କଣିହାଁ, ୮ା୯(ଡି.ଏନ.ଏ.) – ଲଗାଣ ବର୍ଷା ଯୋଗୁ ଅନୁଗୋଳ ଜିଲା କଣିହାଁ ବ୍ଲକର ସର୍ବପୁରାତନ ପବିତ୍ରମୋହନ ହାଇସ୍କୁଲର ସଭାକକ୍ଷ କୋଠା ଶୁକ୍ରବାର ବିଳମ୍ବିତ ରାତିରେ ଭୁଶୁଡି ପଡିଛି। ଲଙ୍ଗ ହଲ୍ କୁହାଯାଉଥିବା ବିଦ୍ୟାଳୟର ଏହି କକ୍ଷରେ ଛାତ୍ରୀଛାତ୍ରଙ୍କ ମଧ୍ୟରେ ପ୍ରତିଯୋଗିତା, ପୂଜା ଉତ୍ସବ ସହ ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯାଇଥାଏ। ଲଗାଣ ବର୍ଷ ଯୋଗୁ ଏହା ଅଧିକ ଦୁର୍ବଳ ହୋଇ ଭୁଶୁଡି ପଡିଥିବା ଅଭିଯୋଗ ହୋଇଛି। ଏ ସମ୍ପର୍କରେ ପ୍ରଧାନ ଶିକ୍ଷକ ଦାଶରଥି ଜେନା, ସହକାରୀ ଶିକ୍ଷକ ସିଦ୍ଧି ପ୍ରସାଦ ସାହୁ, ବିନାୟକ ପ୍ରଧାନ ପ୍ରମୁଖ କହିଛନ୍ତି, ବିପଦସଙ୍କୁଳରେ ଥିବା କାନ୍ଥ ଭାଙ୍ଗି ଯାଇଛି। ତେବେ ଏଥିଯୋଗୁ ବିଦ୍ୟାଳୟର ସମସ୍ୟା ମଧ୍ୟ ବଢିଛି। ନୂତନ କକ୍ଷ ନିର୍ମାଣ କରାଯିବାକୁ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଯାଇଛି।
ସେହିପରି ବର୍ଷା ଯୋଗୁ କଣିହାଁ ବ୍ଲକ କଣିହାଁ-ରେଙ୍ଗାଳି ରାସ୍ତାର ଝରାବେରେଣୀ ଗ୍ରାମର ବହୁ ଲୋକଙ୍କ ଘରେ ପାଣି ପଶିଛି। ବ୍ଲକ ଦେଇ ଯାଇଥିବା ୫୩ ନମ୍ବର ଜାତୀୟ ରାଜପଥର ଉନ୍ନତୀକରଣରେ ଡ୍ରେନଗୁଡିକୁ ପୋତି ଦିଆଯାଇଥିବାରୁ ପାଣି ନିଷ୍କାସନ ହୋଇପାରୁ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଗ୍ରାମର ରମେଶ ଚନ୍ଦ୍ର ପ୍ରଧାନ, ଶ୍ରୀକର ସାହୁ, ଖଗେଶ୍ୱର ସାହୁ, ପୁଲସ୍ତି ସାହୁ, ପବିତ୍ର ସାହୁ, କ୍ଷେତ୍ରବାସୀ ପ୍ରଧାନ ପ୍ରମୁଖ କୁହନ୍ତି, ରାଜପଥ ନିର୍ମାଣ ବେଳେ ଡ୍ରେନକୁ ପୋତି ଦିଆଯାଇଛି। ରାସ୍ତା ନିର୍ମାଣ ପରେ ଡ୍ରେନ କରାଯିବ ବୋଲି ଠିକାସଂସ୍ଥା ପକ୍ଷରୁ କୁହାଯାଇଥିଲା। ହେଲେ ଏହା କରାଗଲା ନାହିଁ। ସେହିପରି ଏନଟିପିସି ମୁଣ୍ଡାହଟିଂଠାରେ ମଧ୍ୟ ପାଣି ପଶି ଏପରି ସମସ୍ୟା ଉପୁଜିଛି। ଏଥିଯୋଗୁ ଲଳିତା ଲାଙ୍ଗୁରିଙ୍କ ଘର ଭାଙ୍ଗି ଯାଇଥିବା ଅଭିଯୋଗ ହୋଇଛି। ବର୍ଷା ଛାଡିବା ପରେ ବ୍ଲକ ପ୍ରଶାସନ ପକ୍ଷରୁ ଅଗ୍ନିଶମ କର୍ମଚାରୀଙ୍କ ସହାୟତାରେ ପାଣି ନିଷ୍କାସନ କରାଯାଇଛି। ବ୍ଲକ ଅଗ୍ନିଶମ ଅଧିକାରୀ ରୋହିତ ବେହେରା କୁହନ୍ତି, କଣିହାଁ ହଟିଂରେ ଡ୍ରେନ ଉପରେ ଜଣେ ବ୍ୟକ୍ତିଙ୍କ ଘର ନିର୍ମାଣ ହୋଇଥିବାରୁ ଏହା ପୋତି ହୋଇଯାଇଛି। ବିଡିଓଙ୍କ ନିର୍ଦ୍ଦେଶ କ୍ରମେ ଜଳ ନିଷ୍କାସନ କରାଯାଇଥିବା ସେ କହିଛନ୍ତି। ସେହିପରି ଝରାବେରେଣୀ ଗ୍ରାମରେ ମଧ୍ୟ ପାଣି ପଶିଥିବା ଦେଖିବାକୁ ମିଳିଛି।
