ଢେଙ୍କାନାଳ ଅଫିସ, ୨୪।୧୨ – ବଢ଼ିଚାଲିଛି କଂକ୍ରିଟ ଜଙ୍ଗଲ। ଶିଳ୍ପାୟନ ନାମରେ କଟାଚାଲିଛି ଅସଂଖ୍ୟ ଗଛ। ପ୍ରାକୃତିକ ବିପର୍ଯ୍ୟୟ ବି ପରିବେଶ ପାଇଁ ଏବେ ପାଲଟିଛି ବଡ଼ ଚ୍ୟାଲେଞ୍ଜ। ଆଖି ଆଗରେ ଉଜୁଡ଼ି ଯାଉଥିବା ସବୁଜବନାନୀ ପାଇଁ ଚିନ୍ତାବ୍ୟକ୍ତ କରିଛନ୍ତି ପାରାଦୀପ ପୋର୍ଟ ଟ୍ରଷ୍ଟର ସହକାରୀ ଯନ୍ତ୍ରୀ ଅମରେଶ ନରେଶ ସାମନ୍ତ (୪୪)। ଏଥିପାଇଁ ସେ ଜନସଚେତନତା ସୃଷ୍ଟି ଉଦ୍ଦେଶ୍ୟରେ ଆରମ୍ଭ କରିଛନ୍ତି ସାଇକେଲ ଯାତ୍ରା।
ସାରା ଓଡ଼ିଶାରେ ଚାରାରୋପଣ କରି ସବୁଜ ବଳୟ ସୃଷ୍ଟି କରିବା ଉଦ୍ଦେଶ୍ୟରେ ଯନ୍ତ୍ରୀ ଅମରେଶ ୨୧ ତାରିଖରୁ ପାରାଦୀପରୁ ଆରମ୍ଭ କରିଛନ୍ତି ସାଇକେଲ ଯାତ୍ରା। ସେ ଚଣ୍ଡିଖୋଲ, ମଙ୍ଗୁଳି ଦେଇ ରବିବାର ରାତିରେ ଢେଙ୍କାନାଳରେ ପହଞ୍ଚତ୍ଥିଲେ। ସର୍କିଟ୍ ହାଉସରେ ରାତ୍ରିଯାପନ କରିବା ପରେ ସୋମବାର ଜିଲା ପ୍ରଶାସନ, ବନ ବିଭାଗ ଏବଂ ପୌରସଂସ୍ଥା ଅଧିକାରୀଙ୍କୁ ଭେଟି ସେମାନଙ୍କ ସହ ଆଲୋଚନା କରିଛନ୍ତି। ଏହି ଅବସରରେ ସେ ଛାତ୍ରୀଛାତ୍ର, ସହରବାସୀଙ୍କୁ ସୁରକ୍ଷିତ ପରିବେଶ ପାଇଁ ବ୍ୟାପକ ପରିମାଣରେ ଗଛ ଲଗାଇବାକୁ ସଚେତନ କରାଇଥିଲେ। ଅପରାହ୍ନରେ ସେ କଟକ ଅଭିମୁଖେ ଯାତ୍ରା ଆରମ୍ଭ କରିଛନ୍ତି। ସେଠାରୁ ଭୁବନେଶ୍ୱର, ଖୋର୍ଦ୍ଧା, ନୟାଗଡ଼, ଶରଣକୂଳ, ବ୍ରହ୍ମପୁର ଦେଇ ଗୋପାଳପୁରରେ ଯାତ୍ରା ଶେଷ କରିବେ ବୋଲି ସେ କହିଛନ୍ତି।
ଅମରେଶ କୁହନ୍ତି, ୧୯୯୯ ମହାବାତ୍ୟାରେ ପାରାଦୀପ, କୁଜଙ୍ଗ ସମେତ ଉପକୂଳବର୍ତ୍ତୀ ଅଞ୍ଚଳରେ ବ୍ୟାପକ କ୍ଷୟକ୍ଷତି ହୋଇଥିଲା। ବହୁ ଗଛ ଉପୁଡ଼ି ପଡ଼ିଥିଲା। ଏହାକୁ ନେଇ ଚିନ୍ତାଗ୍ରସ୍ତ ହୋଇପଡ଼ିଥିଲେ। ଏହାପରେ ପାରାଦୀପ ଅଞ୍ଚଳରେ ବୁଲିବୁଲି ଗଛ ଲଗାଇବା ସହ ଅନ୍ୟମାନଙ୍କୁ ମଧ୍ୟ ଏଥିଲାଗି ପ୍ରେରିତ କରିଥିଲେ। ୨୦୦୩ରୁ ଏହି କାର୍ଯ୍ୟ ନିଶାରେ ପରିଣତ ହୋଇଥିଲା। ଏହାପରେ ସେ ସାଇକେଲ ଯାତ୍ରା କରି ଜାଗରଣ ସୃଷ୍ଟି କରିବାକୁ ନିଷ୍ପତ୍ତି ନେଇଥିଲେ। ଭଲ ରାସ୍ତାରେ ଗୋଟିଏ ଦିନରେ ୮୦କିମି ଯାତ୍ରା କରିପାରୁଛନ୍ତି। ରାସ୍ତା ଖରାପ ଥିଲେ ୫୦କିମି ଯିବା ସମ୍ଭବ ହେଉଛି ବୋଲି ଅମରେଶ ସୂଚନା ଦେଇଛନ୍ତି। ସର୍କିଟ ହାଉସରେ ପୌରଯନ୍ତ୍ରୀ ରଶ୍ମିତା ମିଶ୍ରଙ୍କ ସହ ଅନ୍ୟମାନେ ତାଙ୍କୁ ସ୍ବାଗତ କରିଥିଲେ।
