ଅନୁଗୋଳ ଅଫିସ, ୧୮।୮: ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ପରିସରରେ ଥିବା ଶବ ସଂରକ୍ଷଣ ଗୃହରେ ମୃତଦେହ ରଖିଲେ ଖଣ୍ଡିଆ ହୋଇଯାଉଥିବା ଅଭିଯୋଗ ହେଉଥିବାରୁ ଏବେ କର୍ମଚାରୀମାନେ ସେଠାରେ ମୃତଦେହ ରଖିବାକୁ ଭୟ କରୁଥିବା ଚର୍ଚ୍ଚାର ବିଷୟ ହୋଇଛି। ଶୁକ୍ରବାର ମେଡିକାଲରେ ଚିକିତ୍ସାଧୀନ ଅବସ୍ଥାରେ ଦୁଇଜଣଙ୍କ ମୃତ୍ୟୁ ହୋଇଥିବା ବେଳେ ସେମାନଙ୍କ ମୃତଦେହ ସଂରକ୍ଷଣ ଗୃହରେ ନ ରଖି କର୍ମଚାରୀମାନେ ବାରଣ୍ଡାରେ ପକାଇ ଦେବାରୁ ଉଭୟ ପରିବାର ଲୋକେ ରାତି ଉଜାଗର ରହି ସେଠାରେ ଜଗି ବସିଥିବା ଅଭିଯୋଗ ହୋଇଛି।
ପ୍ରକାଶ ଯେ, ଶୁକ୍ରବାର ରାତିରେ ନାଲ୍କୋ ଥାନା ଗିରାଙ୍ଗ ଗ୍ରାମର ସୁବାସ ନାଏକ ବିଷ ପାନ କରିଥିବାରୁ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ତେବେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା। ସେହିଭଳି ଢେଙ୍କାନାଳ ଜିଲା ଦଦରାଘାଟି ନିକଟରେ ଦୁର୍ଘଟଣାଗ୍ରସ୍ତ ହୋଇ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିବା ପରଜଙ୍ଗ ଥାନା ଅଞ୍ଚଳର ଗଙ୍ଗ ସେନାପତିଙ୍କ ମଧ୍ୟ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିଲା। ତେବେ ଉଭୟଙ୍କ ମୃତଦେହ ଶବ ସଂରକ୍ଷଣ ଗୃହରେ ରଖିବା ବଦଳରେ ମେଡିକାଲ କର୍ମଚାରୀ ବାରଣ୍ଡାରେ ରଖି ଦେଇଥିଲେ। ପରିବାର ଲୋକେ ଆପତ୍ତି କରିଥିଲେ ମଧ୍ୟ ରାତି ଡ୍ୟୁଟିରେ ଥିବା ଅଧିକାରୀ ଓ କର୍ମଚାରୀମାନେ ତାହା ଶୁଣି ନ ଥିଲେ। ଫଳରେ ବାଧ୍ୟ ହୋଇ ପରିବାର ଲୋକେ ରାତି ଅନିଦ୍ରା ହୋଇ ମୃତଦେହକୁ ଜଗି ରହିଥିଲେ। ଏ ସମ୍ପର୍କରେ ଅତିରିକ୍ତ ଜିଲା ମୁଖ୍ୟ ଚିକିତ୍ସା ଅଧିକାରୀ ଡା. ଲକ୍ଷ୍ମୀ ନାରାୟଣ ବିଶୋଇ କହିଛନ୍ତି, ପୋଲିସ ଆସି ମୃତଦେହ ରଖିବା କଥା। କାହିଁକି ରଖାଗଲା ନାହିଁ ତାହା ଜଣାପଡ଼ି ନାହିଁ।
