ପବିତ୍ରନଗର, ୭।୮(ଡି.ଏନ୍.ଏ.): ଅନୁଗୋଳ ଜିଲା କଣିହାଁ ବ୍ଲକ ସମଲ ଥାନା ପବିତ୍ରନଗର ନିକଟ ସମାକୋଇ ପୋଲ ନିକଟରେ ଏକ ବାଇକ ଭାରସାମ୍ୟ ହରାଇ ରାସ୍ତା ତଳକୁ ଖସିବା ଯୋଗୁ ଜଣଙ୍କର ମୃତ୍ୟୁ ଘଟିଛି। ମୃତକଜଣଙ୍କ ହେଲେ ପାଳଲହଡା ଥାନା ଶିଗଡ ଗ୍ରାମର ମାନୁ ଚରଣ ପ୍ରଧାନ।
ସୂଚନାନୁଯାୟୀ, ବୁଧବାର ସକାଳେ ସ୍ଥାନୀୟ ଲୋକେ ଘଟଣା ବିଷୟରେ ଜାଣି ପୋଲିସକୁ ଖବର ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରିବା ସହ ପରିବାରଲୋକଙ୍କୁ ଖବର ଦେଇଥିଲା। ତେବେ ବାଇକ୍ ସହ ମାନୁ ପୋଲ ତଳକୁ ଖସି ପଡ଼ିଥିବା ବେଳେ ଗାଡ଼ିଟି ଏକ ବୁଦା ମଧ୍ୟରେ ପଶି ଯାଇଥିଲା। ଫଳରେ ଦୁର୍ଘଟଣା ବିଷୟରେ କେହି ଜାଣିପାରି ନ ଥିବା ଅନୁମାନ କରାଯାଉଛି। ମୃତକଙ୍କ କ୍ଷତସ୍ଥାନରୁ ଦୁର୍ଘଟଣା ମଙ୍ଗଳବାର ଘଟିଥିବା ନେଇ କୁହାଯାଉଛି।
