ଇସଲାମାବାଦ,୧୩।୯: ମହଙ୍ଗା ଇନ୍ଧନ ଦରରୁ ସାଧାରଣ ଲୋକଙ୍କୁ ଆଶ୍ୱସ୍ତି ଦେବାକୁ ପାକିସ୍ତାନ ସରକାର ଏକ ବଡ଼ ରିଲିଫ୍ ଯୋଜନା ଘୋଷଣା କରିଛି। ରବିବାର ପାକିସ୍ତାନ ପ୍ରଧାନମନ୍ତ୍ରୀ ଶହବାଜ ସରିଫ୍ ଏହି ଯୋଜନା ବିଷୟରେ ଘୋଷଣା କରିଛନ୍ତି।
ଏହି ଯୋଜନା ଅନୁସାରେ ମୋଟରସାଇକେଲ ଚାଳକ, ରିକ୍ସା ମାଲିକଙ୍କ ସହ ୮୦୦ ସିସି ପର୍ଯ୍ୟନ୍ତ ଗାଡ଼ି ଚାଳକଙ୍କୁ ପେଟ୍ରୋଲରେ ପ୍ରତି ଲିଟର ୧୦୦ ପାକିସ୍ତାନୀ ଟଙ୍କା (PKR) ରିହାତି ଦିଆଯିବ।ମଧ୍ୟପ୍ରାଚ୍ୟରେ ଆମେରିକା ଓ ଇରାନ ମଧ୍ୟରେ ଜାରି ସଂଘର୍ଷ ଓ ଉତ୍ତେଜନା ଯୋଗୁଁ ବିଶ୍ୱ ବଜାରରେ ଇନ୍ଧନ ମୂଲ୍ୟ ବଢ଼ୁଛି। ଏହାର ପ୍ରଭାବରେ ପାକିସ୍ତାନରେ ମଧ୍ୟ ପେଟ୍ରୋଲ ଦର ବୃଦ୍ଧି ପାଇଛି। ଏହି ବଢ଼ୁଥିବା ଇନ୍ଧନ ମୂଲ୍ୟରୁ ସାଧାରଣ ଲୋକଙ୍କୁ ରିଲିଫ୍ ଦେବା ଉଦ୍ଦେଶ୍ୟରେ ସରକାର ଏହି ଯୋଜନା ଆଣିଛନ୍ତି ।
୧୧ ସେପ୍ଟେମ୍ବରରେ ଦର ବୃଦ୍ଧି ପରେ ପାକିସ୍ତାନରେ ପେଟ୍ରୋଲ ଦର ୩୭୫.୮୨ PKR ପ୍ରତି ଲିଟର ରହିଛି। ସେହିପରି ହାଇସ୍ପିଡ୍ ଡିଜେଲ ଦର ୪୦୩.୩୨ PKR ପ୍ରତି ଲିଟର ହୋଇଛି। ରିପୋର୍ଟ ଅନୁସାରେ, ପେଟ୍ରୋଲ ଦରରେ ପ୍ରତି ଲିଟର ୫.୦୨ PKR ଏବଂ ହାଇସ୍ପିଡ୍ ଡିଜେଲରେ ୫.୨୮ PKR ବୃଦ୍ଧି କରାଯାଇଥିଲା।
ପାକିସ୍ତାନ ଷ୍ଟେଟ୍ ଅଏଲ୍ (PSO) ତଥ୍ୟ ଅନୁସାରେ, ଲାଇଟ୍ ଡିଜେଲ ଅଏଲ୍ (LDO) ଦର ୨୭୯.୫୫ PKR ପ୍ରତି ଲିଟର, ଯେତେବେଳେ ଘରୋଇ ବ୍ୟବହାରର କିରୋସିନ୍ ତେଲର ଦର ୩୨୪.୩୫ PKR ପ୍ରତି ଲିଟର ରହିଛି। କରାଚିରେ LPG ଦର ୨୫୮.୬୫ PKR ପ୍ରତି କିଲୋଗ୍ରାମ ରହିଛି। ସେହିପରି ୟୁରୋ-୫ ପ୍ରିମିୟର ପେଟ୍ରୋଲ ୩୭୫.୮୨ PKR, ପ୍ରିମିୟର ମୋଟର ଗ୍ୟାସୋଲିନ୍ ୟୁରୋ-୫ ଅକ୍ଟେନ୍+ ୩୯୫ PKR ଏବଂ ୟୁରୋ-୫ ହାଇ-ସିଟେନ୍ ଡିଜେଲ ୪୦୩.୩୨ PKR ପ୍ରତି ଲିଟର ଦରରେ ମିଳୁଛି। ଏହାସହ ୩୧ ଅଗଷ୍ଟ ୨୦୨୬ର ନୋଟିଫିକେସନ୍ ଅନୁସାରେ, ପାକିସ୍ତାନରେ ୧୧.୮ କିଲୋଗ୍ରାମ LPG ସିଲିଣ୍ଡର ଦର ୩,୦୫୨.୦୯ PKR ଧାର୍ଯ୍ୟ କରାଯାଇଛି।
