ନୂଆଦିଲ୍ଲୀ,୧।୮: କୃଷି ଆୟ ଉପରେ ଆୟକର ଛାଡ଼ ଦିଆଯାଇଥାଏ। ତେବେ ଏହି ଛାଡରେ ଦୁର୍ନୀତି ହୋଇଥିବା ସିଏଜି ରିପୋର୍ଟରେ ଉଲ୍ଲେଖ କରାଯାଇଛି। ସମ୍ପୂର୍ଣ୍ଣ ରୂପେ ଯାଞ୍ଚ କରା ନ ଯାଇ କୃଷି ଆୟ ଉପରେ ୫୦୦ କୋଟି ଟଙ୍କାର ଆୟକର ଛାଡ଼ ଦିଆଯାଇଛି ବୋଲି ରିପୋର୍ଟରେ ଦର୍ଶାଯାଇଛି। ମାର୍ଚ୍ଚ ୨୦୧୮ରେ ଶେଷ ହୋଇଥିବା ଆର୍ଥିକ ବର୍ଷ ଲାଗି ପ୍ରତ୍ୟକ୍ଷକର ଉପରେ ଅଡିଟର ରିପୋର୍ଟରେ ଏହା ଉଲ୍ଲେଖ କରାଯାଇଛି। ଏହି ରିପୋର୍ଟରେ କୃଷି ଓ ଚାରିଟେବଲ ଟ୍ରଷ୍ଟକୁ ମିଳିଥିବା ଛାଡ଼ ସମ୍ପର୍କରେ କୁହାଯାଇଛି। ଆୟକର ବିଭାଗ ଏହିସବୁ ମାମଲାର ପୁନର୍ବାର ଯାଞ୍ଚ କରିବାକୁ ସିଏଜି ପକ୍ଷରୁ ନିର୍ଦ୍ଦେଶ ଦିଆଯାଇଛି। ରିପୋର୍ଟରେ କୁହାଯାଇଛି ଯେ, ୬୭୭୮ ମାମଲାରେ ଆସେସମେଣ୍ଟରେ ମୋଟ ୨୨.୫ ପ୍ରତିଶତ ଅର୍ଥାତ୍ ୧,୫୨୭ଙ୍କୁ କୃଷି ଆୟ ଉପରେ ଟିକସ ଛାଡ଼ି ଦିଆଯାଇଛି। ଠିକ କାଗଜପତ୍ର ଯାଞ୍ଚ ବିନା ଏହି ସୁବିଧା ଦିଆଯାଇଛି। ଆୟକର ଛାଡ଼ି ଦିଆଯିବା ପୂର୍ବରୁ ଜମି ରେକର୍ଡ, ଆୟ ଓ ଖର୍ଚ୍ଚ ସହ ଜଡ଼ିତ ତଥ୍ୟ ଏବଂ ଫସଲ ସୂଚନା, ବିଲ୍ ଓ ଚାଲାଣ ଆଦି ଯାଞ୍ଚ କରାଯିବା ଉଚିତ ଥିଲା ବୋଲି ରିପୋର୍ଟରେ କୁହାଯାଇଛି।
