ସଜନାଗଡ଼, ୨୩।୧୧(ଡି.ଏନ.ଏ.)-ରାଜ୍ୟ ସରକାର ୧ମରୁ ୮ମ ଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରଙ୍କ ଲାଗି ମଧ୍ୟାହ୍ନଭୋଜନ ବ୍ୟବସ୍ଥା କରିଛନ୍ତି। ଏପରିକି ବିଦ୍ୟାଳୟରେ ରୋଷେଇ ହେଲେ ଶିକ୍ଷାଦାନରେ ବାଧା ଉପୁଜିବା ଆଶଙ୍କା କରାଯାଇ ବାହାରୁ ରନ୍ଧାଖାଦ୍ୟ ଯୋଗାଇ ଦିଆଯାଉଛି। ଏହି ପରିପ୍ରେକ୍ଷୀରେ ବାଲେଶ୍ୱର ଜିଲା ନୀଳଗିରି ଏନ୍ଏସିର ୧୮ଟି ବିଦ୍ୟାଳୟକୁ ପ୍ରାୟ ମାସେ ହେଲା ଶେରଗଡ଼ସ୍ଥିତ କିଚେନ୍ ସେଣ୍ଟରରୁ ରନ୍ଧା ଖାଦ୍ୟ ଯୋଗାଇ ଦିଆଯାଉଛି। ମାତ୍ର ଏହି ଖାଦ୍ୟକୁ ପିଲାମାନେ ଖାଇବାକୁ ଆଗ୍ରହ ଦେଖାଉନାହାନ୍ତି। ଖାଦ୍ୟ ନିମ୍ନମାନର ଦିଆଯିବା ସହ ଠିକ୍ ସମୟରେ ବିଦ୍ୟାଳୟଗୁଡ଼ିକରେ ଖାଦ୍ୟ ପହଞ୍ଚତ୍ ପାରୁ ନ ଥିବା ଅଭିଯୋଗ ହେଉଛି। ଏହାର ଉଦାହରଣ ଦେଖିବାକୁ ମିଳିଛି କାହାଳିଆ ବଂଶୀଧର ନୋଡ଼ାଲ ସ୍କୁଲରେ।
ବିଦ୍ୟାଳୟରେ ପ୍ରତ୍ୟହ ଅପରାହ୍ନ ୧ଟା ୧୦ମିନିଟ୍ରେ ଛାତ୍ରୀଛାତ୍ରମାନଙ୍କ ଲାଗି ମଧ୍ୟାହ୍ନଭୋଜନ ସମୟ ଧାର୍ଯ୍ୟ କରାଯାଇଛି। ହେଲେ ଶୁକ୍ରବାର ଉକ୍ତ ବିଦ୍ୟାଳୟରେ ପ୍ରାୟ ୧ଟା ୨୦ମିନିଟ୍ରେ ରନ୍ଧାଖାଦ୍ୟ ଗାଡ଼ି ପହଞ୍ଚିଥିଲା। ସେଥିରେ ଛାତ୍ରୀଛାତ୍ରମାନଙ୍କ ପାଇଁ ତରକାରି ଆସି ନ ଥିଲା। ଫଳରେ ଭୋକରେ ଆଉଟୁପାଉଟୁ ହେଉଥିବା ଛାତ୍ରୀଛାତ୍ରମାନେ ବାଧ୍ୟ ହୋଇ ଲୁଣ ଲଗାଇ ଭାତ ଖାଇଥିଲେ। ପ୍ରାୟ ୨୦ମିନିଟ୍ ପରେ ଏକ ବାଇକ୍ରେ ସୋୟାବିନ୍ ତରକାରି ଅଣାଯାଇଥିଲା। ସେତେବେଳକୁ ଛାତ୍ରୀଛାତ୍ରମାନେ ଅଧା ଭାତ ଖାଇ ସାରିଥିଲେ। ଉକ୍ତ ତରକାରି ଦୁର୍ଗନ୍ଧ ହେଉଥିବା ବେଳେ ଖଟାଳିଆ ଲାଗିବାରୁ ଛାତ୍ରୀଛାତ୍ରମାନେ ଏହାକୁ ଖାଇବାକୁ କୁଣ୍ଠାବୋଧ କରିଥିଲେ। ଏପରି ନିମ୍ନମାନର ଖାଦ୍ୟ ଦେଖି ଶତାଧିକ ଅଭିଭାବକ ବିଦ୍ୟାଳୟରେ ପହଞ୍ଚତ୍ ଅସନ୍ତୋଷ ପ୍ରକାଶ କରିବା ସହ ବିତରକଙ୍କ ସହ ଯୁକ୍ତିତର୍କ କରିଥିଲେ। ରନ୍ଧା ଖାଦ୍ୟ ଯେଉଁ ଗାଡ଼ିରେ ଆସୁଛି, ଉକ୍ତ ଗାଡ଼ି ନିରାପଦ ନ ଥିବା ବେଳେ ଖାଦ୍ୟ ଉପରେ ପଲିଥିନ୍ ପକାଇ ଅଣାଯାଉଛି। ଏଭଳି ଅବ୍ୟବସ୍ଥାକୁ ବିରୋଧ କରି ବିଦ୍ୟାଳୟ ପରିସରରେ ଗ୍ରାମବାସୀ ଏକାଠି ହୋଇ ପ୍ରତିବାଦ କରିବା ପରେ ଘଟଣାସ୍ଥଳରେ ସିଆର୍ସିସି ରଣଜିତ ରାଉତ ପହଞ୍ଚତ୍ଥିଲେ। ତରକାରି ବିଳମ୍ବରେ ଆସିଥିବା ସେ ସ୍ବୀକାର କରିବା ସହିତ ସୋୟାବିନ୍ ତରକାରି ଦୁର୍ଗନ୍ଧ ହେଉଥିବା ଜାଣିବାକୁ ପାଇଥିଲେ। ପ୍ରଧାନଶିକ୍ଷକ ବାଲୁଙ୍କେଶ୍ୱର ବେହେରାଙ୍କୁ ପଚାରିବାରୁ ଅତି ନିମ୍ନମାନର ଖାଦ୍ୟ ଦିଆଯାଉଥିବା ଓ ତରକାରି ବିଳମ୍ବରେ ଆସିବାରୁ ପିଲାମାନେ ଲୁଣ ଲଗାଇ ଭାତ ଖାଇଥିବା କହିଛନ୍ତି। ଏ ସମ୍ପର୍କରେ ନୀଳଗିରି ବିଇଓ ଭଗୀରଥ ଗିରିଙ୍କୁ ପଚାରିବାରୁ ଘଟଣା ବିଷୟରେ ଉପଯୁକ୍ତ ତଦନ୍ତ କରି ପ୍ରତିକାର ବ୍ୟବସ୍ଥା କରିବେ ବୋଲି ପ୍ରକାଶ କରିଛନ୍ତି।
