ଭୁବନେଶ୍ୱର,୧୭।୩ (ବ୍ୟୁରୋ): କରୋନା ଚାଇନା, ଇଟାଲୀ ଆଦି ଦେଶରେ ମୃତ୍ୟୁର ବୀଭିଷିକା ରଚୁଥିବାବେଳେ ଓଡ଼ିଶାରେ ଛନକା ପଶିଥିଲା। ବିଦେଶରେ ବହୁ ଓଡ଼ିଆ ରହୁଥିବାରୁ ରାଜ୍ୟ ସରକାର ଆଗୁଆ ସତର୍କତାମୂଳକ ପଦକ୍ଷେପ ଗ୍ରହଣ କରିବା ସହ ଏନେଇ ପ୍ରସ୍ତୁତି ଆରମ୍ଭ କରିଥିଲେ। ଏହି ମାରାତ୍ମକ ଭାଇରସ ଭାରତକୁ ଡେଇଁବା ପରେ ଓଡ଼ିଶାରେ ଛନକା ପଶିଥିଲା। ସମ୍ଭାବନ୍ୟ ସଂକ୍ରମଣ ରୋକିବାକୁ ରାଜ୍ୟ ସରକାର ଓ ବିଭିନ୍ନ ବିଭାଗ ପକ୍ଷରୁ କଟକଣା ଆରମ୍ଭ ହୋଇଥିଲା। ଏବେ ଦେଶରେ କରୋନାରେ ୨ଦୁଇଜଣଙ୍କ ମୁଣ୍ଡ ନେବା ସହ ଓଡ଼ିଶାକୁ ମଧ୍ୟ ମାଡ଼ି ଆସିଛି। କ୍ୟାପିଟାଲ ହସ୍ପିଟାଲରେ ଚିକିତ୍ସିତ ହେଉଥିବା ଜଣେ ଇଟଲୀ ଫେରନ୍ତା ଯୁବକଙ୍କଠାରେ ରବିବାର କରୋନା ଭାଇରସ୍ ଚିହ୍ନଟ କରାଯାଇଛି। ସକାଳେ ଖବର ପ୍ରଚାରିତ ହେବା ପରେ ଦିନତମାମ ହସ୍ପିଟାଲରେ କୋକୁଆ ଭୟ ସୃଷ୍ଟି ହୋଇଥିଲା।
ସୋମବାର ହୋଇଥିବାରୁ ରାଜ୍ୟର ବିଭିନ୍ନ ଅଞ୍ଚଳରୁ କ୍ୟାପିଟାଲ ହସ୍ପିଟାଲକୁ ସକାଳୁ ରୋଗୀଙ୍କ ସୁଅ ଛୁଟିଥିଲା। ହେଲେ କରୋନା ଆକ୍ରାନ୍ତ ହସ୍ପିଟାଲ ପରିସରରେ ଚିକିତ୍ସିତ ହେଉଥିବା ଶୁଣିବାକ୍ଷଣି ସେମାନଙ୍କ ମନରେ ଛନକା ପଶିଯାଇଥିଲା। ରୋଗୀ, ସମ୍ପର୍କୀୟଙ୍କ ମୁହଁରେ ଖାଲି କରୋନା କଥା ଶୁଣିବାକୁ ମିଳୁଥିଲା। କରୋନା କେଉଁଠି, କାହାକୁ ହୋଇଛି ଆଦି ଅନେକ ପ୍ରଶ୍ନ ପରସ୍ପର ମଧ୍ୟରେ ଗୁଞ୍ଜରିତ ହେଉଥିଲା। ଶୀଘ୍ର ଡାକ୍ତରଙ୍କୁ ଦେଖାଇ ଚାଲିଯିବାକୁ ସେମାନଙ୍କ ମଧ୍ୟରେ ବ୍ୟଗ୍ରତା ଓ ଅନାଗତ ଭୟ ଦେଖିବାକୁ ମିଳିଥିଲା। ଟିକେଟ କାଉଣ୍ଟର, ଆଉଟ୍ଡୋର୍, ଲାବୋରେଟୋରୀ, ନିରାମୟ କେନ୍ଦ୍ରରେ ଘଣ୍ଟା ଘଣ୍ଟା ଧରି ଧାଡ଼ିରେ ଅପେକ୍ଷା କରିବା କଷ୍ଟକର ହୋଇପଡିଥିଲା। ଫଳରେ ବହୁ ରୋଗୀ ଅଧା