ଅଲୁର, ୮।୭: ଚେତେଶ୍ୱର ପୂଜାରାଙ୍କ ଶତକ ସହାୟତାରେ ପଶ୍ଚିମାଞ୍ଚଳ ଚଳିତ ଦୁଲିପ ଟ୍ରଫି କ୍ରିକେଟ ଫାଇନାଲ ଦ୍ୱାରରେ ପହଞ୍ଚତ୍ ଯାଇଛି। କେନ୍ଦ୍ରାଞ୍ଚଳ ବିପକ୍ଷ ପ୍ରଥମ ସେମିଫାଇନାଲର ଶୁକ୍ରବାର ତୃତୀୟ ଦିବସ ଶେଷ ବେଳକୁ ପଶ୍ଚିମାଞ୍ଚଳ ଦ୍ୱିତୀୟ ଇନିଂସରେ ୯ ଉଇକେଟ ହରାଇ ୨୯୨ ରନ ସ୍କୋର କରିଛି। ଶନିବାର ମ୍ୟାଚର ଅନ୍ତିମ ଦିବସ ହୋଇଥିବାବେଳେ ପଶ୍ଚିମାଞ୍ଚଳ ଗୋଟିଏ ଉଇକେଟ ବାକିଥାଇ ୩୮୪ ରନରେ ଅଗ୍ରଣୀଲାଭ କରିଛି। ପୂଜାରା ୨୭୮ଟି ବଲ୍ ଖେଳି ୧୪ ଚୌକା ଓ ୧ ଛକା ସହାୟତାରେ ୧୩୩ ରନକରି ରନ୍ଆଉଟ ହୋଇଛନ୍ତି। ତାଙ୍କ ଶତକୀୟ ଇନିଂସ ବଳରେ ପଶ୍ଚିମାଞ୍ଚଳ ନିଜର ସ୍ଥିତିକୁ ଦୃଢ଼ କରିଛି। ପଶ୍ଚିମାଞ୍ଚଳ ପ୍ରଥମ ଇନିଂସରେ ୨୨୦ ରନ କରିଥିବାବେଳେ କେନ୍ଦ୍ରାଞ୍ଚଳ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ୧୨୮ ରନରେ ସମସ୍ତ ଉଇକେଟ ହରାଇଥିଲା। ପଶ୍ଚିମାଞ୍ଚଳ ଦ୍ୱିତୀୟ ଦିବସର ଅସମାପ୍ତ ସ୍କୋର ୧୪୯/୩ରୁ ଖେଳ ଆରମ୍ଭ କରି ପୂରା ଦିନ ବ୍ୟାଟିଂ କରିଥିଲା। ବର୍ଷା ଯୋଗୁ ଖେଳକୁ ଆଗୁଆ ବନ୍ଦ ରଖିବାକୁ ପଡ଼ିଥିଲା। ସୂର୍ଯ୍ୟକୁମାର ଯାଦବ ୫୨ ଓ ହିତ୍ ପଟେଲ ୨୭ ରନ ସ୍କୋର କରିଥିଲେ। କେନ୍ଦ୍ରାଞ୍ଚଳ ବୋଲରଙ୍କ ମଧ୍ୟରେ ସୌରଭ କୁମାର ୪ଟି, ସାରାଂଶ ଜୈନ ୩ଟି ଓ ୟଶ୍ ଠାକୁର ଗୋଟିଏ ଉଇକେଟ ନେଇଥିଲେ।
