ଗୁଆହାଟୀ,୧।୧୦: ‘ହିଟ୍ମ୍ୟାନ’ ରୋହିତ ଶର୍ମାଙ୍କ ବ୍ୟାଟ୍ରୁ ପୁଣିଥରେ ଛକାର ବର୍ଷା ଦେଖିବାକୁ ମିଳିଛି। ଗୁଆହାଟୀରେ ୱେଷ୍ଟଇଣ୍ଡିଜ ବିପକ୍ଷ ଦ୍ୱିତୀୟ ଦିନିକିଆରେ ରୋହିତ ଏକ ବିଶେଷ ରେକର୍ଡ ନିଜ ନାଁରେ କରିଛନ୍ତି। ଗୋଟିଏ ଦେଶରେ ଦିନିକିଆ କ୍ରିକେଟ୍ରେ ୨୦୦ଟି ଛକା ପୂରଣ କରିଥିବା ବିଶ୍ୱର ପ୍ରଥମ ବ୍ୟାଟର୍ ହୋଇଛନ୍ତି ରୋହିତ।
ଭାରତରେ ଦିନିକିଆ ମ୍ୟାଚ ଖେଳି ରୋହିତ ୨୦୦ ଛକା ପୂରଣ କରିଛନ୍ତି। ଏହି ତାଲିକାରେ ୱେଷ୍ଟଇଣ୍ଡିଜ୍ର କିମ୍ବଦନ୍ତୀ ବ୍ୟାଟର୍ କ୍ରିସ ଗେଲ ୧୪୭ ଛକା ସହ ଦ୍ୱିତୀୟ ସ୍ଥାନରେ ରହିଛନ୍ତି। ଅର୍ଥାତ୍ ରୋହିତ ଓ ଗେଲଙ୍କ ମଧ୍ୟରେ ୫୦ରୁ ଅଧିକ ଛକାର ବ୍ୟବଧାନ ରହିଛି।
କେବଳ ଭାରତରେ ନୁହେଁ, ସମଗ୍ର ଦିନିକିଆ କ୍ରିକେଟ୍ରେ ମଧ୍ୟ ରୋହିତ ଶର୍ମା ସର୍ବାଧିକ ଛକା ମାରିଥିବା ବ୍ୟାଟର। ତାଙ୍କ ନାଁରେ ୩୭୦ରୁ ଅଧିକ ଛକା ରହିଛି। ଏହି ତାଲିକାରେ ପାକିସ୍ତାନର ପୂର୍ବତନ ଅଲରାଉଣ୍ଡର୍ ଶାହିଦ ଆଫ୍ରିଦି ୩୫୧ ଛକା ସହ ଦ୍ୱିତୀୟ ସ୍ଥାନରେ ଅଛନ୍ତି। କ୍ରିସ ଗେଲ ୩୩୧ ଛକା ସହ ତୃତୀୟ ସ୍ଥାନରେ ଅଛନ୍ତି।
ଦିନିକିଆରେ ସର୍ବାଧିକ ଛକା
ରୋହିତ ଶର୍ମା ୩୭୭*
ଶାହିଦ ଆଫ୍ରିଦି ୩୫୧
କ୍ରିସ ଗେଲ ୩୩୧
ସନଥ ଜୟସୂର୍ଯ୍ୟା ୨୭୦
ଏମଏସ ଧୋନୀ ୨୨୯
ଇଅନ ମୋର୍ଗାନ ୨୨୦
ଏବି ଡିଭିଲିୟର୍ସ ୨୦୪
ବ୍ରେଣ୍ଡନ ମ୍ୟାକ୍କଲମ ୨୦୦
ସଚିନ ତେନ୍ଦୁଲକର ୧୯୫
ଜୋସ ବଟଲର୍ ୧୯୩
ଗୁଆହାଟୀ ମ୍ୟାଚ୍ରେ ଭାରତ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ବ୍ୟାଟିଂ କରିବାକୁ ଓହ୍ଲାଇଥିବା ୱେଷ୍ଟଇଣ୍ଡିଜ ୫୦ ଓଭରରେ ୭ ଉଇକେଟ ହରାଇ ୪୦୫ ରନ୍ର ବିଶାଳ ସ୍କୋର କରିଥିଲା। ୱେଷ୍ଟଇଣ୍ଡିଜ ପକ୍ଷରୁ ଆମୀର ଜାଙ୍ଗୁ ସର୍ବାଧିକ ୧୧୪ ରନ୍ର ଇନିଂସ ଖେଳିଥିଲେ। ୭୭ଟି ବଲ୍ରେ ସେ ୧୩ଟି ଚୌକା ଓ ୩ଟି ଛକା ମାରିଥିଲେ।
ଅଧିନାୟକ ଶାଇ ହୋପ ମଧ୍ୟ ଶତକ ହାସଲ କରି ୧୦୪ ରନ କରିଥିଲେ। ତାଙ୍କ ଇନିଂସ୍ର ୮ଟି ଚୌକା ଓ ୩ଟି ଛକା ରହିଥିଲା। ଓପନର୍ ଜନ କ୍ୟାମ୍ପବେଲ ମଧ୍ୟ ୧୦୧ ରନ୍ର ଶତକୀୟ ଇନିଂସ ଖେଳିଥିଲେ। ସେ ୬୮ଟି ବଲ୍ରୁ ୯ଟି ଚୌକା ଓ ୫ଟି ଛକା ସହ ଏହି ସ୍କୋର କରିଥିଲେ।
ତିନି ଜଣ ବ୍ୟାଟରଙ୍କ ଶତକ ବଳରେ ୱେଷ୍ଟଇଣ୍ଡିଜ ୪୦୦ ରନ୍ର ସୀମା ଅତିକ୍ରମ କରି ଭାରତ ସାମ୍ନାରେ ୪୦୬ ରନ୍ର ବିଶାଳ ବିଜୟ ଲକ୍ଷ୍ୟ ରଖିଥିଲା। ଭାରତ ପକ୍ଷରୁ ଗୁରନୂର ବରାର, ରବୀନ୍ଦ୍ର ଜାଡେଜା ଓ କୁଲଦୀପ ଯାଦବ ୨ଟି ଲେଖାଏ ଉଇକେଟ ନେଇଥିଲେ।
ଏହାପରେ ୪୦୬ ରନ୍ର ଲକ୍ଷ୍ୟ ପିଛା କରି ଭାରତୀୟ ଓପନର୍ ରୋହିତ ଶର୍ମା ଓ ଶୁବମନ ଗିଲ ମଇଦାନରେ ବ୍ୟାଟିଂର ଜବରଦସ୍ତ ପ୍ରଦର୍ଶନ କରିଥିଲେ। ରୋହିତଙ୍କ ଛକା ବର୍ଷା ସହ ଏହି ମ୍ୟାଚ୍ରେ ତାଙ୍କ ନାଁରେ ଯୋଡ଼ି ହୋଇଛି ଆଉ ଏକ ବିଶେଷ ବିଶ୍ୱ ରେକର୍ଡ।
