ପରିବେଶ ତଥା ଜୀବଜନ୍ତୁଙ୍କ ସୁରକ୍ଷା ବହୁ ସମୟରେ ଅନେକଙ୍କ ନିଶା ପାଲଟିଯାଏ, ଯାହା ଘଟିଛି ଅରବିନ୍ଦ ମିଶ୍ରାଙ୍କ ଜୀବନରେ। ବିହାରର ଭାଗଲପୁର ଜିଲା ନିବାସୀ ଅରବିନ୍ଦ ବିଲୁପ୍ତର ଦ୍ୱାରଦେଶରେ ଥିବା ଗ୍ରେଟର ଆଡ୍ଜୁଣ୍ଟାଣ୍ଟ ଷ୍ଟୋର୍କ (ଏକ ପ୍ରକାର ବୃହତ୍ ବଗ)ଙ୍କ ସୁରକ୍ଷାରେ ଲାଗିଛନ୍ତି। ଏହି ପକ୍ଷୀଙ୍କ ଉଚ୍ଚତା ୧.୫ ମିଟର ଏବଂ ଦେଖିବାକୁ ଭାରି ସୁନ୍ଦର। ଉକ୍ତ ପକ୍ଷୀକୁ ସ୍ଥାନୀୟ ଅଞ୍ଚଳରେ ଲୋକେ ଗରୁଡ଼ କୁହନ୍ତି। ଅରବିନ୍ଦ ଦୀର୍ଘ ୧୩ ବର୍ଷ ଧରି ଏମାନଙ୍କ ବଂଶ ରକ୍ଷା କରିଆସୁଛନ୍ତି। ୨୦୦୬ରୁ ଭାଗଲପୁର ଜିଲାକୁ ଏହି ପ୍ରଜାତିର ପକ୍ଷୀ ପ୍ରଥମେ ଆସିବାର ତାଙ୍କ ବନ୍ଧୁ ତଥା ବନ୍ୟଜନ୍ତୁ ବିଶେଷଜ୍ଞ ଜୈନ ନାରାୟଣଙ୍କଠାରୁ ଖବର ପାଇ ଗଙ୍ଗା ଡାଇରା ଅଞ୍ଚଳରେ ପହଞ୍ଚି ପ୍ରଥମେ ସେ ଏକ ଯୋଡ଼ା ଏହି ପ୍ରଜାତିର ପକ୍ଷୀ ଦେଖିବାକୁ ପାଇଥିଲେ। ଏମାନେ ଶିମିଳି ଗଛରେ ବସା ବାନ୍ଧିଥିଲେ। ୨୦୦୭ରେ ସେହି ଅଞ୍ଚଳରେ ତଥା ବିହାରର ଅନ୍ୟ ଭାଗରେ ଗଣନା ପରେ ଏମାନଙ୍କ ସଂଖ୍ୟା ଥିଲା ୭୮। ତେବେ ଅରବିନ୍ଦଙ୍କ ପ୍ରଚେଷ୍ଟାରେ ଏବେ ଏହି ପକ୍ଷୀଙ୍କ ସଂଖ୍ୟା ୬୦୦ରେ ପହଞ୍ଚତ୍ଛି। ଜଣଙ୍କ ଦ୍ୱାରା ଏହି କାର୍ଯ୍ୟ ସମ୍ଭବ ନୁହେଁ ବୋଲି ଅରବିନ୍ଦ ଅନୁଭବ କରିବା ପରେ ୨୦୧୯ରେ ଏକ ଏନ୍ଜିଓ ମନ୍ଦାର ନେଚର କ୍ଲବ ପ୍ରତିଷ୍ଠା କରି ସେଥିରେ ବହୁ ଯୁବକଙ୍କୁ ସାମିଲ କରିଛନ୍ତି। ୨୦୧୫ରେ ରାଜ୍ୟ ସରକାରଙ୍କ ସହଯୋଗରେ ଏକ ପକ୍ଷୀ ପୁନରୁଦ୍ଧାର କେନ୍ଦ୍ର ପ୍ରତିଷ୍ଠା କରିଛନ୍ତି। ଆହତ ପକ୍ଷୀମାନଙ୍କୁ ଉଦ୍ଧାର କରି ସେଠାରେ ଚିକିତ୍ସା କରୁଛନ୍ତି ଓ ସୁସ୍ଥ ହେବା ପରେ ସେମାନଙ୍କ ବାସସ୍ଥଳୀରେ ଛାଡ଼ି ଦେଉଛନ୍ତି। ଏବେ ଭାରତର ଆସାମ, ବିହାର ଏବଂ କାମ୍ବୋଡ଼ିଆରେ କେବଳ ଏହି ପକ୍ଷୀ ଦେଖାଯାଉଛନ୍ତି।
