ସିନାପାଲି,୧୩।୨(ଡି.ଏନ.ଏ.):ନୂଆପଡା ଜିଲା ଅନ୍ତର୍ଗତ ସିନାପାଲି ବ୍ଲକ ଖଇରପଦର ପଞ୍ଚାୟତରେ ପିଡିଏସ ଚାଉଳ ହଡପ ହୋଇଥିବା ଅଭିଯୋଗ ହୋଇଛି। ସ୍ଥାନୀୟ କାର୍ଯ୍ୟନିର୍ବାହୀ ଅଧିକାରୀ ଓ ଯୋଗାଣ ସହାୟକ ମିଶି ଚଞ୍ଚକତା କରିଥିବା ସୂଚନା ମିଳିଛି। ଏ ନେଇ ହିତାଧିକାରୀମାନେ ଉଭୟଙ୍କୁ ପଞ୍ଚାୟତ କାର୍ଯ୍ୟାଳୟରେ ଘେରି ଅଟକ ରଖିଥିବା ଜଣାପଡ଼ିଛି। ୫ ମାସର ଚାଉଳ ହିତାଧିକାରୀଙ୍କୁ ତୁରନ୍ତ ପ୍ରଦାନ କରା ନ ଗଲେ ବ୍ଲକ ଅଫିସ ସମ୍ମୁଖରେ ଧାରଣାରେ ବସି ଆନ୍ଦୋଳନ କରିବୁ ବୋଲି ହିତାଧିକାରୀମାନେ ଚେତାବନୀ ଦେଇଛନ୍ତି। ପ୍ରାପ୍ତ ଖବର ଅନୁସାରେ ଖଇରପଦର ପଞ୍ଚାୟତ ଅନ୍ତର୍ଗତ ଫୁଲଚି ଓ ଥିପାଖୋଲ ଗ୍ରାମର ପ୍ରାୟ ୧ ଶହ ୨୦ କାର୍ଡଧାରୀ ପରିବାରକୁ ଗତ ଅଗଷ୍ଟରୁ ପିଡିଏସ ଚାଉଳ ଓ ମାଣ୍ଡିଆ ପ୍ରଦାନ କରାଯାଇ ନାହିଁ। ବାରମ୍ବାର ସରପଞ୍ଚ ତଥା ବିଭାଗୀୟ ଅଧିକାରୀ ଯୋଗାଣ ନିରୀକ୍ଷକଙ୍କ ଦୃଷ୍ଟି ଆକର୍ଷଣ କରାଯାଇଥିଲେ ମଧ୍ୟ କୌଣସି ସୁଫଳ ମିଳି ନ ଥିବା ହିତାଧିକାରୀମାନେ ପ୍ରକାଶ କରିଛନ୍ତି। ସୂଚନାଯୋଗ୍ୟ ଯେ, ଚାଉଳ ହଡପ ଘଟଣା ନେଇ ଯୋଗାଣ ନିରୀକ୍ଷକଙ୍କୁ ମଧ୍ୟ ପୂର୍ବରୁ ଅବଗତ କରାଯାଇଥିବା ନେଇ ହିତାଧିକାରୀ ପ୍ରକାଶ କରିଛନ୍ତି। ଫୁଲଚି ଓ ଥିପାଖୋଲ ଗ୍ରାମର ଶତାଧିକ ରାଶନ କାର୍ଡଧାରୀ ପଞ୍ଚାୟତ କାର୍ଯ୍ୟାଳୟକୁ ଆସି ଚାଉଳ ପାଇଁ ହୋହାଲ୍ଲା କରିଥିଲେ। ଦୀର୍ଘ ସମୟ ଧରି ରାଶନରୁ ବଞ୍ଚତ୍ତ ହିତାଧିକାରୀଙ୍କ ସହ ଆଲୋଚନା ପରେ ନିର୍ବାହୀ ଅଧିକାରୀ ଓ ଯୋଗାଣ ସହାୟକ ଆଗାମୀ ୧୪ ତାରିଖରେ ଚାଉଳ ପ୍ରଦାନ କରିବୁ ବୋଲି ଏକ ଚୁକ୍ତିନାମା ମାଧ୍ୟମରେ ଘୋଷଣା ପରେ ଉତ୍ତ୍ୟକ୍ତ ହିତାଧିକାରୀ ଶାନ୍ତ ହୋଇପଡ଼ିଥିଲେ। ହେଲେ ନିର୍ଦ୍ଦାରିତ ଦିନ ବକେୟା ଚାଉଳ ନ ପାଇଲେ ବ୍ଲକ ଅଫିସ ସମ୍ମୁଖରେ ବିକ୍ଷୋଭ କରି ଧାରଣାରେ ବସିବୁ ବୋଲି ସ୍ଥାନୀୟ ହିତାଧିକାରୀ ରାମେଶ୍ୱର ମାଝି, ରାଇସିଙ୍ଗ ମାଝି, ବଳରାମ ମାଝି, ବନ ମାଝି, ଜୟରାମ ମାଝି, ଟିକେମଣି ମାଝି, ରେମଣି ମାଝି, ତୁଲେଶ୍ୱରୀ ମାଝି, ଅଞ୍ଜୁଲ ମାଝି, ନୁର ମାଝି, ପଦ୍ମନୀ ମାଝି, ନୂଆଦି ମାଝି, ଗୋମତି ମାଝି, ବିଳାସ ମାଝି, ଜାନକୀ ମାଝି, ତୁଳସେ ମାଝି, ଶୋଭନୀ ମାଝି, ଦେବକୀ ରାଉତ, କନ ଘିଭେଲା, ବିଶଦେ ମାଝି ପ୍ରମୁଖ ଚେତାବନୀ ଦେଇଛନ୍ତି।
