ନିଜର ଡ୍ୟୁଟି ସମ୍ପାଦନ କରିବା ସହ ବଳକା ସମୟରେ ସାଲାଡ ବିକ୍ରି କରି ମାସକୁ ୧.୫ ଲକ୍ଷ ଟଙ୍କା ରୋଜଗାର କରୁଛନ୍ତି ପୁଣେର ମେଘା ବଫନ୍ନା। କେବଳ ଏତିକି ନୁହେଁ, ସେ ଏହି ବ୍ୟବସାୟରେ ୩୦ ଜଣ ମହିଳାଙ୍କୁ ମଧ୍ୟ ନିଯୁକ୍ତି ଦେଇଛନ୍ତି। ସାଲାଡ ପ୍ରସ୍ତୁତି ଠାରୁ ଆରମ୍ଭ କରି ଲୋକଙ୍କ ପାଖରେ ପହଞ୍ଚାଇବା କାର୍ଯ୍ୟ ଏମାନେ କରୁଛନ୍ତି। ମେଘା ‘କିପ୍ ଗୁଡ୍ ଶେଫ’ଷ୍ଟାର୍ଟଅପ୍ ମାଧ୍ୟମରେ ସାଲାଡ ପ୍ରସ୍ତୁତ କରି ଲୋକଙ୍କୁ ଯୋଗାଇ ଦେଉଛନ୍ତି। ଏହି କାର୍ଯ୍ୟ ଆରମ୍ଭ କରିବା ସମୟରେ ସେ ୩,୫୦୦ ଟଙ୍କା ବିନିଯୋଗ କରିଥିଲେ। ମେଘା ୧୫ ବର୍ଷ ହେବ ଏକ ରିୟଲ ଇଷ୍ଟେଟ କମ୍ପାନୀରେ କାମ କରୁଛନ୍ତି। ସେ ସକାଳ ୪ଟାରେ ଉଠି ସାଲାଡ ପାଇଁ କାମ ଆରମ୍ଭ କରିଦିଅନ୍ତି। କିଛି ଶସ୍ୟ ଭିଜାଇବା ପରେ ମାର୍କେଟରୁ ତଟକା ପରିବା ଆଣନ୍ତି ଓ ତାହାକୁ କାଟି ସାଲାଡ ପ୍ରସ୍ତୁତ କରନ୍ତି। ୬ ପ୍ରକାର ସାଲାଡରୁ ପ୍ରଥମେ ସେ ତାଙ୍କ ବ୍ୟବସାୟ ଆରମ୍ଭ କରିଥିଲେ ଓ ଏବେ ୨୭ ପ୍ରକାର ସାଲାଡ ତିଆରି କରୁଛନ୍ତି। ପ୍ରତି ସପ୍ତାହରେ ମେନ୍ୟୁ ପରିବର୍ତ୍ତନ କରାଯାଉଛିି। ଅର୍ଡର ମୁତାବକ ଲୋକଙ୍କ ଘରେ ସାଲାଡ ପହଞ୍ଚାଇବାର ବ୍ୟବସ୍ଥା କରି ତାଙ୍କ ଡ୍ୟୁଟିକୁ ବାହାରି ଯାଆନ୍ତି। ୪ ବର୍ଷ ଧରି ସେ ଏହି କାର୍ଯ୍ୟ କରି ଆସୁଛନ୍ତି। ସାଲାଡ ପ୍ୟାକେଜିଂ ପାଇଁ ସେ ପୁନଃ ଉପଯୋଗ ଯୋଗ୍ୟ ପ୍ଲାଷ୍ଟିକ ପ୍ୟାକେଟ ବ୍ୟବହାର କରୁଛନ୍ତି। ଏହି ସେବାକୁ ସେ ମୁମ୍ବାଇରେ ଆରମ୍ଭ କରିବାକୁ ଯୋଜନା କରିଛନ୍ତି।
