ପରଜଙ୍ଗ, ୧।୧ (ଡି.ଏନ.ଏ.) – ଢେଙ୍କାନାଳ ଜିଲା କାମାକ୍ଷାନଗର ବ୍ଲକ ତୁମୁସିଂହା ଥାନା ରଘୁଆବିଲି ଗ୍ରାମରେ ପଦାକୁ ଆସିଛି ସ୍ବାସ୍ଥ୍ୟସେବାର ବିକଳ ଚିତ୍ର। ଗାଁକୁ ରାସ୍ତା ନ ଥିବାରୁ ଅଧାବାଟରେ ୧୦୮ ଆମ୍ବୁଲାନ୍ସ ଅଟକିଯାଇଥିଲା। ଫଳରେ ଜଣେ ଅସୁସ୍ଥ ବୃଦ୍ଧ ଖଟିଆରେ ୨କି.ମି. ବୁହାହୋଇ ଆସିଥିଲେ।
ମଙ୍ଗଳବାର ମଧ୍ୟାହ୍ନରେ ଉକ୍ତ ଗ୍ରାମର ରାମ ତରାଇ ହଠାତ୍ ଅସୁସ୍ଥ ହୋଇପଡ଼ିଥିଲେ। ତାଙ୍କୁ ଡାକ୍ତରଖାନା ନେବାକୁ ପରିବାର ଲୋକେ ୧୦୮ ଆମ୍ବୁଲାନ୍ସର ସହାୟତା ଲୋଡ଼ିଥିଲେ। ରୋଗୀଙ୍କୁ ଆଣିବାକୁ ଆସିଥିବା ୧୦୮ ଆମ୍ବୁଲାନ୍ସ ଜଙ୍ଗଲିଆ ରାସ୍ତା ମଝିରେ ଥିବା ଯୋର ପାର ହୋଇପାରି ନ ଥିଲା। ତେଣୁ ୧୦୮ କର୍ମଚାରୀ ଏବଂ ପରିବାର ଲୋକେ ମିଶି ରାମଙ୍କୁ ଏକ ଖଟିଆରେ କାନ୍ଧେଇ ଦୀର୍ଘ ୨ କିମି ବୋହି ଆଣିଥିଲେ। ଏହାପରେ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ସ୍ବାଧୀନତାର ଦୀର୍ଘ ବର୍ଷ ପରେ ବି ରଘୁଆବିଲି ଗ୍ରାମକୁ ସବୁଦିନିଆ ରାସ୍ତା ନାହିଁ। ତେଣୁ ଜରୁରିକାଳୀନ ସମୟରେ ରୋଗୀମାନେ ନାହିଁ ନ ଥିବା ସମସ୍ୟା ଭୋଗୁଛନ୍ତି। ଅଗ୍ନିଶମ ଗାଡ଼ି ମଧ୍ୟ ଯାଇପାରୁନାହିଁ। ଏହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଏ ନେଇ ୧୦୮ ଆମ୍ବୁଲାନ୍ସ ଚାଳକ କୁନାଲ ସାହୁ କୁହନ୍ତି, ଅଣଓସାରିଆ ରାସ୍ତା ସାଙ୍ଗକୁ ନାଳରେ ପାଣି ଥିବାରୁ ଅପରପାର୍ଶ୍ୱକୁ ଗାଡ଼ି ଯିବା ସମ୍ଭବ ହେଲାନାହିଁ। ଫାର୍ମାସିଷ୍ଟ ଯସ୍ମିନ ଦତ୍ତ ପରିଡ଼ା କୁହନ୍ତି, ଖଟିଆରେ ବୋହି ଆଣିବା ବେଳକୁ ବୃଦ୍ଧଙ୍କ ଅବସ୍ଥା ଗୁରୁତର ହୋଇପଡ଼ିଥିଲା।
