ନୂଆଦିଲ୍ଲୀ,୬।୧: ଅଷ୍ଟ୍ରେଲିଆର ଷ୍ଟାର ବ୍ୟାଟର ଅଧିନାୟକ ଷ୍ଟିଭ୍ ସ୍ମିଥ୍ ଟେଷ୍ଟ କ୍ରିକେଟରେ ଏକ ନୂତନ ଇତିହାସ ରଚିଛନ୍ତି। ମେଲବର୍ଣ୍ଣଠାରେ ଚାଲିଥିବା ଆସେସ୍ ସିରିଜର ଚତୁର୍ଥ ଟେଷ୍ଟରେ ସ୍ମିଥ୍ ଭାରତର ପୂର୍ବତନ ଅଧିନାୟକ ରାହୁଲ ଦ୍ରାବିଡ଼ଙ୍କୁ ପଛରେ ପକାଇ ସର୍ବାଧିକ ଟେଷ୍ଟ କ୍ୟାଚ୍ ଧରିବା କ୍ଷେତ୍ରରେ ଦ୍ୱିତୀୟ ସ୍ଥାନକୁ ଉଠିଛନ୍ତି। ଏହାସହ ସେ ନିଜର ୩୭ତମ ଟେଷ୍ଟ ଶତକ ହାସଲ କରି ଡନ୍ ବ୍ରାଡମ୍ୟାନ୍ଙ୍କ ରେକର୍ଡ ଅଭିମୁଖେ ଆଗକୁ ବଢ଼ୁଛନ୍ତି।
ମେଲବର୍ଣ୍ଣ ଟେଷ୍ଟରେ ସ୍ମିଥ୍ ବ୍ୟାଟିଂରେ ବିଶେଷ ସଫଳତା ପାଇନଥିଲେ ମଧ୍ୟ ଫିଲ୍ଡିଂରେ ଚମତ୍କାର ପ୍ରଦର୍ଶନ କରିଛନ୍ତି। ଇଂଲଣ୍ଡର ପ୍ରଥମ ଇନିଂସରେ ଦୁଇଟି କ୍ୟାଚ୍ ଧରିବା ସହ ଟେଷ୍ଟ କ୍ରିକେଟରେ ତାଙ୍କର ମୋଟ କ୍ୟାଚ୍ ସଂଖ୍ୟା ୨୧୨ରେ ପହଞ୍ଚିଛି। ଏହା ପୂର୍ବରୁ ରାହୁଲ ଦ୍ରାବିଡ଼ ୨୧୦ଟି କ୍ୟାଚ୍ ସହ ଦ୍ୱିତୀୟ ସ୍ଥାନରେ ଥିଲେ। ବର୍ତ୍ତମାନ ସ୍ମିଥଙ୍କ ଆଗରେ କେବଳ ଇଂଲଣ୍ଡର ଜୋ ରୁଟ୍ (୨୧୪ କ୍ୟାଚ୍) ରହିଛନ୍ତି।
ଷ୍ଟିଭ୍ ସ୍ମିଥ୍ ନିକଟରେ ନିଜର ୩୭ତମ ଟେଷ୍ଟ ଶତକ ପୂରଣ କରିଛନ୍ତି। ଏହି ମାଇଲଖୁଣ୍ଟ ଛୁଇଁବାରେ ସେ ସଚିନ ତେନ୍ଦୁଲକରଙ୍କ ଠାରୁ ମଧ୍ୟ ଦ୍ରୁତତର ହୋଇଛନ୍ତି। ଆସେସ୍ ଇତିହାସରେ ସର୍ବାଧିକ ଶତକ ମାମଲାରେ ସେ ବର୍ତ୍ତମାନ ଡନ୍ ବ୍ରାଡମ୍ୟାନ୍ଙ୍କ ପଛକୁ ଦ୍ୱିତୀୟ ସ୍ଥାନରେ ଅଛନ୍ତି। ବ୍ରାଡମ୍ୟାନ୍ଙ୍କ ନାମରେ ୧୯ଟି ଆସେସ୍ ଶତକ ଥିବାବେଳେ ସ୍ମିଥ୍ ଏବେ ୧୩ଟି ଶତକ ହାସଲ କରି ସାରିଲେଣି।
