ନୂଆଦିଲ୍ଲୀ,୧୬।୩: ନିର୍ଭୟା ଗଣବଳାତ୍କାର ମାମଲାରେ ଏବେ ନୂଆ ମୋଡ ଆସିଛି। ଫାଶୀ ଖୁଣ୍ଟରେ ଝୁଲିବାକୁ ଥିବା ୪ଦୋଷୀଙ୍କ ପରିବାରଲୋକ ଇଛାମୃତ୍ୟୁ ପାଇଁ ରାଷ୍ଟ୍ରପତିଙ୍କୁ ଏକ ଚିଠି ଲେଖି ଅନୁମତି ମାଗିଛନ୍ତି। ଇଛାମୃତ୍ୟୁ ମାଗିଥିବା ବ୍ୟକ୍ତିଙ୍କ ମଧ୍ୟରେ ରହିଛନ୍ତି ଦୋଷୀଙ୍କ ମା’-ବାପା, ଭାଇ-ଭଉଣୀ ଓ ପିଲାମାନେ। ଏହି ଚିଠିପତ୍ର ହିନ୍ଦୀରେ ଲେଖାଯାଇଥିବା ଜଣାପଡ଼ିଛି। ଏଥିରେ ପରିବାରଲୋକେ ରାଷ୍ଟ୍ରପତି ରାମନାଥ କୋବିନ୍ଦ ଓ ପୀଡିତାଙ୍କ ମା’ ବାପାଙ୍କୁ ଇଛାମୃତ୍ୟୁ ପାଇଁ ଅନୁମତି ଦେବାକୁ ଅନୁରୋଧ କରିଛନ୍ତି। ଇଛାମୃତ୍ୟୁ ଦ୍ୱାରା ଭବିଷ୍ୟତରେ ହେବାକୁ ଥିବା କୌଣସି ଅପରାଧ ବା ନିର୍ଭୟା ଭଳି ଦ୍ୱିତୀୟ ଘଟଣାକୁ ଅଟକାଇଯାଇପାରିବ। ବିଶ୍ୱରେ ଏଭଳି କୌଣସି ପାପ ନାହିଁ ଯାହାର କ୍ଷମା ନାହିଁ। ପୂର୍ବରୁ ବି ଦେଶରେ ମହାପାପିଙ୍କୁ କ୍ଷମା କରାଯାଇଛି। ତେବେ ପ୍ରତିଶୋଧର ପରିଭାଷା ଶକ୍ତି ନୁହେଁ, କ୍ଷମା ହିଁ ସବୁଠାରୁ ବଡ଼ ଶକ୍ତିର ଉଦାହରଣ ବୋଲି ଦୋଷୀଙ୍କ ପରିବାରଲୋକେ କହିଛନ୍ତି। ସୂଚନା ମୁତାବକ ନିର୍ଭୟା ଦୋଷୀ ବିନୟ ଶର୍ମା, ଅକ୍ଷୟ ସିଂହ ଠାକୁର, ପବନ ଗୁପ୍ତା ଓ ମୁକେଶ ସିଂହଙ୍କୁ ମାର୍ଚ୍ଚ ୨୦ ତାରିଖରେ ସକାଳ ସାଢ଼େ ୫ଟାରେ ଫାଶୀ ଦିଆଯିବାକୁ ଦିଲ୍ଲୀ ପଟିଆଲା ହାଉସ୍ କୋର୍ଟ ଡେଥ୍ ଓ୍ବାରେଣ୍ଟ ଜାରି କରିଛନ୍ତି।
