ପାଟନା,୯।୧୧: ମାତ୍ର ୧୫ ବର୍ଷ ବୟସରେ ବିଶ୍ୱ କ୍ରିକେଟ୍ର ଅନ୍ୟତମ ଚର୍ଚ୍ଚିତ ଖେଳାଳି ପାଲଟିଛନ୍ତି ବୈଭବ ସୂର୍ଯ୍ୟବଂଶୀ। ଅନ୍ତର୍ଜାତୀୟ କ୍ରିକେଟ୍ରେ ପାଦ ଥାପିବା ପରେ ତାଙ୍କ ଲୋକପ୍ରିୟତା ଆକାଶଛୁଆଁ ହୋଇଛି। ନିକଟରେ ସେ ନୂଆ ଟାଟା ସିଏରା କାର୍ର ମାଲିକ ହୋଇଛନ୍ତି। ଦୀପାବଳି ଅବସରରେ ନିଜ ନୂଆ କାର୍ର ଡେଲିଭରି ନେବାକୁ ସେ ଶୋ’ରୁମ୍ରେ ପହଞ୍ଚିଥିଲେ। ତେବେ ବୈଭବ ଏହି କାର୍ଟିକୁ ନିଜ ଟଙ୍କାରେ କିଣିନାହାନ୍ତି। ଆଇପିଏଲ ୨୦୨୬ରେ ସୁପର ଷ୍ଟ୍ରାଇକର୍ ଆୱାର୍ଡ ଜିତିବା ପରେ ତାଙ୍କୁ ପୁରସ୍କାର ସ୍ବରୂପ ଏହି ଚକ୍ଚକ୍ କାର୍ ମିଳିଛି। କେବଳ ଟାଟା ସିଏରା ନୁହେଁ, ବୈଭବଙ୍କ କାର୍ କଲେକ୍ସନରେ ଆହୁରି ଦାମୀ ଗାଡ଼ି ରହିଛି। ତେବେ ସେ ଏବେ ନାବାଳକ ହୋଇଥିବାରୁ ତାଙ୍କ ପାଖରେ ଡ୍ରାଇଭିଂ ଲାଇସେନ୍ସ ନାହିଁ। ତେଣୁ ନିଜେ ଏହି ଗାଡ଼ିଗୁଡ଼ିକୁ ରାସ୍ତାରେ ଚଳାଇ ପାରିବେ ନାହିଁ।
୧. ଟାଟା ସିଏରା (Tata Sierra)
ବୈଭବଙ୍କ କାର୍ କଲେକ୍ସନ୍ସରେ ସବୁଠାରୁ ନୂଆ ଗାଡ଼ି ହେଉଛି ଟାଟା ସିଏରା। ଆଇପିଏଲ ୨୦୨୬ରେ ସୁପର ଷ୍ଟ୍ରାଇକର୍ ଅଫ ଦ ସିଜିନ ଆୱାର୍ଡ ଜିତିବା ପରେ ତାଙ୍କୁ ଏହି କାର୍ ମିଳିଥିଲା। ସେହି ସିଜିନ୍ରେ ସେ ୨୩୭.୩୧ ଷ୍ଟ୍ରାଇକ ରେଟ୍ରେ ବ୍ୟାଟିଂ କରିଥିଲେ। ଦୀପାବଳି ଦିନ ସେ ଏହି କାର୍ର ଡେଲିଭରି ନେଇଥିଲେ। ଭାରତରେ ଏହି ଗାଡ଼ିର ଦାମ ପ୍ରାୟ ୨୬ ଲକ୍ଷ ଟଙ୍କା ପର୍ଯ୍ୟନ୍ତ ରହିଛି।
୨. ମର୍ସିଡିଜ ବେଞ୍ଜ (Mercedes-Benz)
ବୈଭବଙ୍କ ପାଖରେ ଏକ ମର୍ସିଡିଜ ବେଞ୍ଜ କାର୍ ମଧ୍ୟ ରହିଛି। ତାଙ୍କ ପାଖରେ ମର୍ସିଡିଜ ବେଞ୍ଜ GLE 300d ମଡେଲ ଅଛି। ଆଇପିଏଲ୍ରେ ତାଙ୍କର ଚମତ୍କାର ପ୍ରଦର୍ଶନ ପାଇଁ ରାଜସ୍ଥାନ ରୟାଲ୍ସ ଫ୍ରାଞ୍ଚାଇଜିର ପୂର୍ବତନ ମାଲିକ ରଣଜିତ ବରଠାକୁର ତାଙ୍କୁ ଏହି କାର୍ ଉପହାର ଦେଇଥିବା କୁହାଯାଉଛି। ତେବେ କାର୍ର ଦାମ୍ ପାଖାପାଖି କୋଟିଏ ଟଙ୍କା ବୋଲି ଜଣାପଡ଼ିଛି।
୩. ଟାଟା କର୍ଭ ଇଭି (Tata Curvv EV)
ବୈଭବଙ୍କ କାର୍ କଲେକ୍ସନ୍ରେ ଟାଟା କର୍ଭର ଇଲେକ୍ଟ୍ରିକ ମଡେଲ ମଧ୍ୟ ରହିଛି। ଆଇପିଏଲ ୨୦୨୫ରେ ସୁପର ଷ୍ଟ୍ରାଇକର୍ ଆୱାର୍ଡ ଜିତିବା ପରେ ତାଙ୍କୁ ଏହି କାର୍ ମିଳିଥିଲା। ସେହି ସିଜିନରେ ସେ ୨୦୬.୫୫ ଷ୍ଟ୍ରାଇକ ରେଟ୍ରେ ବ୍ୟାଟିଂ କରି ସୁପର ଷ୍ଟ୍ରାଇକର୍ ଅଫ ଦ ସିଜିନ ହୋଇଥିଲେ। ପୁରସ୍କାର ସ୍ବରୂପ ତାଙ୍କୁ ଟାଟା କର୍ଭର ଇଭି ମଡେଲ ଦିଆଯାଇଥିଲା। ଏହାର ମୂଲ୍ୟ ପାଖାପାଖି ୧୯ ଲକ୍ଷ।
୪. ଟୟୋଟା ଫର୍ଚୁନର୍ ଲିଜେଣ୍ଡର୍ (Toyota Fortuner Legender)
ଟୟୋଟା ଫର୍ଚୁନର୍ ଲିଜେଣ୍ଡର ନାମ ମଧ୍ୟ ବୈଭବଙ୍କ କାର୍ କଲେକ୍ସନ ସହ ଯୋଡ଼ାଯାଉଛି। ଚଳିତ ବର୍ଷ ପାଟନାସ୍ଥିତ ବୁଦ୍ଧ ଟୟୋଟା ଶୋ’ରୁମ ପକ୍ଷରୁ ସୋସିଆଲ ମିଡିଆରେ ଏକ ଭିଡିଓ କ୍ଲିପ ଶେୟାର କରାଯାଇଥିଲା। ଏଥିରୁ ବୈଭବଙ୍କ ପରିବାର ଟୟୋଟା ଫର୍ଚୁନର୍ ଲିଜେଣ୍ଡର୍ କିଣିଥିବା ଜଣାପଡ଼ିଥିଲା। ଏହାର ମୂଲ୍ୟ ମଧ୍ୟ ୫୦ ଲକ୍ଷ ହେବ ବୋଲି ଜଣାପଡ଼ିଛି।
Dharitri – Odisha’s No.1 Odia Daily
