ଧରାକୋଟ,୧୬ା୫(ଡି.ଏନ୍.ଏ.): ସରକାରଙ୍କ ସହ ବୁଝାମଣାପତ୍ର ସ୍ବାକ୍ଷର କଲେ ଠିକାଦାର। ରାସ୍ତା ନିର୍ମାଣ କାର୍ଯ୍ୟ ଆରମ୍ଭ କଲେ। ହେଲେ ଗୁଣବତା ଭୁଲି ନିମ୍ନ ମାନର ନିର୍ମାଣ କାର୍ଯ୍ୟ କରିଥିବା ଯୋଗୁ ଗାଁ ଲୋକେ ଅଭିଯୋଗ କଲେ। ଏହା ଦେଖି ଅଧାରୁ କାମ ବନ୍ଦ କରି ଚାଲିଗଲେ। ଯାହାର ପରିଣାମ ଭୋଗୁଛନ୍ତି ୩୦ ଖଣ୍ଡ ଗାଁର ଲୋକେ। ଭଞ୍ଜନଗର ପୂର୍ତ୍ତ ବିଭାଗ ଡିଭିଜନ ଅଧୀନରେ ରହିଥିବା ଝଗଡ଼େଇ ମଙ୍ଗଳପୁର ଜାହାଡା ନୂଆଗାଁ ୨୪ କିମି ରାସ୍ତା ନିର୍ମାଣ ପାଇଁ ୨୪କୋଟି ୫୦ ଲକ୍ଷ୍ୟ ଟଙ୍କାର ଟେଣ୍ଡର ନେଇଛି ଏକ ଠିକା ସଂସ୍ଥା। ୨୦୨୨ରେ ରାସ୍ତା ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା।୨୦୨୩ ମାର୍ଚ୍ଚ ମାସ ସୁଦ୍ଧା ଏହି ରାସ୍ତାର ଜାହାଡା, ପୂଟୁ, ନନ୍ଦୀଗୋର, ଜଗମୋହନ, ଚମ୍ପା ପଲି, ନୂଆଗାଁ ଛକ, ଗଙ୍ଗାପୁର, ମଙ୍ଗଳପୁର ପର୍ଯ୍ୟନ୍ତ ରାସ୍ତା ନିର୍ମାଣ ସହ କଲଭର୍ଟ, ବକ୍ସ ବ୍ରିଜ ନିର୍ମାଣ ହୋଇଛି। ହେଲେ ଏହା ଅତ୍ୟନ୍ତ ନିମ୍ନ ମାନର ବୋଲି ମଙ୍ଗଳପୁର, ଜଗମୋହନ ଓ ଜାହାଡା ପଞ୍ଚାୟତ ଲୋକେ ପ୍ରତିବାଦ କରିବା ସହ ଅଭିଯୋଗ ପରେ ନିର୍ମାଣ କାର୍ଯ୍ୟ ବନ୍ଦ କରିଥିଲା ଠିକା କମ୍ପାନୀ। ଫଳରେ ରାସ୍ତା ଧୋଇ ହେବାସହ ମେଟାଲ ଉଠିଗଲାଣି। ଏପରିକି ଡାଇଭର୍ସନ ରାସ୍ତା ନଷ୍ଟ ହୋଇ ଖାଲ ଖମା ହୋଇଯିବାରୁ ରାସ୍ତାରେ ଯାତାୟାତରେ ଘୋର ଅସୁବିଧା ସୃଷ୍ଟି ହେଉଛି। ଏହି ରାସ୍ତାରେ ଆସିକାଠାରୁ ସୋରଡ଼ା ଚଳାଚଳ କରୁଥିବା ପ୍ରାୟ ୩୦ ଖଣ୍ଡ ଗାଁର ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେବା ସହ ହନ୍ତସନ୍ତ ହେଉଛନ୍ତି। ରାସ୍ତାରେ ଯାନବାହାନ ଚଳାଚଳ ବାଧାପ୍ରାପ୍ତ ହେଉଥିବା ବେଳେ ଚାଲି ଚାଲି ଯିବା ସମ୍ଭବ ହେଉନାହିଁ। ଆଶ୍ଚର୍ଯ୍ୟର କଥା ଏହି ନିର୍ମାଣ କାର୍ଯ୍ୟ ତଦାରଖ ଦାୟିତ୍ୱ ଗାଙ୍ଗପୁର ଓ ସୋରଡ଼ା ପୂର୍ତ୍ତ ବିଭାଗ ଅଧୀନରେ ରହିଛି। ଦୁଇଜଣ ଯନ୍ତ୍ରୀ, ସହକାରୀ ଯନ୍ତ୍ରୀଙ୍କ ସମେତ ମେଟ ମାନେ ନିର୍ମାଣ କାର୍ଯ୍ୟ ସମୟରେ ଉପସ୍ଥିତ ରହିବା ପରେ ମଧ୍ୟ ଠିକା ସଂସ୍ଥା ଏପରି ନିମ୍ନ ମାନର ନିର୍ମାଣ କାର୍ଯ୍ୟ କରିବା ପାଇଁ ସାହାସ ଯୁଟାଇ ପାରୁଛି
କେମିତି । ନିମ୍ନ ମାନର ନିର୍ମାଣ କାର୍ଯ୍ୟ ସମ୍ପର୍କରେ ଅଞ୍ଚଳର ଲୋକେ ବିଭାଗୀୟ ଅଧିକାରୀ ଓ ଜିଲା ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ କାହିଁକି ନିଆ ଯାଉନାହିଁ ତାହା ବୁଝି ହେଉନାହିଁ। ଘଟଣା ସମ୍ପର୍କରେ ବିଭାଗୀୟ କନିଷ୍ଠ ଯନ୍ତ୍ରୀଙ୍କ ସହ ଯୋଗାଯୋଗ ବେଳେ ଖୁବ ଶୀଘ୍ର ବନ୍ଦ ରହିଥିବା ନିର୍ମାଣ କାର୍ଯ୍ୟ ଆରମ୍ଭ ହେବ ବୋଲି ପ୍ରକାଶ କରିଛନ୍ତି। ସମ୍ପ୍ରତି ନିମ୍ନମାନର ନିର୍ମାଣ କାର୍ଯ୍ୟ ସମ୍ପର୍କରେ ତଦନ୍ତ ପାଇଁ ଅଞ୍ଚଳବାସୀ ଦାବି କରିଛନ୍ତି।
