ନୂଆଦିଲ୍ଲୀ,୧୯।୩: ଦୀର୍ଘ ଏକ ଦଶକ ଧରି କ୍ରିକେଟ୍ କମେଣ୍ଟ୍ରିରୁ ଦୂରରେ ରହିବା ପରେ ପୁଣିଥରେ ଫେରୁଛନ୍ତି ନବଜୋତ ସିଂ ସିଦ୍ଧୁ। ରାଜନୀତିକୁ ବାଏ ବାଏ କହିବା ପରେ ସେ ଆଗାମୀ ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍ ୨୦୨୪)ରେ ଷ୍ଟାର ସ୍ପୋଟ୍ସ ପାଇଁ କମେଣ୍ଟ୍ରି କରିବେ। ଗୋଟିଏ ପଟେ ଲକ୍ଷ ଲକ୍ଷ କ୍ରିକେଟ ପ୍ରଶଂସକଙ୍କ ହୃଦୟ ଜିତିବାକୁ ସେ ଚେଷ୍ଟା କରିବେ ବୋଲି କହିଥିବା ବେଳେ ପୁରୁଣା ଦିନକୁ ମନେ ପକାଇବାକୁ ଭୁଲିନାହାନ୍ତି।
ସିଦ୍ଧୁ କହିଛନ୍ତି, ଆଇପିଏଲ୍ ବିଶ୍ୱକପ୍ ପାଇଁ ପରିବେଶ ସୃଷ୍ଟି କରିବ। ଏହି ସମୟରେ ଅନ୍ୟ କୌଣସି କ୍ରିକେଟ ଟୁର୍ନାମେଣ୍ଟ ହେବ ନାହିଁ। ଦୁନିଆର ନଜର ଆଇପିଏଲ୍ ଉପରେ ରହିବ। ଏହି ଟୁର୍ନାମେଣ୍ଟରେ ଭଲ ପ୍ରଦର୍ଶନ କଲେ କେବଳ ଭାରତରେ ନୁହେଁ ବରଂ ବିଦେଶୀ ଖେଳାଳି ମଧ୍ୟ ଟି୨୦ ବିଶ୍ୱକପ୍ ଲାଗି ନିଜ ଦଳରେ ସ୍ଥାନ ପାଇପାରିବେ। ରୋହିତ ଏବଂ ବିରାଟଙ୍କୁ ଆଗାମୀ ବିଶ୍ୱକପ୍ ଲାଗି ଭାରତୀୟ ଟିମ୍ରେ ଚୟନ କରିବାର ସମ୍ଭାବନା ରହିଛି। କହିବାକୁ ଗଲେ ଉଭୟଙ୍କ ଆବଶ୍ୟକତା ରହିଛି। ଉଭୟ ବରିଷ୍ଠ ଖେଳାଳି। ସେମାନଙ୍କର କୌଶଳ ହିଁ ଟୁର୍ନାମେଣ୍ଟ ଜିତିବାରେ ସହାୟକ ହେବ ବୋଲି ସେ କହିଛନ୍ତି। ତେବେ ଏହି ଅବସରରେ ସେ ନିଜର ଦରମା ବିଷୟରେ ଉଲ୍ଲେଖ କରିଛନ୍ତି। ଏକ ସମୟ ଥିଲା ଦିନକୁ ତାଙ୍କୁ ୨୫ ଲକ୍ଷ ଟଙ୍କା ଯାଏ ମିଳୁଥିବା ସେ କହିଛନ୍ତି।
