ଇସଲାମାବାଦ,୨୪।୪ : ପାକିସ୍ତାନ ପୁଣିଥରେ ସାମରିକ ଶାସନ ପଥରେ ଅଛି କି? ପୂର୍ବତନ ପ୍ରଧାନମନ୍ତ୍ରୀ ସହିଦ ଖକାନ ଅବ୍ବାସିଙ୍କ ଶେଷ ବିବୃତ୍ତିକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି। ପାକିସ୍ତାନରେ ଆର୍ଥିକ ଏବଂ ରାଜନୈତିକ ସଙ୍କଟ ଦେଖାଦେଇଛି ବୋଲି ଅବ୍ବାସି ଚେତାବନୀ ଦେଇଛନ୍ତି। ଏଭଳି ପରିସ୍ଥିତିରେ ସେନା ପୁଣି କ୍ଷମତା ଦଖଲ କରିପାରେ ବୋଲି ଆଶଙ୍କା ଘନେଇବାରେ ଲାଗିଛି। ସେ କହିଛନ୍ତି, ଅତୀତରେ ସେନା କମ ଗୁରୁତର ପରିସ୍ଥିତିରେ ହସ୍ତକ୍ଷେପ କରିଛି।
ଏକ ସାକ୍ଷାତକାରରେ ଅବ୍ବାସି କହିଛନ୍ତି, ଯଦି ଦେଶରେ ଶାସନ ବ୍ୟବସ୍ଥା ବିଫଳ ହୁଏ କିମ୍ବା ଯେତେବେଳେ ଅନୁଷ୍ଠାନ ମଧ୍ୟରେ ବିବାଦ ଥାଏ ଏବଂ ରାଜନୈତିକ ନେତୃତ୍ୱ ଆଗକୁ ବଢ଼ିବାକୁ ଅସମର୍ଥ ହୋଇଥାନ୍ତି ସେତେବେଳେ ସାମରିକ ଆଇନ ଲାଗୁ ହୋଇପାରେ। ସମାନ ପରିସ୍ଥିତିରେ ପାକିସ୍ତାନରେ ଦୀର୍ଘ ଦିନ ଧରି ସାମରିକ ଆଇନ ରହିଥିବାରୁ ନଜିର ରହିଛି। ପୂର୍ବରୁ ପାକିସ୍ତାନ ଏପରି ଭୟଙ୍କର ଅଥନୈତିକ ଏବଂ ରାଜନୈତିକ ପରିସ୍ଥିତି ଦେଖି ନାହିଁ। କମ ସଙ୍କଟ ଜନକ ପରିସ୍ଥିତିରେ ସୈନ୍ୟମାନେ କ୍ଷମତା ଦଖଲ କରିଛନ୍ତି।
ଅବ୍ବାସି ଚେତାବନୀ ଦେଇଛନ୍ତି ଯେ ଯଦି ସମାଜ ଏବଂ ଅନୁଷ୍ଠାନ ମଧ୍ୟରେ ବିବାଦ ଅତ୍ୟଧିକ ଗଭୀର ହୋଇଯାଏ, ତେବେ ଏପରି ପରିସ୍ଥିତିରେ ସେନା ଶାସନରେ ପାଦ ଦେଇପାରେ। ଅନେକ ଦେଶରେ ଏହା ଘଟିଛି । ଯେତେବେଳେ ରାଜନୈତିକ ଏବଂ ସାମ୍ବିଧାନିକ ବ୍ୟବସ୍ଥା ବିଫଳ ହୁଏ, ସେତେବେଳେ ସେଠାରେ ଅତିରିକ୍ତ ସାମ୍ବିଧାନିକ ପଦକ୍ଷେପ ଗ୍ରହଣ କରାଯାଇଛି। ସେନା କ୍ଷମତା ଗ୍ରହଣ କଲେ ପରିସ୍ଥିତି ଆହୁରି ଖରାପ ହେବ ବୋଲି ସେ କହିଛନ୍ତି।
ଅବ୍ବାସି କହିଛନ୍ତି ଦେଶରେ ସୁଧାର ପାଇଁ ରାଜନୈତିକ ବ୍ୟବସ୍ଥା ହେଉଛି ଏକମାତ୍ର ପଥ। ପ୍ରତ୍ୟେକ ରାଜନୈତିକ ଦଳ ସରକାରରେ ଅଛନ୍ତି, କିନ୍ତୁ ସେମାନେ ଏପର୍ଯ୍ୟନ୍ତ ଦେଶର ବିକାଶ ପାଇଁ କିଛି କରିନାହାଁନ୍ତି। ଏହା ପ୍ରକୃତରେ ଏକ ଗଭୀର ସଙ୍କଟ। ଆଗକୁ ଯିବାକୁ ବାଟ ଖୋଜିବାକୁ ସେ ପିଟିଆଇ ଅଧ୍ୟକ୍ଷ ଇମ୍ରାନ ଖାନ, ପିଏମଏଲ ସୁପ୍ରିମୋ ନୱାଜ ସରିଫ ଏବଂ ସେନା ମୁଖ୍ୟ ଜେନେରାଲ ଅସୀମ ମୁନିରଙ୍କୁ ଅନୁରୋଧ କରିଛନ୍ତି। ସେ କହିଛନ୍ତି, ଆମକୁ ନେତୃତ୍ୱ ଆରମ୍ଭ କରିବା ଆବଶ୍ୟକ ଏବଂ ତା’ପରେ ସବୁକିଛି ଠିକ ହୋଇଯିବ।
