ଭୁବନେଶ୍ୱର, ୩୧।୭(ବ୍ୟୁରୋ): ରାଜ୍ୟରେ ହରିଣ ଶିକାର ଦ୍ରୁତ ଗତିରେ ବଢୁଛି। ଗତ ୩ ବର୍ଷ ମଧ୍ୟରେ ବିଭିନ୍ନ ପ୍ରଜାତିର ୧୦୬ ହରିଣଙ୍କୁ ଶିକାର କରାଯାଇଛି। ମଙ୍ଗଳବାର ବିଧାନସଭାରେ ଏହି ସୂଚନା ଦେଇଛନ୍ତି ଜଙ୍ଗଲ ଓ ପରିବେଶ ବିଭାଗ ମନ୍ତ୍ରୀ ବିକ୍ରମ କେଶରୀ ଆରୁଖ । ସେ କହିଛନ୍ତି ଯେ ୨୦୧୬-୧୭ ଏବଂ ୨୦୧୮-୧୯ରେ ୧୦୬ ହରିଣ ଶିକାର ହୋଇଛନ୍ତି। ୨୦୧୬-୧୭ରେ ୨୮ଟି ହରିଣଙ୍କୁ ମାରି ଦିଆଯାଇଥିବା ବେଳେ ୨୦୧୭-୧୮ରେ ୪୪ ଏବଂ ୨୦୧୮-୧୯ରେ ୩୪ଟି ହରିଣଙ୍କୁ ଶିକାର କରାଯାଇଛି। ଏହି ସମୟ ମଧ୍ୟରେ ୬ଟି କଲାରାପତରିଆ ବାଘ ଏବଂ ୬ଟି ହାତୀଙ୍କୁ ମଧ୍ୟ ଶିକାରୀ ମାରିଛନ୍ତି। ଶିକାରୀଙ୍କ କବଳରୁ ଜୀବଜନ୍ତୁଙ୍କୁ ରକ୍ଷା କରିବା ପାଇଁ ବିଭାଗ ପକ୍ଷରୁ ଅନେକ ପଦକ୍ଷେପ ନିଆଯାଇଛି। ଜୀବଜନ୍ତୁ ସୁରକ୍ଷା ସ୍କ୍ବାର୍ଡ ଗଠନ କରାଯାଇ ୨୪ ଘଣ୍ଟା ନଜର ରଖାଯାଉଛି। ପଶୁଜନ୍ତୁଙ୍କୁ ଶିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ରାଜ୍ୟ ଅପରାଧ ଶାଖାରେ ଏକ ସେଲ ଖୋଲାଯାଇଛି। ଯେଉଁମାନେ ଶିକାରୀମାନଙ୍କ ବିଷୟରେ ଖବର ଦେବେ ସେମାନଙ୍କୁ ପୁରସ୍କୃତ କରିବା ବ୍ୟବସ୍ଥା ରହିିଛି ବୋଲି ବିଧାୟକ ମୋହନ ମାଝିଙ୍କ ତାରକା ପ୍ରଶ୍ନ (ନଂ-୬୨୬)ର ଉତ୍ତର ଦେଇ ମନ୍ତ୍ରୀ ଏହା କହିଛନ୍ତି। ସେହିପରି ମହେନ୍ଦ୍ରଗିରି ପର୍ବତକୁ ଜୈବମଣ୍ଡଳ ଘୋଷଣା ନିମନ୍ତେ ଏହାର ସାମାଜିକ ଓ ଅର୍ଥନୈତିକ ସର୍ଭେ କରିବା ପାଇଁ ଯୋଜନା ଚାଲିଛି। ସେହି ଅଞ୍ଚଳର ଜୈବ ବିବିଧତାକୁ ପୁଙ୍ଖାନୁପୁଙ୍ଖ ଭାବେ ଅଧ୍ୟୟନ କରିବାକୁ ପାରଳାଖେମୁଣ୍ଡି ବନଖଣ୍ଡ ଅଧିକାରୀଙ୍କୁ ଦାୟିତ୍ୱ ଦିଆଯାଇଛି। ଏହାର ତଥ୍ୟ ଆସିନାହିଁ। ତଥ୍ୟ ମିଳିବାପରେ କେନ୍ଦ୍ର ସରକାରଙ୍କୁ ପ୍ରସ୍ତାବ ପ୍ରେରଣ କରାଯିବ ବୋଲି ମନ୍ତ୍ରୀ କହିଛନ୍ତି।
