ଜିଲା ମୁଖ୍ୟ ଚିକିତ୍ସାଳୟରେ ଅବ୍ୟବସ୍ଥା: ରୋଗୀଙ୍କ ଖାଦ୍ୟରୁ ଗ୍ଲୋବ୍ସ ବାହାରିଥିବା ଚର୍ଚ୍ଚା
8:07 amOctober 25, 2019 / 21

ଅନୁଗୋଳ ଅଫିସ, ୨୫ା୧୦- ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ରୋଗୀଙ୍କୁ ଦିଆଯାଇଥିବା ରନ୍ଧା ଖାଦ୍ୟରୁ ଗୁରୁବାର ସନ୍ଧ୍ୟାରେ ଏକ ଗ୍ଲୋବ୍ସ ବାହାରିଥିବା ନେଇ ଜୋରଦାର ଚର୍ଚ୍ଚା ହେଉଛି। ଭାତରେ ମିଶିଯାଇଥିବା ଉକ୍ତ ଗ୍ଲୋବ୍ସ ବାନ୍ତିରେ ବାହାରିବା ପରେ ଘଟଣା ପଦାକୁ ଆସିଥିବା କୁହାଯାଉଛି। କିନ୍ତୁ ଏ ନେଇ କିଛି ଅଭିଯୋଗ କି ସୂଚନା ନ ଥିବା ସିଡିଏମ୍‌ଓ ଡାକ୍ତର ଅମରେନ୍ଦ୍ରନାଥ ମହାନ୍ତି କହିଛନ୍ତି।
ମେଡିସିନ ବିଭାଗ ମହିଳା ଓ୍ବାର୍ଡରେ ଚିକିତ୍ସାଧୀନ କେନ୍ଦ୍ରାପଡ଼ାର କୌଶଲ୍ୟା କହିଛନ୍ତି ଯେ, ତାଙ୍କୁ ସନ୍ଧ୍ୟାରେ ଦିଆଯାଇଥିବା ଭାତରେ ରବର ଗ୍ଲୋବ୍ସ ରହିଯାଇଥିଲା। ଜାଣି ନ ପାରି ସେ ଭାତ ସହ ତାହାକୁ ଖାଇ ଦେଇଥିଲେ। ହେଲେ କିଛି ସମୟ ପରେ ସେ ବାନ୍ତି କରିବାରୁ ସେଥିରେ ଉକ୍ତ ଗ୍ଲୋବ୍ସ ବାହାରି ଆସିଥିଲା। ଏ ନେଇ ୱାର୍ଡରେ ଥିବା ଡାକ୍ତରଙ୍କୁ ସେ ଅବଗତ କରିଥିଲେ। ଉକ୍ତ ଓ୍ବାର୍ଡରେ ଚିକିତ୍ସାଧୀନ ଅନ୍ୟ ରୋଗୀ ଓ ସେମାନଙ୍କ ସମ୍ପର୍କୀୟ ମଧ୍ୟ କୌଶଲ୍ୟାଙ୍କ ବାନ୍ତିରେ ଗ୍ଲୋବ୍ସ ବାହାରିଥିବା କହିଛନ୍ତି। ତେବେ ମେଡିକାଲକୁ ଖାଦ୍ୟ ଯୋଗାଉଥିବା ଶକ୍ତି ରଞ୍ଜନ ପ୍ରଧାନ ଘଟଣା ସମ୍ପର୍କରେ ମୁହଁ ଖୋଲି ନ ଥିବା ବେଳେ ଓ୍ବାର୍ଡରେ ଥିବା ଡାକ୍ତର ଏ ନେଇ ପ୍ରଶାସନକୁ କାହିଁକି ଜଣାଇ ନାହାନ୍ତି ତାହାକୁ ନେଇ ରୋଗୀଙ୍କ ମଧ୍ୟରେ ପ୍ରଶ୍ନବାଚୀ ସୃଷ୍ଟି ହୋଇଛି।