ଚିକିତ୍ସାରୁ ଚାଲିଯାଇଥିବାବେଳେ ଏପଟେ ବିଭିନ୍ନ ଓ୍ବାର୍ଡରେ ରହି ଚିକିତ୍ସିତ ହେଉଥିବା ରୋଗୀଙ୍କ ମନରେ ମଧ୍ୟ ସମାନ ଭୟ ସୃଷ୍ଟି ହୋଇଥିଲା। ସୁସ୍ଥ ହେଉଥିବା ରୋଗୀମାନେ କିପରି ହସ୍ପିଟାଲ ଛାଡ଼ିବେ ସେଥିପାଇଁ ସଜବାଜ ହେଉଥିବା ମଧ୍ୟ ଦେଖିବାକୁ ମିଳିଥିଲା।
ମୁହଁ ଖୋଲିଲେ ଆକ୍ରାନ୍ତଙ୍କ ପରିବାର: ରାତି ୯ଟାରେ ନେଗେଟିଭ୍, ରାତି ୧୨ରେ ପଜିଟିଭ
ଅନ୍ୟପକ୍ଷରେ ସ୍ବାବ୍ ରିପୋର୍ଟ ଓ ଚିକିତ୍ସାକୁ ନେଇ ମୁହଁ ଖୋଲିଚନ୍ତି କରୋନା ଆକ୍ରାନ୍ତଙ୍କ ପରିବାର ଲୋକ। ତାଙ୍କ ଭଉଣୀ କହିଛନ୍ତି, ଭାଇ ଇଟାଲୀର ରୋମରେ ପାଠ ପଢିବା ସହ ପାର୍ଟ ଟାଇମ୍ ଚାକିରି କରୁଥିଲେ। ୬ ତାରିଖରେ ଦିଲ୍ଲୀ ବିମାନ ବନ୍ଦରରେ ଯାଞ୍ଚ କରାଯାଇ ଛଡ଼ାଯାଇଥିଲା। ସେ ଟ୍ରେନ୍ ଆସି ୧୩ ତାରିଖରେ ଭୁବନେଶ୍ୱରରେ ପହଞ୍ଚତ୍ଥିଲେ। ଜ୍ୱର ହେବାରୁ ଏକ ଘରୋଇ କ୍ଲିନିକ୍ରେ ରକ୍ତ ପରୀକ୍ଷାରୁ ଟାଇଫଏଡ୍ ବାହାରିଥିଲା। ଦେହ ଭଲ ନ ହେବାରୁ ଶନିବାର କ୍ୟାପିଟାଲ ହସ୍ପିଟାଲରେ ଡାକ୍ତରଙ୍କ ପରାମର୍ଶ ନେଇଥିଲୁ। ରବିବାର ସକାଳେ ସ୍ବାବ୍ ନମୁନା ପରୀକ୍ଷା ପାଇଁ ନିଆଯାଇଥିଲା। ରାତି ୯ଟାର ଯୁବକ ଜଣକ ନେଗେଟିଭ୍ ଥିବା ଘରକୁ ଫୋନ୍ କରି ଜଣାଇଥିଲେ। ଡାକ୍ତର ତାଙ୍କୁ ଘରକୁ ପଳାଇଯିବାକୁ ବାଧ୍ୟ କରାଯାଇଥିଲା। ହେଲେ ତାଙ୍କ ସହ ଅନ୍ୟ ଦୁଇଜଣ ସନ୍ଦିଗ୍ଧ ରହିଥିବା ଓ ସେମାନଙ୍କର ରିପୋର୍ଟ ଆସି ନ ଥିବାରୁ ଆଶଙ୍କା କରି ଡାକ୍ତରଙ୍କୁ ଜଣାଇ ରହିଥିଲେ। ହେଲେ ରାତି ୧୨ଟାରେ ଡାକ୍ତର ତାଙ୍କୁ କରୋନା ପଜେଟିଭ ହୋଇଥିବା କହିଥିଲେ। କିଭଳି ଏପରି ହେଲା ବୋଲି ସେ ପ୍ରଶ୍ନ କରି ଭାଇଙ୍କ ଜୀବନ ସହ ଖେଳ ଖେଳାଯାଉଥିବା ସେ ଅଭିଯୋଗ କରିଛନ୍ତି। ଆଉଥରେ ନମୁନା ପରୀକ୍ଷା କରାଯିବାକୁ ସେ ଦାବି କରିଛନ୍ତି।
