ବେଙ୍ଗାଲୁରୁ,୬।୫ : କର୍ନାଟକ ବିଧାନସଭା ନିର୍ବାଚନ ପାଇଁ ଏହି ଅଭିଯାନ ଶେଷ ପର୍ଯ୍ୟାୟରେ ଅଛି। ବଜରଙ୍ଗ ଦଳ, ବଜରଙ୍ଗ ବାଲି ଏବଂ ନିକଟରେ ମୁକ୍ତିଲାଭ କରିଥିବା ଚଳଚ୍ଚିତ୍ର ଦି କେରଲା ଷ୍ଟୋରି ଭଳି ପ୍ରସଙ୍ଗ ଚର୍ଚ୍ଚାର ବିଷୟ ପାଲଟିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦକ୍ଷିଣ ରାଜ୍ୟ ପାଇଁ ପ୍ରଚାରରେ ବ୍ୟସ୍ତ ଅଛନ୍ତି। ଏଭଳି ପରିସ୍ଥିତିରେ ଅଲ ଇଣ୍ଡିଆ ମଜଲିସ-ଇ-ଇଥାହାଦୁଲ ମୁସଲିମନ (ଏଆଇଏମଆଇଏମ) ମୁଖ୍ୟ ଅସଦୁଦ୍ଦିନ ଓୱାଇସି ଏସବୁ ପ୍ରସଙ୍ଗରେ ପ୍ରଧାନମନ୍ତ୍ରୀ ମୋଦିଙ୍କୁ କଡ଼ା ସମାଲୋଚନା କରିଛନ୍ତି।
ଓୱାଇସି କହିଛନ୍ତି ଗୋଟିଏ ପଟେ ଆତଙ୍କବାଦୀମାନେ ଜମ୍ମୁ-କଶ୍ମୀରରେ ଯବାନ ମାନଙ୍କୁ ହତ୍ୟା କରୁଛନ୍ତି, ମଣିପୁର ହିଂସାର ନିଆଁରେ ଜଳୁଛି ଏବଂ ଏପରିସ୍ଥଳେ ଆମ ଦେଶର ପ୍ରଧାନମନ୍ତ୍ରୀ କର୍ନାଟକ ନିର୍ବାଚନ ପାଇଁ ପ୍ରଚାର କରିବାରେ ବ୍ୟସ୍ତ ଅଛନ୍ତି। ଆମେ ପ୍ରଧାନମନ୍ତ୍ରୀଙ୍କୁ ଅନୁରୋଧ କରିବାକୁ ଚାହୁଁଛୁ ଯେ କର୍ନାଟକରେ ନିର୍ବାଚନ ଅଛି, କିନ୍ତୁ ପାକିସ୍ତାନରୁ ଆତଙ୍କବାଦୀମାନେ ଆସି ଆମର ପାଞ୍ଚ ଯବାନଙ୍କୁ ହତ୍ୟା କରୁଛନ୍ତି, ମଣିପୁର ଜଳୁଛି। ଲୋକମାନେ ନିଜ ଘରୁ ପଳାୟନ କରୁଛନ୍ତି କିନ୍ତୁ ପ୍ରଧାନମନ୍ତ୍ରୀ ନିର୍ବାଚନୀ ପ୍ରଚାରରେ ଦି କେରଲା ଷ୍ଟୋରି ଫିଲ୍ମକୁ ପ୍ରୋତ୍ସାହିତ କରୁଛନ୍ତି।
ଏହା ଏକ ମିଥ୍ୟା ଚଳଚ୍ଚିତ୍ର। ଏଥିରେ କେବଳ ବୁର୍ଖା ଦେଖାଇ ନିର୍ମାତା ଟଙ୍କା ରୋଜଗାର କରିବାକୁ ଚାହୁଁଛନ୍ତି । ପ୍ରଧାନମନ୍ତ୍ରୀ ଘୃଣା ବିସ୍ତାର କରୁଛନ୍ତି। ନିର୍ବାଚନରେ ଜିତିବା ପାଇଁ ପ୍ରଧାନମନ୍ତ୍ରୀ ଏତେ ନିମ୍ନମାନର ଅଚାରଣ ପ୍ରଦର୍ଶନ କରୁଛନ୍ତି ତାହା ଚିନ୍ତାର ବାହାରେ।
ଓୱାଇସି କହିଛନ୍ତି, ପ୍ରଧାନମନ୍ତ୍ରୀ କେବଳ ଭାଷଣ ଦିଅନ୍ତୁ ନାହିଁ। ପାକିସ୍ତାନକୁ ଅଟକାନ୍ତୁ ଯାହା ଦ୍ୱାରା ସେମାନେ ଆସି ଆମର ଯବାନମାନଙ୍କୁ ହତ୍ୟା କରିପାରିବେ ନାହିଁ। ପ୍ରଧାନମନ୍ତ୍ରୀ କେବଳ ଜାତୀୟତା ଉପରେ ର୍ନିବାଚନ ଭାଷଣ ଦିଅନ୍ତି କିନ୍ତୁ ଆମର ଯବାନ ଶହୀଦ ହୋଇଗଲେ ଚୁପ ରୁହନ୍ତି।
