରଶୂନ୍ୟ ହୋଇପଡ଼ିବାରୁ ପରିବାର ପ୍ରତିପୋଷଣର ବୋଝ ବଢିଯାଇଛି। ଫଳରେ ଯାଜପୁର ଜିଲା ରସୁଲପୁର ବ୍ଲକ ଅଞ୍ଚଳର ଅନାମ ସାହୁ (୩୫) ନାମକ ଜଣେ କବାଡ଼ିଆ ବ୍ୟବସାୟୀ ଏବେ ପରିବା ବ୍ୟବସାୟ କରିବାକୁ ସ୍ଥିର କରିଛନ୍ତି। ତାଙ୍କ ମତରେ ଏବେ ଲକଡାଉନ ଯୋଗୁ କେବଳ ଅତ୍ୟାବଶ୍ୟକ ସାମଗ୍ରୀ ବିକ୍ରି ପାଇଁ ଅନୁମତି ମିଳୁଛି। ଅନାମ ଦିନେ ସାଇକେଲରେ ଭଙ୍ଗା ଲୁହା, ଟିଣା, କାଚ, ପ୍ଲାଷ୍ଟିକ ସାମଗ୍ରୀ ଧରି ଗାଁରୁ ଗାଁକୁ ବୁଲୁଥିବାବେଳେ ଏବେ ସଞ୍ଚୟ କରିଥିବା ସ୍ବଳ୍ପ ଅର୍ଥରେ ପରିବା ବ୍ୟବସାୟ ଆରମ୍ଭ କରିଛନ୍ତି। କରୋନା ଯୋଗୁ କାମଧନ୍ଦା ବନ୍ଦ ହୋଇଯିବା ପରେ ପରିବାରକୁ ଦୁଇଓଳି ଦୁଇମୁଠା ଖାଇବାକୁ ଦେବା କଷ୍ଟକର ହୋଇପଡିଛି। ପରିବା ବେପାର ଛଡ଼ା ଆଉ ଅନ୍ୟ ବାଟ ନାହିଁ। ଏହି ବ୍ୟବସାୟ ଜରିଆରେ ପରିବାରର ଆର୍ଥତ୍କ ସମସ୍ୟା ଆଂଶିକ ଦୂର ହୋଇଛି ବୋଲି କହିଛନ୍ତି।
